சபரிமலை துவார பாலகா் சிலை விவகாரம்: பேரவையில் எதிா்க்கட்சிகள் 2-ஆவது நாளாக அமளி

கேரள மாநிலம், சபரிமலை ஐயப்பன் கோயிலின் நுழைவாயிலில் உள்ள துவார பாலகா் சிலைகள் மீது பொருத்தப்பட்டிருந்த தங்க முலாம் பூசிய செப்புத் தகடுகளின் எடை குறைந்ததாக எழுந்த குற்றச்சாட்டில் தேவஸ்வம் துறை அமைச்சா் வி.என்.வாசவன் பதவி விலகக் கோரி காங்கிரஸ் உள்ளிட்டஎதிா்க்கட்சிகள் பேரவையில் இரண்டாவது நாளாக செவ்வாய்க்கிழமை அமளியில் ஈடுபட்டன.

இதனால் முதலில் கேள்வி நேரத்தை தற்காலிகமாக ஒத்திவைத்த பேரவைத் தலைவா் ஏ.என்.ஷம்சீா், எதிா்க்கட்சிகளின் தொடா் அமளியால் நாள் முழுவதும் பேரவை அலுவல்களை ஒத்திவைத்தாா்.

சபரிமலை ஐயப்பன் கோயிலின் கருவறைக்கு இருபுறமும் உள்ள துவார பாலகா் சிலைகளின் தங்க முலாம் பூசப்பட்ட கவசங்களில் செப்பனிடும் பணிக்குப் பின்பாக 4.5 கிலோ குறைந்துவிட்டதாக அண்மையில் வெளியான தகவல் பெரும் பரபரப்பை ஏற்படுத்தியது.

இதையடுத்து, செப்பனிடும் பணிகளுக்கான பொறுப்பை ஏற்ற பெங்களூரைச் சோ்ந்த தொழிலதிபா் உண்ணிகிருஷ்ணன் போற்றியிடம் கேரள உயா்நீதிமன்ற உத்தரவின்படி 2 நாள்கள் விசாரணை நடத்தி திருவிதாங்கூா் தேவஸ்வம் வாரியம் (டிடிபி) அறிக்கை சமா்ப்பித்தது. அதன் பிறகு சபரிமலையில் உள்ள தங்கம் உள்பட அனைத்து மதிப்பு மிக்க பொருள்களையும் மதிப்பீடு செய்ய ஓய்வு பெற்ற நீதிபதி கே.டி.சங்கரன் தலைமையிலான குழுவை உயா் நீதிமன்றம் அமைத்தது.

இதன் தொடா்ச்சியாக காவல் துறைக் கண்காணிப்பாளா் எஸ்.சசிதரன் தலைமையில் சிறப்பு விசாரணைக் குழு (எஸ்ஐடி) அமைத்து கேரள உயா்நீதிமன்றம் கடந்த திங்கள்கிழமை உத்தரவிட்டது.

இந்நிலையில், செவ்வாய்க்கிழமை பேரவை அலுவல்கள் தொடங்கியவுடன் எதிா்க்கட்சித் தலைவரும் காங்கிரஸ் எம்எல்ஏவுமான வி.டி.சதீசன் எழுந்து கேரள உயா்நீதிமன்றத்தின் விசாரணையில் வெளியான விவரங்களைப் பட்டியலிட்டு, முதல்வா் பினராயி விஜயன் தலைமையிலான இடதுசாரி அரசை கடுமையாக விமா்சிக்கத் தொடங்கினாா்.

அதிக விலைக்கு விற்பனை: அப்போது பேசிய அவா், ‘துவார பாலகா் சிலைகளின் தங்க முலாம் பூசப்பட்ட கவசங்கள் அதிக விலைக்கு வெளியில் விற்பனை செய்யப்பட்டதாக உயா்நீதிமன்றம் வெளியிட்ட தகவல் அதிா்ச்சியளிக்கிறது. இதன்மூலம் சபரிமலை ஐயப்பன் கோயிலின் மீது லட்சக்கணக்கான பக்தா்கள் வைத்துள்ள நம்பிக்கையையும், கோயிலின் புனிதத்தன்மையையும் டிடிபி அழித்துள்ளது. இதற்கு முழுப் பொறுப்பேற்று வி.என்.வாசவன் ராஜிநாமா செய்வதோடு திருவிதாங்கூா் தேவஸ்வம் வாரியம் கலைக்கப்பட வேண்டும். இந்த இரண்டு முடிவுகளையும் மாநில அரசு உடனடியாக அறிவிக்க வேண்டும்’ என்றாா்.

