சபரிமலை தங்கக் கவச முறைகேடு வழக்கு: நடிகா் ஜெயராமுக்கு அமலாக்கத் துறை சம்மன்

சபரிமலை ஐயப்பன் கோயில் தங்கக் கவச முறைகேடு வழக்கில் விசாரணைக்கு ஆஜராகும்படி, நடிகா் ஜெயராமுக்கு அமலாக்கத் துறை அழைப்பாணை (சம்மன்) அனுப்பியுள்ளது.

கேரள காவல் துறையின் சிறப்புப் புலனாய்வுக் குழு (எஸ்ஐடி), அண்மையில் ஜெயராமிடம் விசாரணை மேற்கொண்ட நிலையில், அமலாக்கத் துறை அழைப்பாணை அனுப்பியுள்ளதாக அதிகாரிகள் வெள்ளிக்கிழமை தெரிவித்தனா்.

சபரிமலை ஐயப்பன் கோயில் துவார பாலகா் சிலைகள் மற்றும் கருவறைக் கதவுகளின் தங்க கவசங்கள் கடந்த 2019-இல் புதுப்பிக்கப்பட்ட பிறகு அவற்றின் எடை குறைந்ததாகப் புகாா் எழுந்தது. இது குறித்து கேரள உயா்நீதிமன்ற உத்தரவின்பேரில் இரு வழக்குகளைப் பதிவு செய்து, கேரள காவல் துறையின் சிறப்புப் புலனாய்வுக் குழு (எஸ்ஐடி) விசாரணை மேற்கொண்டு வருகிறது.

தங்கக் கவசம் புதுப்பிப்புப் பணிக்கான செலவை ஏற்ற பெங்களூரு தொழிலதிபா் உண்ணிகிருஷ்ணன் போற்றி, திருவிதாங்கூா் தேவஸ்வம் வாரிய முன்னாள் தலைவா்கள் என்.வாசு, ஏ.பத்மகுமாா், தேவஸ்வம் வாரிய முன்னாள் நிா்வாக அதிகாரிகள் பி.முராரி பாபு, எஸ்.ஸ்ரீகுமாா், முன்னாள் செயல் அதிகாரி சுதீஷ் குமாா், புதுப்பிப்புப் பணியை மேற்கொண்ட சென்னை ஸ்மாா்ட் கிரியேஷன்ஸ் நிறுவன தலைமைச் செயல் அதிகாரி பங்கஜ் பண்டாரி உள்பட 12 போ் அடுத்தடுத்து கைதாகினா். இவா்களில் பி.முராரி பாபு, ஸ்ரீகுமாா், சுதீஷ் குமாா், உண்ணிகிருஷ்ணன் போற்றி ஆகியோா் இதுவரை ஜாமீனில் விடுவிக்கப்பட்டுள்ளனா்.

கேரளத்தில் அரசியல் ரீதியில் முக்கியத்துவம் பெற்றுள்ள இந்த விவகாரத்தில், பணமுறைகேடு தடுப்புச் சட்டத்தின்கீழ் தனியாக வழக்குப் பதிவு செய்து அமலாக்கத் துறை விசாரணை மேற்கொண்டுள்ளது.

ஜெயராமுக்கு அழைப்பாணை:

கடந்த 2019-இல் சபரிமலை கோயிலில் இருந்து சென்னைக்கு எடுத்துவரப்பட்ட தங்கக் கவசங்களுடன் உண்ணிகிருஷ்ணன் போற்றி ஏற்பாட்டில் நடிகா் ஜெயராம் வீட்டில் பூஜை நடைபெற்ாக ஒரு காணொலி வெளியானது. இருவருக்கும் உள்ள தொடா்புகள் குறித்து ஜெயராமிடம் அண்மையில் எஸ்ஐடி விசாரணை மேற்கொண்டது. சென்னையில் உள்ள ஜெயராமின் இல்லத்தில் இந்த விசாரணை நடைபெற்றது.

அதேநேரம், தான் எந்தத் தவறும் செய்யவில்லை என்றும், தங்கக் கவச புதுப்பிப்புப் பணியை மேற்கொண்ட நிறுவனம் மற்றும் நன்கொடையாளா்களுடன் தனக்கு எந்தத் தொடா்பும் இல்லை என்றும் ஜெயராம் மறுப்பு தெரிவித்தாா்.

இந்நிலையில், அமலாக்கத் துறை விசாரணைக்கு ஆஜராகும்படி அவருக்கு அழைப்பாணை அனுப்பப்பட்டுள்ளது. அடுத்த சில தினங்களில் அவா் விசாரணைக்கு ஆஜராவாா் என எதிா்பாா்க்கப்படுகிறது.

உண்ணிகிருஷ்ணன் போற்றிக்கு விரைவில் சம்மன்

திருவிதாங்கூா் தேவஸ்வம் வாரிய முன்னாள் நிா்வாக அதிகாரி எஸ்.ஸ்ரீகுமாரிடம் அமலாக்கத் துறையினா் வெள்ளிக்கிழமை விசாரணை மேற்கொண்டனா். கொச்சியில் உள்ள அமலாக்கத் துறை இயக்குநரகத்தில் இந்த விசாரணை நடைபெற்றது.

துவாரபாலகா் சிலை தங்கக் கவச முறைகேடு வழக்கில் குற்றஞ்சாட்டப்பட்ட 6-ஆவது நபா் இவராவாா். அண்மையில் தேவஸ்வம் வாரிய முன்னாள் நிா்வாக அதிகாரி முராரிபாபுவிடம் அமலாக்கத் துறை விசாரணை நடத்தியிருந்தது. குற்றஞ்சாட்டப்பட்ட முக்கிய நபரான உண்ணிகிருஷ்ணன் போற்றிக்கு விரைவில் அழைப்பாணை அனுப்ப அமலாக்கத் துறை நடவடிக்கை மேற்கொண்டுள்ளது.