வங்க மொழி பேசுவோா் மீதான தாக்குதல்களை தடுக்க வேண்டும்: பிரதமரைச் சந்தித்து காங்கிரஸ் தலைவா் சௌதரி வேண்டுகோள்

வங்க மொழி பேசுவோா் மீது பிற மாநிலங்களில், முக்கியமாக பாஜக ஆளும் மாநிலங்களில் நடத்தப்படும் தாக்குதல்களைத் தடுக்க நடவடிக்கை எடுக்க வேண்டும் என்று பிரதமா் நரேந்திர மோடியை காங்கிரஸ் மூத்த தலைவா் அதீா் ரஞ்சன் சௌதரி நேரில் சந்தித்து வேண்டுகோள் விடுத்தாா்.

வங்கதேசத்தில் சிறுபான்மையினரான ஹிந்துக்கள் மீது தாக்குதல்கள் அதிகரித்துவரும் நிலையில், எல்லை மாநிலங்களில் பதற்றம் அதிகரித்துள்ளது. வங்கதேசத்தில் இருந்து ஊடுருவியா்கள் எனக் கருதி மேற்கு வங்கத்தைச் சோ்ந்தவா்கள் மீது சில மாநிலங்களில் தாக்குதல் நிகழ்த்தப்பட்டுள்ளது.

முக்கியமாக, ஒடிஸாவில் கடந்த புதன்கிழமை மேற்கு வங்கத்தைச் சோ்ந்த புலம்பெயா் தொழிலாளி ஜுவல் ராணா என்பவருடன் உள்ளூரைச் சோ்ந்தவருக்கு சிறிய அளவில் ஏற்பட்ட வாக்குவாதம் ஜுவல் ராணாவின் கொலையில் முடிந்தது. மும்பையில் வங்கதேசத்தவா் என்ற சந்தேகத்தில் மேற்கு வங்க தொழிலாளா்கள் இருவா் கைது செய்யப்பட்டனா்.

பாஜக ஆளும் மாநிலங்களில் இருந்து கடந்த 10 மாதங்களில் 1,143 புகாா்கள் வந்துள்ளதாக மேற்கு வங்க சிறுபான்மையினா் நலவாரியம் கூறியுள்ளது.

இந்நிலையில், மேற்கு வங்க மாநில காங்கிரஸ் முன்னாள் தலைவா் அதீா் ரஞ்சன் சௌதரி இந்த விவகாரம் தொடா்பாக பிரதமா் நரேந்திர மோடியை நேரில் சந்தித்து கோரிக்கைகளை முன்வைத்தாா். வேண்டுகோள் கடிதம் ஒன்றையும் பிரதமரிடம் அவா் அளித்தாா். அதில், ‘வங்க மொழி பேசுகிறாா்கள் என்ற ஒரே காரணத்துக்காக பிற மாநிலங்களில் மேற்கு வங்கத் தொழிலாளா்கள் வன்முறையை எதிா்கொள்ள வேண்டியுள்ளது. அவா்கள் வங்கதேசத்தில் இருந்து ஊடுருவியவா்கள் எனக் கூறி தாக்குதல் நிகழ்த்தப்படுகிறது.

இதைத் தடுக்க பிரதமா் தலையிட வேண்டும். இந்த விஷயத்தில் கூடுதல் கவனம் செலுத்தி நடவடிக்கை எடுக்க வேண்டும் என்று அனைத்து மாநிலங்களுக்கும் அறிவுறுத்த வேண்டும். மேற்கு வங்கத்தில் வங்கதேசத்தை ஒட்டிய எல்லை மாவட்டங்களில் முஸ்லிம்கள் அதிகம் வசிக்கின்றனா். நாட்டின் பிற பகுதிகளில் வங்க மொழி பேசும் சிறுபான்மையினா் மீது தாக்குதல் நடக்கும்போது எல்லை மாவட்டங்களில் பதற்றம் அதிகரிக்கிறது’ என்று கடிதத்தில் அதீா் ரஞ்சன் சௌதரி தெரிவித்துள்ளாா்.