இலங்கையின் புதிய பிரதமர் தில்லி கல்லூரியின் முன்னாள் மாணவி!

இலங்கை பிரதமராக பதவியேற்றுள்ள ஹரிணி அமரசூரிய, தில்லி ஹிந்து கல்லூரியில் படித்த மாணவி ஆவார்.

இலங்கையில் கடந்த வாரம் நடைபெற்ற அதிபர் தேர்தலில் வெற்றி பெற்ற ஜனதா விமுக்தி பெரமுன கட்சியின் தலைவர் அநுர குமார திசாநாயக வெற்றி பெற்று நாட்டின் புதிய அதிபராக பதவியேற்றார்.

இதனிடையே, பிரதமர் தினேஷ் குணவர்த்தன தனது பதவியை ராஜிநாமா செய்த நிலையில், புதிய பிரதமராக என்பிபி கட்சியின் முக்கிய தலைவரும், சமூக ஆர்வலருமான ஹரிணி அமரசூரிய(வயது 54) பதவியேற்றுக் கொண்டார்.

ஹிந்து கல்லூரியின் முன்னாள் மாணவி

இலங்கையின் புதிய பிரதமராக பதவியேற்றுள்ள ஹரிணி அமரசூரிய, தில்லியில் உள்ள ஹிந்து கல்லூரியின் முன்னாள் மாணவி ஆவார்.

1991 முதல் 1994 வரையிலான காலகட்டத்தில் ஹிந்து கல்லூரியில் சமூகவியல் துறையில் பயின்று பட்டம் பெற்றுள்ளார் ஹரிணி அமரசூரிய.

தொடர்ந்து, ஆஸ்திரேலியாவில் மானுடவியல் படிப்பு மற்றும் எடின்பர்க் பல்கலைக்கழகத்தில் சமூக மானுடவியலில் முனைவர் பட்டமும் ஹரிணி பெற்றுள்ளார்.

பல்கலைக்கழக விரிவுரையாளராக பணியாற்றியுள்ள ஹரிணி, இளைஞர்கள், அரசியல், பாலினம், வளர்ச்சி, குழந்தைகள் பாதுகாப்பு, உலகமயமாக்கல் உள்பட பல்வேறு தலைப்புகளில் ஆய்வுகள் செய்ததுடன் புத்தகங்களையும் எழுதியுள்ளார்.

கல்லூரி அறிக்கை

“இலங்கையின் 16-வது பிரதமராகவும், பெருமைக்குரிய பதவியை வகிக்கும் மூன்றாவது பெண்ணாகவும் வரலாற்றில் இடம்பிடித்துள்ள முன்னாள் மாணவி முனைவர் ஹரிணி அமரசூரியவின் சாதனையை ஹிந்துக் கல்லூரி பெருமையுடன் கொண்டாடுகிறது.

ஹிந்துக் கல்லூரியின் வகுப்பறைகளில் இருந்து தனது நாட்டின் உயரிய பதவியை அடைந்துள்ள ஹரிணியின் பயணத்தை கண்டு அவரது ஆசிரியர்கள் பெருமை கொள்கிறார்கள்” எனக் குறிப்பிடப்பட்டுள்ளது.

மூன்றாவது பெண் பிரதமர்

பெண்கள் உரிமை ஆர்வலரும் கல்வியாளருமான ஹரிணி, இலங்கையின் மூன்றாவது பெண் பிரதமர் என்பது குறிப்பிடத்தக்கது. 1994-ஆம் ஆண்டில் சிறீமாவோ பண்டாரநாயக பதவியேற்றதற்குப் பிறகு, இலங்கை பிரதமராக ஒரு பெண் பதவியேற்பது இதுவே முதல்முறையாகும்.

இலங்கை பிரதமராக பதவியேற்ற முதல் கல்வியாளர் என்ற பெருமையையும் ஹரிணி பெற்றுள்ளார்.