நாட்டின் பாதுகாப்பு உற்பத்தி மும்முடங்கு அதிகரிப்பு: பிரதமா் மோடி பெருமிதம்

பனாஜி: கடந்த 11 ஆண்டுகளில் நாட்டின் பாதுகாப்புத் துறை உற்பத்தி மதிப்பு மும்மடங்கு உயா்ந்து, ரூ.1.5 லட்சம் கோடியைக் கடந்துள்ளது என்று பிரதமா் நரேந்திர மோடி தெரிவித்தாா்.

உள்நாட்டில் தயாரிக்கப்பட்ட ‘ஐஎன்எஸ் விக்ராந்த்’ விமானந்தாங்கி போா்க் கப்பலில் கடற்படை வீரா்களுடன் திங்கள்கிழமை தீபாவளி கொண்டாட்ட நிகழ்ச்சியில் பங்கேற்றுப் பேசியபோது அவா் இவ்வாறு கூறினாா்.

கொச்சி கப்பல் கட்டும் தளத்தில் கட்டப்பட்ட மிகப் பெரிய விமானந்தாங்கி போா்க்கப்பலான ஐஎன்எஸ் விக்ராந்த், கடந்த 2022-இல் கடற்படையில் இணைக்கப்பட்டது. இது, உள்நாட்டில் கட்டப்பட்ட முதலாவது விமானந்தாங்கி போா்க் கப்பலாகும்.

கோவா - கா்வாா் (கா்நாடகம்) கடல் பகுதியில் இப்போா்க்கப்பலில் பிரதமா் மோடி திங்கள்கிழமை தீபாவளி கொண்டாட்டத்தில் பங்கேற்றாா். அப்போது, கடற்படை வீரா்கள் மத்தியில் அவா் ஆற்றிய உரை:

தீபாவளி பண்டிகையை மக்கள் பெரும்பாலும் தங்கள் குடும்பத்தினருடன் கொண்டாடவே விரும்புவா். நானும் எனது குடும்பத்தினருடன் தீபாவளியைக் கொண்டாட வந்துள்ளேன்.

ஐஎன்எஸ் விக்ராந்த் போா்க்கப்பல், ‘தற்சாா்பு இந்தியா’வின் சக்திவாய்ந்த அடையாளம். இக்கப்பலின் வல்லமையால், சில மாதங்களுக்கு முன் பாகிஸ்தான் தூக்கமிழந்து தவித்தது. நமது எதிரியின் துணிச்சலுக்கு முற்றுப்புள்ளி வைக்க ஐஎன்எஸ் விக்ராந்த் என்ற பெயா் மட்டுமே போதும்.

மண்டியிட்ட பாகிஸ்தான்: இந்திய கடற்படையால் விளைவிக்கப்பட்ட அச்சம், விமானப் படையால் வெளிப்படுத்தப்பட்ட அசாத்திய செயல்திறன், ராணுவத்தின் மகத்தான துணிச்சலுடன் முப்படைகளின் மிகச் சிறந்த ஒருங்கிணைப்பால் பாகிஸ்தான் உடனடியாக மண்டியிட்டது.

ஆபரேஷன் சிந்தூா் நடவடிக்கையின்போது, பிரமோஸ், ஆகாஷ் ஏவுகணைகள் வல்லமையை நிரூபித்தன. இப்போது பல்வேறு நாடுகளும் இந்த ஏவுகணைகளைக் கொள்முதல் செய்ய முனைந்துள்ளன. முன்பு இறக்குமதி செய்யப்பட்ட 1,000-க்கும் மேற்பட்ட உதிரி பாகங்கள் அடையாளம் காணப்பட்டு, தற்போது உள்நாட்டிலேயே தயாரிக்கப்படுகிறது. பெரும்பாலான முக்கியத் தளவாடங்கள் இப்போது சொந்த தயாரிப்புகளாக மாறியுள்ளன. கடந்த 11 ஆண்டுகளில் நாட்டின் பாதுகாப்புத் துறை உற்பத்தி மதிப்பு ரூ.1.5 லட்சம் கோடியைக் கடந்து, மும்மடங்கு உயா்ந்துள்ளது.

40 போா்க் கப்பல்கள்-நீா்மூழ்கிகள்: கடந்த 2014-இல் இருந்து இதுவரை 40-க்கும் மேற்பட்ட போா்க் கப்பல்கள் மற்றும் நீா்மூழ்கிகள், இந்திய கப்பல் கட்டும் தளங்களால் கட்டப்பட்டு, கடற்படையிடம் ஒப்படைக்கப்பட்டுள்ளன.

உலகின் முன்னணி பாதுகாப்புத் துறை ஏற்றுமதி நாடாக வேண்டும் என்பதே நமது இலக்கு, கடந்த 10 ஆண்டுகளில் பாதுகாப்பு ஏற்றுமதி 30 மடங்கு அதிகரித்துள்ளது என்றாா் அவா்.

கடந்த 2014-இல் இருந்து தீபாவளி பண்டிகையை ஆயுதப் படையினருடன் பிரதமா் மோடி கொண்டாடி வருகிறாா். தற்போதைய தீபாவளி கொண்டாட்ட நிகழ்வுகள் தொடா்பான புகைப்படங்கள், விடியோவை பிரதமா் எக்ஸ் தளத்தில் பகிா்ந்துள்ளாா்.

பெட்டிச் செய்தி....

ஐஎன்எஸ் விக்ராந்தில்

இரவைக் கழித்த பிரதமா்

ஞாயிற்றுக்கிழமை மாலையில் ஐஎன்எஸ் விக்ராந்த் போா்க் கப்பலுக்கு வருகை தந்த பிரதமா் மோடி, கப்பலின் மேற்பரப்பில் இருந்து மிக் 29 ரக போா் விமானங்கள் புறப்பட்டுச் செல்வதையும், தரையிறங்குவதையும் பாா்வையிட்டாா்.

இரவு முழுவதும் கப்பலில் தங்கியிருந்த அவா், மறுநாள் காலையில் யோகா அமா்வில் பங்கேற்றாா். போா்க் கப்பல்களின் கம்பீர அணிவகுப்பையும் பாா்வையிட்டாா். ஐஎன்எஸ் விக்ரமாதித்யா (மற்றொரு விமானந்தாங்கி கப்பல்), ஐஎன்எஸ் சூரத், ஐஎன்எஸ் மா்மகோவா, ஐஎன்எஸ் சென்னை, ஐஎன்எஸ் இம்பால், ஐஎன்எஸ் கொல்கத்தா, ஐஎன்எஸ் துஷில், ஐஎன்எஸ் தாபா், ஐஎன்எஸ் தேஜ், ஐஎன்எஸ் பெட்வா, ஐஎன்எஸ் தீபக், ஐஎன்எஸ் ஆதித்யா ஆகிய போா்க் கப்பல்கள் அணிவகுப்பில் பங்கேற்றன. சேத்தக், எம்ஹெச் 60ஆா், சீகிங், கமோவ் 31 ரக ஹெலிகாப்டா்களின் சாகசமும் நிகழ்த்தப்பட்டது.