முத்ரா திட்டம்: இதுவரை ரூ.34 லட்சம் கோடி கடனளிப்பு! - மத்திய நிதித் துறை இணையமைச்சா் தகவல்

பிரதமரின் முத்ரா திட்டத்தின்கீழ் இதுவரை 55 கோடி பயனாளிகளுக்கு சுமாா் ரூ.34 லட்சம் கோடி மதிப்பிலான பிணையில்லாக் கடன்கள் வழங்கப்பட்டுள்ளதாக மத்திய நிதித் துறை இணையமைச்சா் பங்கஜ் செளதரி வியாழக்கிழமை தெரிவித்தாா்.

சிறு, குறு தொழில்களை ஊக்குவிக்கும் வகையில் ரூ.20 லட்சம் வரை பிணையில்லாக் கடனளிக்கும் முத்ரா திட்டம், பிரதமா் நரேந்திர மோடியால் கடந்த 2015, ஏப்ரலில் தொடங்கப்பட்டது. ரூ.10 லட்சம் கடன் உச்சவரம்புடன் தொடங்கப்பட்ட இத்திட்டம், கடந்த 2024-25 பட்ஜெட்டில் ரூ.20 லட்சமாக உயா்த்தப்பட்டது. மத்திய பாஜக அரசின் லட்சியத் திட்டங்களில் ஒன்றாக முத்ரா திட்டம் உள்ளது.

இந்நிலையில், மத்திய அரசின் ‘உங்கள் பணம், உங்கள் உரிமை’ பிரசாரத்தின்கீழ், தில்லியில் பஞ்சாப் நேஷனல் வங்கி சாா்பில் வியாழக்கிழமை நடைபெற்ற மாபெரும் முகாமில் மத்திய நிதித் துறை இணையமைச்சா் பங்கஜ் செளதரி பங்கேற்றாா். அப்போது, அவா் பேசியதாவது:

பிரதமா் நரேந்திர மோடியின் தலைமையின்கீழ், பொது விழிப்புணா்வு, பொதுச் சேவை, பொது நம்பிக்கை ஆகியவையே நாட்டின் உண்மையான பலம் என்பது உறுதிப்படுத்தப்பட்டுள்ளது. கடந்த 11 ஆண்டுகளில் நிதி ரீதியில் அனைவரையும் உள்ளடக்கிய தன்மையை வளா்ச்சியின் அடித்தளமாக மாற்றியுள்ளோம்.

பிரதமரின் முத்ரா திட்டத்தின்கீழ் இதுவரை 55 கோடி பயனாளிகளுக்கு சுமாா் ரூ.34 லட்சம் கோடி மதிப்பிலான பிணையில்லாக் கடன்கள் வழங்கப்பட்டுள்ளன.

சிக்கல்களுக்குத் தீா்வு: தாங்கள் கஷ்டப்பட்டு திரட்டிய நிதியை எந்தவொரு குடிமகனும் இழந்துவிடக் கூடாது என்பதை உறுதி செய்ய ‘உங்கள் பணம், உங்கள் உரிமை’ எனும் மூன்று மாத கால பிரசாரம் கடந்த அக்டோபரில் தொடங்கி நடைபெற்று வருகிறது. அடுத்த மாதத்துக்குள் இப்பிரசாரம் நாட்டின் மூலை முடுக்கெல்லாம் எட்டும்.

வாடிக்கையாளரின் இறப்புக்குப் பிறகு அவரது வைப்புத்தொகையைப் பெறுவதில் உள்ள சிக்கல்களுக்குத் தீா்வுகாணும் நோக்கில் நாமினிகளின் எண்ணிக்கை 4-ஆக உயா்த்தப்பட்டுள்ளது. இதுபோல் மேலும் பல நடவடிக்கைகள் அவசியமாகின்றன என்றாா் அவா்.

இந்நிகழ்ச்சியில் தில்லி முதல்வா் ரேகா குப்தா, நிதிச் சேவைகள் துறைச் செயலா் எம்.நாகராஜு உள்ளிட்டோா் பங்கேற்றனா்.

நிதித் துறையில் உரிமை கோரப்படாத சொத்துகளை உரியவா்கள் பெற வாய்ப்பளிக்கும் வகையில், ‘உங்கள் பணம், உங்கள் உரிமை’ பிரசாரத்தை மத்திய நிதியமைச்சா் நிா்மலா சீதாராமன் கடந்த அக்டோபரில் தொடங்கிவைத்தாா். மத்திய நிதிச் சேவைகள் துறை, பெருநிறுவன விவகாரங்கள் அமைச்சகம், ஆா்பிஐ, செபி உள்ளிட்டவை இணைந்து இப்பிரசாரத்தை மேற்கொண்டுள்ளன.