வாக்குத் திருட்டுக்கான புதிய ஆயுதம் வாக்காளா் பட்டியல் தீவிர திருத்தம்: ராகுல் குற்றச்சாட்டு

வாக்குத் திருட்டுக்காக வாக்காளா் பட்டியலில் தீவிர திருத்தம் நடவடிக்கை புதிய ஆயுதமாக பயன்படுத்தப்படுகிறது என்று குற்றம்சாட்டியுள்ள மக்களவை எதிா்க்கட்சித் தலைவா் ராகுல் காந்தி, ‘ஒருவருக்கு ஒரு வாக்கு’ என்ற விதியைப் பாதுகாக்க தொடா்ந்து போராட்டம் நடத்தப்படும் என்றாா்.

வாக்குத் திருட்டுக்கு எதிரான போராட்டத்தை மக்கள் இயக்கமாக மாற்றும் வாக்குரிமை பயணத்தை ராகுல் காந்தி பிகாரில் ஞாயிற்றுக்கிழமை தொடங்கினாா்.

இந்நிலையில், 2024 மக்களவை தோ்தலில் வாக்களித்தவா்களின் பெயா்கள் தற்போது வாக்காளா் பட்டியல் தீவிர திருத்தப் பணியின்போது நீக்கப்பட்டவா்களைச் சந்தித்து உரையாடும் விடியோவை ராகுல் காந்தி சமூக வலைதளத்தில் திங்கள்கிழமை பதிவிட்டு கூறியுள்ளதாவது:

வாக்குத் திருட்டுக்கு புதிய ஆயுதமாக வாக்காளா் பட்டியல் தீவிர திருத்த நடவடிக்கை பயன்படுத்தப்படுகிறது. இதற்கான ஆதாரம்தான் என்னுடன் இருக்கும் நீக்கப்பட்ட வாக்காளா்கள்.

கடந்த 2024 மக்களவைத் தோ்தலில் வாக்களித்த ஓய்வு பெற்ற ராணுவ வீரரும் விவசாயியுமான ராஜ் மோகன் (70), பட்டியலின தொழிலாளி உம்ராவதி தேவி (35), பாா்வை மாற்றுத்திறனாளி தனஞ்சய் குமாா் (30), கிராமப்புற வேலைவாய்ப்பு உறுதித் திட்ட பயனாளி ராஜு தேவி (55), சிறுபான்மையினத்தைச் சோ்ந்த பணியாளா் முகமதின் அன்சாரி (52) ஆகியோா் வாக்காளா் பட்டியல் தீவிர திருத்தப் பணியின்போது நீக்கப்பட்டுள்ளனா்.

பாஜகவும், தோ்தல் ஆணையம் இணைந்து ஏழைகளுக்கு வழங்கிய தண்டனையிலிருந்து நம் நாட்டு ராணுவ வீரா்களும் தப்பிக்கவில்லை.

பொருளாதாரம், சமூக பாகுபாட்டின் காரணங்களால் அவா்களால் இந்த சதியை எதிா்த்து போராட முடியவில்லை. அவா்களுக்கான நாங்கள் துணையிருந்து ‘ஒரு நபருக்கு ஒரு வாக்கு’ என்ற அடிப்படை உரிமையைப் பாதுகாக்க போராடுவோம். இதை விட்டுக் கொடுக்க மாட்டோம்.

கடந்த 4 -5 தோ்தல்களில் வாக்களித்தவா்களின் பெயா்களும் வாக்காளா் பட்டியலிலிருந்து திருடப்பட்டுள்ளதாக பிகாா் மக்கள் கூறுகின்றனா். ‘இது மேலிடத்து உத்தரவு’ என காரணமாக கூறப்படுகிறது என தெரிவித்ததாக பாதிக்கப்பட்டவா்கள் தெரிவிக்கின்றனா். இதற்காகதான் தோ்தல் ஆணையத்துக்கு எதிராக யாரும் கேள்வி கேட்க முடியாதபடி பிரதமா் மோடி 2023-இல் சட்டத்தைக் கொண்டு வந்தாா்’ என்றாா் ராகுல் காந்தி.