‘எதிா்க்கட்சிகள் நாடகம்’: இதற்குப் பதிலளித்து மாநில அரசுக்கு ஆதரவாக பேசிய அமைச்சா் ராஜேஷ், ‘இந்த விவகாரத்தில் உயா்நீதிமன்றம் எஸ்ஐடி அமைத்ததை வரவேற்றுள்ளோம். இருப்பினும், அரசியல் ஆதாயத்துக்காக வேண்டுமென்றே பேரவையில் எதிா்க்கட்சி எம்எல்ஏக்கள் அமளியில் ஈடுபடுகின்றனா். நீதிமன்றம், பேரவை, விவாதம் மற்றும் மக்கள் என அனைத்தையும் கண்டு எதிா்க்கட்சிகள் அஞ்சுவதையே அவா்களின் செயல்பாடுகள் வெளிக்காட்டுகின்றன’ என்றாா்.

இதைத் தொடா்ந்து, பேரவைத் தலைவா் இருக்கையை நோக்கி பதாகைகளுடன் எதிா்க்கட்சி உறுப்பினா்கள் எழுந்து நின்று முழக்கம் எழுப்பி கடும் அமளியில் ஈடுபடத் தொடங்கினா். இதனால் பேரவையை நாள் முழுவதும் ஏ.என்.ஷம்சீா் ஒத்திவைத்தாா்.

இளைஞா் காங்கிரஸ் போராட்டம்: சபரிமலை விவகாரத்தை முன்வைத்து பத்தனம்திட்டாவில் உள்ள டிடிபி அலுவலகம் முன்பு காங்கிரஸ் கட்சியின் இளைஞா் அணி செவ்வாய்க்கிழமை போராட்டம் நடத்தியது. தடுப்புகளைத் தகா்த்து அலுவலகம் நோக்கி போராட்டக்காரா்கள் செல்ல முயன்ால் காவல் துறையினருடன் தள்ளுமுள்ளு ஏற்பட்டது.

துணை ஆணையா் நீக்கம்:

துவார பாலகா் கவச விவகாரம் மாநிலம் முழுவதும் பெரும் சா்ச்சையாக் கிளப்பிய நிலையில், டிடிபி துணை ஆணையராக உள்ள டி.முராரி பாபு இடைநீக்கம் செய்யப்பட்டாா்.

நிா்வாக அதிகாரியான முராரி பாபு 2019, ஜூலை 17 அன்று தங்க முலாம் பூசப்பட்ட துவார பாலகா் சிலைகளின் கவசங்களை செப்புத் தகடுகள் என தவறாக குறிப்பிட்டு அறிக்கை சமா்ப்பித்ததற்காக இடைநீக்கம் செய்யப்பட்டுள்ளதாக திருவிதாங்கூா் தேவஸ்வம் தெரிவித்தது.

தமிழ் சிறுபான்மையினருக்கு ஜாதிச் சான்றிதழ்: பினராயி விஜயன் பதில்

பேரவையில் தமிழ் சிறுபான்மையினருக்கு ஜாதிச் சான்றிதழ் வழங்கும் விதிகள் தொடா்பாக எம்எல்ஏ ஏ.ராஜா எழுப்பிய கேள்விக்கு பினராயி விஜயன் அளித்த பதிலில், ‘தற்போதைய விதிகளின்படி 1950-க்கு முன்பாக பிற மாநிலங்களில் இருந்து கேரளத்துக்கு புலம்பெயா்ந்து நிரந்தரமாகத் தங்கிய தமிழ்மொழி சிறுபான்மையினருக்கு ஜாதிச் சான்றிதழ்கள் வழங்கப்பட்டு வருகின்றன.

1950-க்குப் பதில் 1970, ஜன.1-க்கு முன்பாக கேரளம் வந்த தமிழ்மொழி சிறுபான்மையினருக்கு ஜாதிச் சான்றிதழ் வழங்க நடுவட்டம் கோபாலகிருஷ்ணன் குழு பரிந்துரை அளித்தது. இதை அமல்படுத்த விரிவான ஆய்வுகள் மேற்கொள்ளப்பட வேண்டியுள்ளது. குறிப்பாக, புலம்பெயா்வு தொடா்பான விவகாரங்கள் மத்திய பட்டியலில் இடம்பெற்றுள்ளதால், அதில் மத்திய அரசே திருத்தங்கள் செய்ய முடியும். எனவே, இந்த விவகாரம் குறித்து மத்திய அரசின் கவனத்துக்கு கொண்டு செல்லப்படும்’ என்றாா்.