பட்ஜெட்டில் குறையா? ராகுலுக்கு நிதியமைச்சா் சவால்

மத்திய பட்ஜெட்டில் வேலையின்மை, கிராமப்புற மேம்பாடு, உற்பத்தி பெருக்கம் உள்ளிட்டவற்றுக்கு தீா்வு அளிக்கப்படவில்லை என்ற ராகுலின் குற்றச்சாட்டை நிரூபிக்க முடியுமா? என்று மக்களவை எதிா்க்கட்சித் தலைவருக்கு மத்திய நிதியமைச்சா் நிா்மலா சீதாராமன் சவால் விடுத்தாா்.

இது தொடா்பாக பிடிஐ செய்தி நிறுவனத்துக்கு அளித்த பேட்டியில் நிா்மலா சீதாராமன் மேலும் கூறியதாவது:

ராகுல் காந்தி பட்ஜெட் குறித்து எவ்வித ஆதாரமும் இல்லாமல் பொதுவான குற்றச்சாட்டை முன்வைத்துள்ளாா். அவா் குற்றச்சாட்டுக்கு ஆதாரமாக பட்ஜெட்டில் ஒரு பத்தியையாவது அவரால் சுட்டிக் காட்ட முடியுமா? இதனை ஒரு சவாலாகவே நான் முன்வைக்கிறேன்.

இளைஞா்கள் திறன் மேம்பாடு, தொழில்முனைவோரை ஊக்குவிப்பது, செயற்கை நுண்ணறிவு உள்ளிட்ட வளா்ந்து வரும் தொழில்நுட்பங்களை இந்தியாவில் விரைந்து மேம்படுத்துவது உள்ளிட்டவற்றில் மத்திய அரசு தீவிரமாக கவனம் செலுத்தி வருகிறது.

அதே நேரத்தில் வேளாண்மை, கிராமப்புற வேலைவாய்ப்பு உருவாக்கம், இளைஞா்களை திறன்மிகு பணிகளுக்கு தயாா்படுத்துதல் ஆகியவற்றுக்கும் உரிய நிதி ஒதுக்கி திட்டங்கள் செயல்படுத்தப்படுகின்றன. உண்மை நிலை இவ்வாறு இருக்கும்போது பட்ஜெட்டை ஏதாவது விமா்சிக்க வேண்டும் என்ற நோக்கில் ராகுல் பேசியுள்ளாா்.

இதேபோல அமெரிக்க வா்த்தக ஒப்பந்தம் மூலம் இந்திய விவசாயிகள் நலனை மத்திய அடகு வைத்துவிட்டதாக காங்கிரஸ் குற்றஞ்சாட்டுவது தொடா்பான கேள்விக்கு, ‘நாடாளுமன்றத்தில் வா்த்தகத் துறை அமைச்சா் அறிக்கை மூலம் உரிய பதிலை அளித்துள்ளாா்’ என்றாா்.