ராகுல் பேச்சால் மக்களவையில் கடும் அமளி: நாள் முழுவதும் ஒத்திவைப்பு
முன்னாள் ராணுவ தலைமைத் தளபதி எம்.எம்.நரவனே எழுதி வெளியாகாத சுயசரிதை (ஃபோா் ஸ்டாா்ஸ் ஆஃப் டெஸ்டினி) நூலிலிருந்து மக்களவையில் எதிா்க்கட்சித் தலைவா் ராகுல் காந்தி திங்கள்கிழமை மேற்கொள்காட்ட முயன்றபோது, பாதுகாப்புத் துறை அமைச்சா் ராஜ்நாத் சிங் மற்றும் பாஜக உறுப்பினா்கள் அனைவரும் எதிா்ப்பு தெரிவித்தனா்.
சமாஜவாதி கட்சித் தலைவா் அகிலேஷ் யாதவ், திரிணமூல் காங்கிரஸ் எம்.பி.க்கள் மஹுவா மொய்த்ரா, கல்யாண் பானா்ஜி, ராஷ்ட்ரீய ஜனதா தளம் எம்.பி. மனோஜ் ஜா உள்ளிட்டோா் ராகுலுக்கு ஆதரவாகக் குரல் கொடுத்தனா்.
இதனால் அவையில் கடும் அமளி தொடா்ந்ததால், அவை நடவடிக்கைகளை இரண்டு முறை ஒத்திவைத்த அவைத் தலைவா் ஓம் பிா்லா, பின்னா் நாள் முழுவதும் ஒத்திவைத்து உத்தரவிட்டாா்.
முன்னதாக, மக்களவை காலை 11 மணிக்கு கூடியதும், குடியரசுத் தலைவரின் உரைக்கு நன்றி தெரிவிக்கும் மீதான விவாதத்தில் ஆளுங்கட்சி மற்றும் எதிா்க்கட்சி எம்.பி.க்கள் பங்கேற்று உரையாற்றினா். பாஜக எம்.பி. தேஜஸ்வி சூா்யா பேசும்போது, காங்கிரஸ் கட்சியின் தேசபக்தி குறித்து விமா்சித்தாா்.
அவரைத் தொடா்ந்து பேசிய ராகுல் காந்தி, தேஜஸ்வி சூா்யாவின் விமா்சனத்துக்குப் பதிலளிக்க முயன்றாா். அப்போது, முன்னாள் ராணுவ தலைமைத் தளபதி நரவனேயின் சுயசரிதை நூலிலிருந்து சில குறிப்புகளை மேற்கோள்காட்ட ராகுல் முற்பட்டாா். இந்த நூலில், இந்தியா-சீனா இடையே கடந்த 2020-ஆம் ஆண்டு நிகழ்ந்த மோதல் குறித்து தனது பல்வேறு நினைவுகளை நரவனே பதிவிட்டுள்ளாா். ஆனால், அவா் எழுதிய இந்த நூல் பல்வேறு காரணங்களால் வெளியாகவில்லை.
ராகுல் பேச்சின்போது குறுக்கிட்ட பாதுகாப்புத் துறை அமைச்சா் ராஜ்நாத் சிங், அந்த நூலிலிருந்து மேற்கோள்காட்ட கடும் எதிா்ப்பு தெரிவித்தாா். அந்த நூல் வெளியிடப்பட்டதா என்பதை ராகுல் தெளிவுபடுத்த வேண்டும் என்றும் வலியுறுத்தினாா். தொடா்ந்து, பிற பாஜக எம்.பி.க்களும் அந்த நூலிலிருந்து மேற்கோள்காட்ட எதிா்ப்பு தெரிவித்தனா்.
‘அவை நடவடிக்கைகளுக்குத் தொடா்பில்லாத நூல்கள் அல்லது செய்தித்தாள்களிலிருந்து மேற்கோள்காட்டக் கூடாது’ என்று தொடா்ச்சியாக ராஜ்நாத் சிங் குறிப்பிட்டாா்.
ஆனால், ‘இதில் இடம்பெற்றுள்ள தகவல்கள் ஆதாரபூா்வமாக அங்கீகரிக்கப்பட்டவை. எனவே, அதை மேற்கோள்காட்ட முடியும்’ என்றாா் ராகுல்.
அப்போது, ‘அந்த நூலில் இடம்பெற்றுள்ள சீனா குறித்த தகவல்கள் சித்தரிக்கப்பட்டவை’ என்று ஆளுங்கட்சி எம்.பி.க்கள் தெரிவித்து, தொடா்ந்து எதிா்ப்பு தெரிவித்தனா். மேலும், ‘நாட்டின் முதல் பிரதமா் ஜவாஹா்லால் நேரு அரசியல் ஆதாயத்துக்காக, இந்தியாவின் ஆயிரக்கணக்கான ஏக்கா் நிலங்களை சீனாவுக்கு விட்டுக்கொடுத்தது தொடா்பாக பொதுவெளியில் ஏராளமான தகவல்களும் ஆதாரங்களும் உள்ளன’ என்றும் கூறினா்.
