கொல்கத்தா பெண் மருத்துவா் பாலியல் கொலை: குற்றவாளிக்கு மரண தண்டனை கோரிய மனுக்களை ஏற்பதில் உத்தரவு ஒத்திவைப்பு

கொல்கத்தா ஆா்.ஜி.கா் அரசு மருத்துவமனை மருத்துவக் கல்லூரியில் முதுநிலை பெண் பயிற்சி மருத்துவா் பாலியல் கொலை செய்யப்பட்ட சம்பவத்தில், குற்றவாளி சஞ்சய் ராய்க்கு மரண தண்டனை வழங்கக்கோரி சிபிஐ மற்றும் மேற்கு வங்க அரசு தனித்தனியே கொல்கத்தா உயா்நீதிமன்றத்தில் மேல்முறையீடு மனுக்களை தாக்கல் செய்தன.

இந்த மனுக்களை விசாரணை ஏற்றுக்கொள்வது தொடா்பான உத்தரவை கொல்கத்தா உயா்நீதிமன்றம் ஒத்திவைத்தது. முன்னதாக, இச்சம்பவத்தில் காவல் துறையுடன் இணைந்து தன்னாா்வலராக பணியாற்றிய சஞ்சய் ராயை குற்றவாளி என அறிவித்த சியால்டா நீதிமன்றம் அவருக்கு வாழ்நாள் ஆயுள் தண்டனை விதித்து உத்தரவிட்டது.

குற்றவாளிக்கு வழங்கப்பட்ட தண்டனை போதுமானதாக இல்லை எனக்கூறி இந்த வழக்கை விசாரித்த சிபிஐ மற்றும் மேற்கு வங்க அரசு சியால்டா நீதிமன்ற உத்தரவை எதிா்த்து கொல்கத்தா உயா்நீதிமன்றத்தில் மேல்முறையீடு செய்தது.

சிபிஐக்கே அதிகாரம்: இந்த மனுக்கள் மீது கொல்கத்தா உயா்நீதிமன்ற நீதிபதி தேபாங்சு பசாக் தலைமையிலான அமா்வு விசாரணை நடத்தியது. அப்போது சிபிஐ சாா்பில் ஆஜரான கூடுதல் சொலிசிட்டா் ஜெனரல் எஸ்.வி.ராஜு கூறியதாவது: முதுநிலை பெண் பயிற்சி மருத்துவா் கொலை வழக்கை சிபிஐயிடம் கொல்கத்தா உயா்நீதிமன்றம் ஒப்படைத்தது. அதன்பிறகு இந்த வழக்கில் சிபிஐ எஃப்ஐஆா் பதிவுசெய்தது. உயா்நீதிமன்ற உத்தரவை ஏற்று இந்த வழக்கு தொடா்பான ஆவணங்ளை மாநில காவல் துறை சிபிஐயிடம் ஒப்படைத்தது. சியால்டா நீதிமன்றத்தில் கடந்தாண்டு அக்டோபா் 7-ஆம் தேதி சிபிஐ குற்றப்பத்திரிகை தாக்கல் செய்தது. குற்றவாளி சஞ்சய் ராய் இக்குற்றத்தில் ஈடுபட்டதற்கான ஆதாரங்களை சிபிஐ நவம்பா் 4-ஆம் தேதி சமா்ப்பித்தது.

மாநில அரசுக்கு அதிகாரமில்லை: இந்த வழக்கு தொடா்பாக சியால்டா நீதிமன்றத்தில் விசாரணை நடைபெற்று வந்தபோது மாநில அரசு பங்கேற்கவில்லை. கடந்த 18-ஆம் தேதி சஞ்சய் ராயை குற்றவாளியாக அறிவித்த நீதிமன்றம், 20-ஆம் தேதி அவருக்கு வாழ்நாள் ஆயுள் தண்டனை வழங்கி உத்தரவிட்டது.

அதன்பின்பு திடீரென குற்றவாளிக்கு மரண தண்டனை விதிக்கக்கோரி மாநில அரசு மனுதாக்கல் செய்வதை அனுமதிக்க முடியாது. மாநில அரசுக்கு இந்த விவகாரத்தில் எவ்வித அங்கீகாரம் இல்லை என்றாா்.

அப்போது, வழக்கை சிபிஐ விசாரித்தாலும் குற்றவாளிக்கு வழங்கப்பட்ட தண்டனையை அதிகரிக்கக் கோரும் மாநில அரசின் மனுவை ஏற்றுக்கொள்ள வேண்டும் என மாநில அரசின் தலைமை வழக்குரைஞா் கிஷோா் தத்தா தெரிவித்தாா்.

எதிா்ப்பில்லை

சிபிஐ மற்றும் மேற்கு வங்க மாநில அரசு தாக்கல் செய்துள்ள மேல்முறையீட்டு மனுக்கள் மீது உயிரிழந்த பெண் மருத்துவரின் பெற்றோா் மற்றும் குற்றவாளியின் தரப்பு வழக்குரைஞா் எவ்வித எதிா்ப்பும் தெரிவிக்கவில்லை.

இதையடுத்து, நீதிபதி தேபாங்சு பசாக் கூறுகையில், ‘ சிபிஐ சமா்ப்பித்த ஆதாரங்களின்படி குற்றவாளிக்கு சியால்டா நீதிமன்றம் ஆயுள் தண்டனை வழங்கியுள்ளது. இது போதுமானதாக இல்லை என மாநில அரசு கூறுகிறது. அப்படியானால், போதைப்பொருள் கட்டுப்பாட்டு ஆணையம் (என்சிபி) அல்லது ரயில்வே பாதுகாப்புப் படை (ஆரிஎஃப்) ஆகிய மத்திய அமைப்புகள் சாா்பில் சமா்ப்பிக்கப்படும் ஆதாரங்களின்படி குற்றவாளிகளாக அறிவிக்கப்படுவோருக்கு தண்டனை போதுமானதாக இல்லை என மாநில அரசு தலையிடாதது ஏன்?

பெண் மருத்துவா் பாலியல் கொலை வழக்கில் சிபிஐ விசாரணைக்கு உயா்நீதிமன்றமே உத்தரவிட்டது’ என தெரிவித்தாா். இதைத்தொடா்ந்து, சிபிஐ மற்றும் மேற்கு வங்க அரசு தாக்கல் செய்யப்பட்ட மேல்முறையீட்டு மனுக்களை ஏற்பது தொடா்பான உத்தரவை கொல்கத்தா உயா்நீதிமன்றம் ஒத்திவைத்தது.