மேற்கு வங்கம்: பாஜக எம்.பி., எம்எல்ஏ மீது கல்வீசி தாக்குதல்: ரத்தக் காயங்களுடன் மீட்பு

கொல்கத்தா: மேற்கு வங்கத்தின் ஜல்பைகுரி மாவட்டத்தில் வெள்ள பாதிப்பை பாா்வையிடுவதற்காகச் சென்ற பாஜக எம்.பி. ககன் முா்மு, பாஜக எம்எல்ஏ சங்கா் கோஷ் ஆகியோரை ஒரு கும்பல் சூழ்ந்து கொண்டு சரமாரியாக கற்களை வீசித் தாக்கியது. இதில் எம்.பி. ககன் முா்மு மண்டை உடைந்து ரத்தம் கொட்டியது.

படுகாயத்துடன் உயிா்தப்பிய அவா் மருத்துவமனையில் அனுமதிக்கப்பட்டாா். உடன் சென்ற பாஜக எம்எல்ஏ-வும் தாக்குதலில் காயமடைந்தாா்.

இது தொடா்பாக எம்எல்ஏ சங்கா் கோஷ் கூறியதாவது: நாகரகாட்டா பகுதி வெள்ள பாதிப்புகளை ஆய்வு செய்ய எம்.பி. ககன் முா்மு தலைமையில் பாஜக குழுவினா் சென்றோம். அப்போது ஓரிடத்தில் சிலா் கும்பலாக வழிமறித்து தாக்குதல் நடத்தினா். எங்கள் மீது கற்களை வீசியதுடன், அடித்து உதைத்தும் அந்தக் கும்பல் காயப்படுத்தியது. அதில் முா்முவின் மண்டை உடைந்து ரத்தம் கொட்டியது.

காயமடைந்த அவரை மீட்டு மருத்துவமனைக்கு அழைத்துச் செல்ல முற்பட்டோம். அதற்கு முன்பு அந்தக் கும்பல் நாங்கள் சென்ற காா்களின் கண்ணாடிகளையும் அடித்து உடைத்துவிட்டது. எனினும், அந்த வாகனத்திலேயே நாங்கள் அங்கிருந்து தப்பி வந்தோம்.

காயமடைந்த ககன் முா்முக்கு உள்ளூா் மருத்துவமனையில் முதலுதவி சிகிச்சை அளிக்கப்பட்டது. பின்னா், அவா் சிலிகுரி மருத்துவமனைக்கு அனுப்பிவைக்கப்பட்டாா் என்றாா்.

இந்தத் தாக்குதல் தொடா்பான விடியோ பதிவுகள் செய்தி தொலைக்காட்சி சேனல்களில் வெளியாகியுள்ளன. அதில், தாக்குதல் நடத்திய கும்பல் முதல்வா் மம்தாவைப் புகழ்ந்து முழக்கமிடுவது, கற்களை வீசுவது உள்ளிட்ட காட்சிகள் இடம் பெற்றுள்ளன.

திரிணமூல் மீது குற்றச்சாட்டு: பாஜக தகவல் தொழில்நுட்பப் பிரிவு தேசியப் பொறுப்பாளா் அமித் மாளவியா கூறுகையில், ‘மேற்கு வங்கத்தில் ஆளும் திரிணமூல் காங்கிரஸ் கட்சியைச் சோ்ந்த ரௌடிகளால் ககன் முா்மு உள்ளிட்டோா் குறிவைக்கப்பட்டனா். மழையால் பாதிக்கப்பட்ட மக்களுக்கு ஆறுதல் கூறி நிவாரணம் வழங்கச் சென்றவா்களை கண்மூடித்தனமாகத் தாக்கினா். மேற்கு வங்கத்தில் எந்த அளவுக்கு கொடூரமான ஆட்சி நடைபெறுகிறது என்பதற்கு இது உதாரணம். காவல் துறையினா் முன்னிலையில் இந்தத் தாக்குதல் சம்பவம் நிகழ்ந்தது’ என்றாா்.

மம்தா வேண்டுகோள்: முதல்வா் மம்தா பானா்ஜி இந்த சம்பவத்தைக் குறிப்பிடாமல் வெளியிட்டுள்ள ‘எக்ஸ்’ பதிவில், ‘மழை, வெள்ளத்தால் பலரும் கடுமையாகப் பாதிக்கப்பட்டுள்ள இந்தக் கடுமையான காலகட்டத்தில் அனைவரும் ஒற்றுமையாகவும், பொறுமையாகவும் இருக்க வேண்டும். பொதுமக்கள் தேவையற்ற எந்த நிகழ்வுக்கும் இடம் கொடுக்கக் கூடாது’ என்று கூறியுள்ளாா்.

வன்முறையை ஆதரிப்பதில்லை: திரிணமூல் மூத்த தலைவரும் அமைச்சருமான உதயன் குகா இது தொடா்பாக கூறுகையில், ‘எங்கள் கட்சி ஒருபோதும் வன்முறையை ஆதரிப்பதில்லை. இப்போதைய நிகழ்வு பாஜக தனக்குத்தானே தேடிக் கொண்டதுதான். மக்கள் பாதிக்கப்பட்ட நேரத்தில் பாஜகவினா் 10-க்கும் மேற்பட்ட காா்களில் ஊா்வலம் போல சென்றுள்ளனா். நிவாரணப் பொருள்கள் ஏதும் வழங்காமல் விளம்பரத்துக்காக புகைப்படங்கள் எடுத்துள்ளனா். இதற்கு உள்ளூா் மக்கள் கடும் எதிா்ப்புத் தெரிவித்துள்ளனா். பாஜக தனது செயல்களுக்கான பலன்களை அனுபவித்து வருகிறது’ என்றாா்.