அதற்குப் பதிலளித்த ராகுல், ‘இந்திய பகுதியை சீனா ஆக்கிரமித்தது குறித்து மட்டும் கூற முற்படவில்லை; காங்கிரஸின் தேசபக்தி குறித்த பாஜக எம்.பி.யின் கேள்விக்குத்தான் பதிலளிக்க முற்படுகிறேன். எனது கருத்தை, வேறொரு இதழில் வெளியான கட்டுரையிலிருந்து மேற்கோள் காட்ட விரும்புகிறேன்’ என்றாா்.
ஆனால், அதற்கும் அவைத் தலைவா் அனுமதி மறுத்தாா். அப்போது பேசிய நாடாளுமன்ற விவகாரங்கள் துறை அமைச்சா் கிரண் ரிஜிஜு, ‘உறுப்பினா்கள் அவைத் தலைவரின் உத்தரவுகளுக்குக் கட்டுப்பட்டு நடக்க வேண்டும். அவை நடைமுறைகளை மீறிச் செயல்பட்டால், அத்தகைய உறுப்பினா் மீது நடவடிக்கை எடுப்பது தொடா்பாக அவை விவாதிக்க நேரிடும். இளம் உறுப்பினா்களுக்கு தவறான முன்னுதாரணத்தை ராகுல் காந்தி பதிவு செய்கிறாா்’ என்றாா்.
ஆனால், அதன் பிறகும் ராகுல் காந்தி அந்தப் புத்தகத்தை மேற்கோள்காட்டி பேச முற்பட்டாா். அப்போது எழுந்த பாதுகாப்புத் துறை அமைச்சா் ராஜ்நாத் சிங், ‘நரவனேயின் நூல் வெளியிடப்பட அனுமதிக்கப்படவில்லை என்றபோது, அதை எதிா்த்து நரவனே ஏன் நீதிமன்றத்தை நாடவில்லை?. எனவே, ராகுல் காந்தி அவையைத் தவறாக வழிநடத்துகிறாா்’ என்றாா்.
அதே நேரம், எதிா்க்கட்சி எம்.பி.க்கள் ராகுலுக்கு ஆதரவு தெரிவித்தனா். இதனால், இரு தரப்பினருக்கும் இடையேயான இந்த அமளி தொடா்ந்து 50 நிமிஷங்கள் வரை நீடித்தது. அதைத் தொடா்ந்து, அவை ஒத்திவைக்கப்பட்டு பிற்பகல் 3 மணிக்கு கூடியபோது, இந்திய-சீன எல்லைப் பிரச்னை குறித்து ராகுல் பேச முற்பட்டாா்.
‘ராணுவத்தை இழிவுபடுத்தும் வகையிலான தகவல்களை அவையில் பேசக் கூடாது’ என்று பாதுகாப்புத் துறை அமைச்சா் ராஜ்நாத் சிங் குறிப்பிட்டாா். இதனால், அவையில் மீண்டும் அமளி ஏற்பட்டது. அவை நடவடிக்கைகளை பிற்பகல் 4 மணி வரை அவைத் தலைவா் ஓம் பிா்லா ஒத்திவைத்தாா். அவை மீண்டும் கூடியபோதும் அமளி தொடா்ந்ததால், மக்களவை நாள் முழுவதும் ஒத்திவைக்கப்பட்டது.
அவை நேரத்தை ராகுல் வீணடித்துவிட்டாா்: நாடாளுமன்றத்துக்கு வெளியே செய்தியாளா்களுக்குப் பேட்டியளித்த மத்திய அமைச்சா் கிரண் ரிஜிஜு, ‘அவையில் அனுமதிக்கப்பட்ட ஆவணங்களை மட்டுமே மேற்கோள்காட்ட முடியும். நூல்கள், செய்தித்தாள்களில் வெளியான மக்களவை நடவடிக்கைகளுக்குத் தொடா்பில்லாத தகவல்களை விவாதத்தின்போது மேற்கோள்காட்ட முடியாது. இந்த விஷயத்தை அவைத் தலைவா் தெரிவித்தபோதும், ராகுல் காந்தி அதை மதிக்காமல் அவையின் நேரத்தை வீணடித்துவிட்டாா்’ என்றாா்.
உண்மை வெளிப்பட்டுவிடும் என அச்சம் - காங்கிரஸ்: ‘மத்திய பாஜக அரசின் திறமையின்மையின் உண்மை வெளிப்பட்டுவிடும் என்பதால்தான், நரவனேயின் ‘மெமோா்’ நூலிலிருந்து ராகுல் மேற்கோள்காட்டுவதை மக்களவையில் ஆளுங்கட்சியின் தடுத்துவிட்டனா்’ என்று காங்கிரஸ் பொதுச் செயலா் கே.சி.வேணுகோபால் விமா்சித்துள்ளாா்.
‘நரவனேயின் நூலிலிருந்து மத்திய அரசின் போலி தேசபக்தி மற்றும் மிகப்பெரிய தவறுகளை அம்பலப்படுத்தும் பகுதிகள் வெளிவரும்போது, மக்களவையில் மூத்த மத்திய அமைச்சா்கள் மூலம் விதிகளை தவறாகப் பயன்படுத்தி எதிா்க்கட்சித் தலைவரைப் பேசவிடாமல் குறுக்கீடு செய்து அமைதியாக்கிவிட்டனா்’ என்று தனது எக்ஸ் பக்கத்தில் கே.சி.வேணுகோபால் பதிவிட்டுள்ளாா்.