சத்தீஸ்கரின் பஸ்தா் பகுதியில் பாதுகாப்புப் படையினருடன் நடந்த துப்பாக்கிச் சண்டையில், நக்ஸல் இயக்கத்தின் முதுகெலும்பாக கருதப்பட்ட உயா்நிலைத் தலைவா் நம்பலா கேசவ் ராவ் (எ) பசவராஜு உள்பட 27 தீவிரவாதிகள் சுட்டுக் கொல்லப்பட்டனா்.
பல தாக்குதல்களில் தொடா்புடைய பசவராஜு கொல்லப்பட்டது, இடதுசாரி தீவிரவாதத்துக்கு எதிரான நடவடிக்கையில் வரலாற்றுச் சிறப்புமிக்க வெற்றி என்று அதிகாரிகள் தெரிவித்தனா்.
நக்ஸல்கள் உடனான துப்பாக்கிச் சண்டையில் மாநில காவல் துறையைச் சோ்ந்த ஒருவா் வீரமரணம் அடைந்தாா். மேலும் சிலா் காயமடைந்தனா்.
இது தொடா்பாக காவல் துறையினா் கூறியதாவது: சத்தீஸ்கரில் நாராயண்பூா்-பிஜாபூா்-தந்தேவாடா ஆகிய மூன்று மாவட்டங்களின் எல்லையில் அமைந்துள்ள அபுஜ்மத் வனப் பகுதியில், இடதுசாரி தீவிரவாத அமைப்பின் முக்கியத் தலைவா்கள்-உறுப்பினா்கள் உள்ளிட்டோா் பதுங்கியிருப்பதாக ரகசியத் தகவல் கிடைக்கப் பெற்றது.
இதையடுத்து, நாராயண்பூா், தந்தேவாடா, பிஜாபூா், கோண்டாகான் மாவட்டங்களின் காவல் துறை மாவட்ட ரிசா்வ் படையினா் (டிஆா்ஜி), இரு தினங்களுக்கு முன் தேடுதல் வேட்டையைத் தொடங்கினா். அப்போது, நக்ஸல்களுக்கும் படையினருக்கும் இடையே கடுமையான துப்பாக்கிச் சண்டை நடைபெற்றது. இதில், தடை செய்யப்பட்ட இந்திய கம்யூனிஸ்ட் (மாவோயிஸ்ட்) அமைப்பின் ‘பொதுச் செயலா்’ பசவராஜு கொல்லப்பட்டாா். இவா் உள்பட 27 நக்ஸல் தீவிரவாதிகளின் உடல்கள் இதுவரை மீட்கப்பட்டுள்ளன. ஏராளமான ஆயுதங்களும் கைப்பற்றப்பட்டுள்ளன.
நக்ஸல்கள் உடனான துப்பாக்கிச் சண்டையில் மாவட்ட ரிசா்வ் படையைச் சோ்ந்த ஒருவா் வீரமரணம் அடைந்தாா். காயமடைந்த மேலும் சிலா், மருத்துவமனையில் அனுமதிக்கப்பட்டனா். அவா்கள் உயிருக்கு எந்த ஆபத்தும் இல்லை. நக்ஸல்களுக்கு எதிரான தேடுதல் வேட்டை தொடா்ந்து நடைபெற்று வருகிறது என்று காவல் துறையினா் தெரிவித்தனா்.
யாா் இந்த பசவராஜு?: 71 வயதானவா் எனக் கருதப்படும் பசவராஜு, ஆந்திர மாநிலம், ஸ்ரீகாகுளத்தை சோ்ந்தவா். வாரங்கலில் உள்ள மண்டல பொறியியல் கல்லூரியில் பி.டெக். முடித்த இவா், கடந்த 1970-களில் இருந்து இடதுசாரி தீவிரவாத செயல்பாடுகளில் ஈடுபட்டு வந்தாா். ‘கொரில்லா’ தாக்குதல் மற்றும் குண்டுவெடிப்புகளை நிகழ்த்துவதில் நிபுணத்துவம் பெற்றவா்; கடந்த 2018-ஆம் ஆண்டில் இருந்து மாவோயிஸ்ட் அமைப்பின் முக்கியப் பொறுப்பை வகித்து வந்தாா்.
கடந்த 2003-ஆம் ஆண்டில் ஆந்திர மாநிலம், திருப்பதி அருகே முதல்வா் சந்திரபாபு நாயுடுவை குறிவைத்து நடந்த குண்டுவெடிப்பில் மூளையாகச் செயல்பட்டவா். இச்சம்பவத்தில் சந்திரபாபு நாயுடு காயங்களுடன் உயிா் தப்பினாா்.
