சிலருக்கு ‘முதலில் மோடி, பிறகே நாடு’: சசி தரூா் மீது காா்கே விமா்சனம்

சிலருக்கு ‘முதலில் மோடி, பிறகே நாடு’ என்று காங்கிரஸ் எம்.பி. சசி தரூரை அக்கட்சித் தலைவா் மல்லிகாா்ஜுன காா்கே புதன்கிழமை விமா்சித்தாா்.

பாகிஸ்தானுக்கு எதிரான இந்தியாவின் ‘ஆபரேஷன் சிந்தூா்’ நடவடிக்கை குறித்து ஆங்கில நாளிதழ் ஒன்றில், அண்மையில் சசி தரூா் கட்டுரை எழுதினாா். அதில் , ‘பிரதமா் மோடியின் ஆற்றல், சுறுசுறுப்பான இயக்கம், செயலாற்றத் தயாராக இருப்பது ஆகியவை உலக அரங்கில் இந்தியாவின் முதன்மையான சொத்தாக உள்ளது’ என்று பாராட்டினாா்.

இது அவா் மீது காங்கிரஸ் கட்சியில் அதிருப்தியை ஏற்படுத்தி, கட்சித் தலைமையுடனான அவரின் உறவில் மேலும் விரிசலை ஏற்படுத்தக் கூடும் என்று கருதப்படுகிறது.

இதுதொடா்பாக புது தில்லியில் காங்கிரஸ் தலைவா் மல்லிகாா்ஜுன காா்கே செய்தியாளா்களிடம் புதன்கிழமை கூறுகையில், ‘என்னால் ஆங்கிலத்தில் நன்றாக வாசிக்க முடியாது. ஆனால் சசி தரூருக்கு மிக நன்றாக ஆங்கிலம் தெரியும். இதன் காரணமாகவே அவா் காங்கிரஸ் செயற்குழு உறுப்பினராக்கப்பட்டாா்.

ஆபரேஷன் சிந்தூா் நடவடிக்கையில் ராணுவத்துக்கு துணை நிற்பதாக எதிா்க்கட்சிகள் ஒன்றாக தெரிவித்தன. அப்போது பிற விஷயங்களைவிட நாடே மிகவும் முக்கியமானது என்றும், மத்திய அரசுடன் இணைந்து பணியாற்றுவோம் என்றும் காங்கிரஸ் தெரிவித்தது.

‘முதலில் நாடு, பிறகே கட்சி’ என்று காங்கிரஸ் தெரிவித்தது. ஆனால் ‘முதலில் மோடி, பிறகே நாடு’ என்று சிலா் கூறுகின்றனா். இதை என்ன செய்வது?

தனது சொந்த விருப்பத்தின்பேரில் சசி தரூா் பேசி வருகிறாா். நாட்டை எப்படி காப்பாற்றவது என்பதில் காங்கிரஸ் மிகுந்த கவலை கொண்டுள்ளதால், அவரின் கருத்துகள் குறித்து அலுக்கும் வரை தொடா்ந்து பேச காங்கிரஸ் விரும்பவில்லை’ என்றாா்.

சசி தரூா் பதிலடி

காங்கிரஸ் தலைவா் காா்கே தெரிவித்த கருத்துக்கு சசி தரூா் ‘எக்ஸ்’ தளத்தில் வெளியிட்ட பதிவில், ‘சிறகுகள் உள்ளபோது பறக்க யாரிடமும் அனுமதி கேட்கத் தேவையில்லை. வானம் யாருக்கும் சொந்தமல்ல’ என்று தெரிவித்தாா்.