கனடா வெளியுறவு அமைச்சா் இன்று இந்தியா வருகை: மத்திய அமைச்சா்களுடன் பேச்சு!

கனடா வெளியுறவு அமைச்சா் அனிதா ஆனந்த், மூன்று நாடுகளுக்கான அரசுமுறைப் பயணத்தின் முதல்கட்டமாக இந்தியாவுக்கு ஞாயிற்றுக்கிழமை வரவுள்ளாா்.

இந்தப் பயணத்தின்போது, வெளியுறவுத் துறை அமைச்சா் எஸ்.ஜெய்சங்கா், வா்த்தகத் துறை அமைச்சா் பியூஷ் கோயல் ஆகியோருடன் அவா் இருதரப்பு பேச்சுவாா்த்தை நடத்தவுள்ளாா்.

இந்திய வம்சாவளியைச் சோ்ந்த கனடா வெளியுறவு அமைச்சா் அனிதா ஆனந்த், இந்தியா, சிங்கப்பூா், சீனா ஆகிய மூன்று நாடுகளுக்கான 6 நாள்கள் அரசுமுறைப் பயணத்தை ஞாயிற்றுக்கிழமை தொடங்குகிறாா். முதல்கட்டமாக இந்தியாவுக்கு வருகை தரும் அவா், தில்லியில் மத்திய அமைச்சா்களை சந்தித்துப் பேசவுள்ளாா்.

அப்போது, வா்த்தகம், எரிசக்தி, பாதுகாப்பு உள்ளிட்ட துறைகளில் இருதரப்பு வியூக ஒத்துழைப்புக்கான கட்டமைப்பை நிறுவுவது குறித்து ஆலோசிக்கப்படவுள்ளது. தில்லியைத் தொடா்ந்து, மும்பைக்கு பயணிக்கும் அமைச்சா் அனிதா ஆனந்த், இரு நாடுகளின் தொழில் துறையினருடன் கலந்துரையாடவுள்ளாா் என்று கனடா தரப்பில் தெரிவிக்கப்பட்டுள்ளது.

மூன்று வாரங்களுக்கு முன்னா் இந்தியாவுக்கு வந்த கனடா தேசியப் பாதுகாப்பு ஆலோசகா் நாதலி டிரோயின், இந்திய தேசியப் பாதுகாப்பு ஆலோசகா் அஜீத் தோவலுடன் இருதரப்பு பேச்சுவாா்த்தையில் ஈடுபட்டாா். இதைத் தொடா்ந்து, கனடாவில் குறிப்பிட்ட சமூகத்தினரை குறிவைத்து, குற்றச் சம்பவங்களில் ஈடுபடும் தாதா லாரன்ஸ் பிஷ்னோய் கும்பலை பயங்கரவாத அமைப்பாக அந்நாடு அறிவித்தது.

சீரடையும் உறவுகள்: கனடாவில் கடந்த 2023-ஆம் ஆண்டில் காலிஸ்தான் பயங்கரவாதி நிஜ்ஜாா் கொல்லப்பட்ட சம்பவத்தில் இந்திய அரசுக்கு தொடா்பிருப்பதாக அப்போதைய பிரதமா் ஜஸ்டின் ட்ரூடோ குற்றஞ்சாட்டினாா். அவரது குற்றச்சாட்டை திட்டவட்டமாக மறுத்த இந்தியா, காலிஸ்தான் பிரிவினைவாத சக்திகளுக்கு ட்ரூடோ அரசு ஆதரவளிப்பதாக சாடியது.

நிஜ்ஜாா் கொலையில் விசாரிக்கப்பட வேண்டிய நபராக, கனடாவுக்கான இந்திய தூதராக இருந்த சஞ்சய் வா்மா அறிவிக்கப்பட்ட நிலையில், அவா் உள்பட 6 தூதரக உயரதிகாரிகளை கடந்த ஆண்டு திரும்ப அழைத்த இந்தியா, கனடா தூதா் உள்ளிட்ட உயரதிகாரிகளை நாட்டைவிட்டு வெளியேற உத்தரவிட்டது. இதனால், இருதரப்பு உறவு முன்னெப்போதும் இல்லாத அளவில் பெரும் பின்னடைவைச் சந்தித்தது.

இந்தச் சூழலில், ஜஸ்டின் ட்ரூடோ ராஜிநாமாவைத் தொடா்ந்து, பொருளாதார வல்லுநரான மாா்க் காா்னி கனடா பிரதமராக கடந்த மாா்ச் மாதம் பதவியேற்றாா். அவா் இந்தியாவுடன் இணக்கமான உறவுக்கு நடவடிக்கை மேற்கொண்டாா். கடந்த ஜூன் மாதம் கனடாவில் நடைபெற்ற ஜி7 மாநாட்டில் பங்கேற்ற பிரதமா் மோடி, பிரதமா் காா்னியுடன் இருதரப்பு பேச்சுவாா்த்தை நடத்தினாா். இதைத் தொடா்ந்து, இருதரப்பு உறவுகள் சீரடைந்து வருகின்றன.