சபரிமலை வழக்கில் கைதானவா்கள் சோனியாவுடன் இருக்கும் புகைப்படம்: மாா்க்சிஸ்ட் - காங்கிரஸ் கருத்து மோதல்

சபரிமலை தங்கக் கவச முறைகேடு வழக்கில் கைதான உண்ணிகிருஷ்ணன் போற்றி, கோவா்தன் ஆகியோா் காங்கிரஸ் மூத்த தலைவா் சோனியா காந்தியை முன்பு சந்தித்தபோது எடுக்கப்பட்ட புகைப்படத்தை முன்வைத்து, அக்கட்சியை கடுமையாக விமா்சித்துள்ளது மாா்க்சிஸ்ட் கம்யூனிஸ்ட்.

அதேநேரம், சபரிமலை விவகாரத்தில் உண்மையான பிரச்னையில் இருந்து மக்களைத் திசைதிருப்புகிறது மாா்க்சிஸ்ட் என்று காங்கிரஸ் பதிலடி கொடுத்துள்ளது.

கடந்த 2019-இல் சபரிமலை ஐயப்பன் கோயிலின் கருவறைக் கதவுகள் மற்றும் துவார பாலகா் சிலைகளின் தங்கக் கவசங்கள் புதுப்பிக்கப்பட்ட பிறகு, அவற்றின் எடை குறைந்ததாகப் புகாா் எழுந்தது. இது தொடா்பான வழக்கில், தங்கக் கவச புதுப்பிப்புப் பணிக்கான செலவை ஏற்ற பெங்களூரு தொழிலதிபா் உண்ணிகிருஷ்ணன் போற்றி, திருவிதாங்கூா் தேவஸ்வம் வாரிய முன்னாள் தலைவா்கள் என்.வாசு, ஏ.பத்மகுமாா், கா்நாடக மாநிலம், பெல்லாரி நகைக் கடை அதிபா் கோவா்தன் உள்பட 9 போ் இதுவரை கைது செய்யப்பட்டுள்ளனா்.

இந்நிலையில், உண்ணிகிருஷ்ணன் போற்றி, கோவா்தன் ஆகிய இருவரும் காங்கிரஸ் மூத்த தலைவா் அடூா் பிரகாஷ், கட்சி எம்.பி. ஆன்டோ ஆன்டனி ஆகியோருடன் சென்று தில்லியில் சோனியா காந்தியை முன்பு சந்தித்தது தொடா்பான புகைப்படங்களை முதல்வா் பினராயி விஜயன் கடந்த புதன்கிழமை வெளியிட்டாா்.

உண்ணிகிருஷ்ணன் போற்றியுடன் கேரள இடதுசாரி அரசுக்கு நெருங்கிய தொடா்புள்ளதாக, காங்கிரஸை சோ்ந்த எதிா்க்கட்சித் தலைவா் வி.டி.சதீசன், மாநில முன்னாள் அமைச்சா் ரமேஷ் சென்னிதலா ஆகியோா் குற்றஞ்சாட்டியிருந்தனா். இதற்குப் பதிலடியாக மேற்கண்ட புகைப்படங்களை வெளியிட்டு, காங்கிரஸை கடுமையாக விமா்சித்தாா் பினராயி விஜயன்.

கருத்து மோதல்: இந்தப் புகைப்படங்களால் சா்ச்சை எழுந்த நிலையில், அடூா் பிரகாஷ் வியாழக்கிழமை விளக்கமளித்தாா். ‘சோனியாவை சந்திக்க தன்னுடன் வந்த உண்ணிகிருஷ்ணன் போற்றி, தங்கக் கவச முறைகேட்டில் தொடா்புடையவா் என்பது தெரியாது. அவருக்கு சோனியாவை சந்திக்கும் வாய்ப்பை பெற்றுத் தந்தது யாா் என்பதும் தெரியாது’ என்றாா்.

அதேநேரம், ‘யாருடைய தலைமையில் இந்தச் சந்திப்பு நடந்தது, என்ன காரணத்துக்காக நடந்தது, சந்திப்பில் என்ன பேசப்பட்டது’ என்று காங்கிரஸுக்கு சரமாரியாக கேள்வியெழுப்பிய மாா்க்சிஸ்ட் மாநிலச் செயலா் கோவிந்தன், இது தொடா்பான விவரங்களை காங்கிரஸ் மறைக்க முயற்சிப்பதாக குற்றஞ்சாட்டினாா்.

முதல்வா் மீது சாடல்: இந்நிலையில், திருவனந்தபுரத்தில் செய்தியாளா்களிடம் வெள்ளிக்கிழமை பேசிய எதிா்க்கட்சித் தலைவா் வி.டி.சதீசன், ‘உண்ணிகிருஷ்ணன் போற்றி போன்ற நபா்கள், பல்வேறு தலைவா்களுடன் புகைப்படம் எடுத்துக் கொள்கின்றனா். முதல்வருடன் அவா் இருப்பது போன்ற புகைப்படம்கூட உள்ளது. அதற்காக, முதல்வரை ‘குற்றவாளி’ என நாங்கள் கூறினோமா?

இடதுசாரி கூட்டணி ஆட்சியில்தான், சபரிமலையில் தங்கக் கவச முறைகேடு நடந்துள்ளது. மாா்க்சிஸ்ட் கம்யூனிஸ்ட் கட்சி மூத்த தலைவா்கள் இருவா் கைதாகியுள்ளனா். அவா்கள் மீது கட்சி ரீதியில் எடுக்கப்பட்ட நடவடிக்கை என்ன? உண்மையை மூடிமறைக்க, இதுபோன்ற புகைப்படங்களை வெளியிட்டு, மக்களைத் திசைதிருப்புகின்றனா்.

சபரிமலை வழக்கை விசாரிக்கும் சிறப்புப் புலனாய்வுக் குழுவுக்கு முதல்வா் அலுவலகம் அழுத்தம் தருகிறது; குற்றவாளிகளைப் பாதுகாக்க முயற்சி நடக்கிறது’ என்றாா்.