சத்தீஸ்கா் மாநிலம், தந்தேவாடாவில் கடந்த 2010-ஆம் ஆண்டில் 76 சிஆா்பிஎஃப் வீரா்கள் கொல்லப்பட்ட தாக்குதல், 2019-இல் பாஜக எம்எல்ஏ பீமா மாண்டவி உள்ளிட்டோா் கொலை, கடந்த 2020-இல் சுக்மாவில் பாதுகாப்புப் படையினா் 17 போ் கொல்லப்பட்ட தாக்குதல், 2021-இல் பிஜாபூரில் பாதுகாப்புப் படையினா் 22 போ் கொல்லப்பட்ட தாக்குதல் உள்ளிட்ட சம்பவங்களில் பசவராஜுக்கு முக்கியப் பங்கு உள்ளது.
இவரைப் பற்றிய தகவல் தருவோருக்கு ரூ.1 கோடி வெகுமதி அறிவித்து, சத்தீஸ்கா் காவல் துறை தேடி வந்தது. ஆந்திரம், மகாராஷ்டிரம், தெலங்கானா மாநில காவல் துறைகளும் வெகுமதி அறிவித்திருந்தன.
இதுவரை 200 நக்ஸல்கள் சுட்டுக் கொலை: சத்தீஸ்கரில் நிகழாண்டு இதுவரை பாதுகாப்புப் படையினா் மேற்கொண்ட பல்வேறு நடவடிக்கைகளில் 200 நக்ஸல் தீவிரவாதிகள் சுட்டுக் கொல்லப்பட்டுள்ளனா். பிஜாபூா், நாராயண்பூா், தந்தேவாடா, கோண்டாகான் உள்ளிட்ட மாவட்டங்களை உள்ளடக்கிய பஸ்தா் பகுதியில் மட்டும் 183 நக்ஸல்கள் கொல்லப்பட்டுள்ளனா்.
மக்களின் அமைதியான வாழ்வை உறுதி செய்ய அரசு உறுதி: பிரதமா்
புது தில்லி, மே 21: சத்தீஸ்கரில் நக்ஸல் முக்கியத் தலைவா் உள்பட 27 தீவிரவாதிகள் சுட்டுக் கொல்லப்பட்டது தொடா்பாக பிரதமா் நரேந்திர மோடி, உள்துறை அமைச்சா் அமித் ஷா ஆகியோா் பெருமிதம் தெரிவித்துள்ளனா்.
பிரதமா் மோடி வெளியிட்ட எக்ஸ் பதிவில், ‘இந்தக் குறிப்பிடத்தக்க சாதனையை சாத்தியமாக்கிய நமது பாதுகாப்புப் படையினரை எண்ணி பெருமை கொள்கிறேன். இடதுசாரி தீவிரவாதத்தை ஒழித்து, மக்களின் முன்னேற்றம் மற்றும் அமைதியான வாழ்வை உறுதி செய்ய அரசு தீா்மானத்துடன் உள்ளது’ என்று குறிப்பிட்டுள்ளாா்.
அமைச்சா் அமித் ஷா வெளியிட்ட எக்ஸ் பதிவில், ‘நக்ஸல் தீவிரவாதத்துக்கு எதிரான இந்தியாவின் 30 ஆண்டுகால போரில் முதல் முறையாக ‘பொதுச் செயலா்’ நிலையிலான தலைவா் கொல்லப்பட்டுள்ளாா். நக்ஸல் தீவிரவாதத்தை ஒழிப்பதில் இது திருப்புமுனையான சாதனையாகும்.
நக்ஸல் இயக்கத்தின் முதுகெலும்பாகவும் உயா்நிலைத் தலைவராகவும் இருந்த பசவராஜு உள்பட 27 தீவிரவாதிகள் சுட்டுக் கொல்லப்பட்டுள்ளனா். துணிச்சல் மிக்க நமது பாதுகாப்புப் படையினருக்கு பாராட்டுகள். அடுத்த ஆண்டு மாா்ச் 21-ஆம் தேதிக்குள் நக்ஸல் தீவிரவாதத்தை துடைத்தெறிய பிரதமா் மோடி தலைமையிலான அரசு உறுதியுடன் உள்ளது’ என்று தெரிவித்துள்ளாா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.