ராஜஸ்தான்: ஆழ்துளைக் கிணற்றிலிருந்து மீட்கப்பட்ட குழந்தை உயிரிழப்பு!

ராஜஸ்தானில் 150 அடி ஆழ்துளைக் கிணற்றுக்குள் தவறி விழுந்த 3 வயது குழந்தை உயிரிழந்துவிட்டதாக மருத்துவர்கள் தெரிவித்துள்ளனர்.

ராஜஸ்தானின் கோட்புட்லி - பெஹ்ரோர் மாவட்டத்திலுள்ள விளைநிலத்தில் கடந்த டிச.23 அன்று விளையாடிக் கொண்டிருந்த சேத்துனா என்ற 3 வயது பெண் குழந்தை அங்கு தோண்டப்பட்டிருந்த 150 அடி ஆழ்துளைக் கிணற்றுக்குள் தவறி விழுந்தது. ஆரம்பத்தில் கயிற்றால் கட்டப்பட்ட இரும்பு வளையத்தைப் பயன்படுத்தி சிறுமியை மீட்க முயற்சிக்கப்பட்டது. ஆனால் அந்த முயற்சி தோல்வியடைந்தது.

இதைத் தொடர்ந்து குழந்தை விழுந்த ஆழ்துளைக் கிணற்றுக்கு அருகிலேயே சுமார் 160 அடி ஆழத்திற்கு குழி தோண்டப்பட்டு குழந்தையை உயிருடன் மீட்க தீவிரமாக முயற்சிகள் மேற்கொள்ளப்பட்டு வந்தன.

நிலத்துக்கு கீழே கடினமான பாறைகளைத் துளைக்கும் சவாலான பணிகளை மேற்கொண்ட மீட்புப்படையினர், குழந்தையை மீட்கும் பணியில் இரவு பகல் பாராமல் கடந்த 10 நாள்களாக ஈடுபட்டிருந்தனர். இந்த மீட்புப்பணி 10-ஆவது நாளாக புதன்கிழமையும்(ஜன. 1) நீடித்தது.

இந்த நிலையில், அந்த குழந்தை ஆழ்துளைக் கிணற்றிலிருந்து இன்று(ஜன. 1) மாலை வெளியே மீட்கப்பட்டது. மீட்கப்பட்டவுடன் குழந்தையை மருத்துவச் சிகிச்சைக்காக உடனடியாக மருத்துவமனைக்கு அழைத்துச் செல்லப்பட்டது. இந்த நிலையில், குழந்தையை பரிசோதித்த மருத்துவர்கள் அந்த குழந்தை ஏற்கெனவே உயிரிழந்துவிட்டதாக தெரிவித்தனர்.

குழந்தையை வெளியே மீட்டுக் கொண்டு வரும் போதே, அதன் உடலில் எவ்வித அசைவுமில்லை என மீட்புக்குழு அதிகாரிகள் தெரிவித்துள்ளனர். குழந்தையின் உடல் பிரேதப் பரிசோதனை செய்யப்பட்டபின், அதன் பெற்றோரிடம் ஒப்படைக்கப்படும் என்று அதிகாரிகள் தெரிவித்துள்ளனர்.

ஆழ்துளைக் கிணற்றிலிருந்து புத்தாண்டு நாளில் குழந்தை மீட்கப்பட்ட தகவல் ஆறுதலைத் தந்திருந்த நிலையில், அந்த குழந்தை உயிரிழந்திருப்பது அப்பகுதியில் பெரும் சோகத்தை ஏற்படுத்தியுள்ளது.