சபரிமலை தங்கக் கவச முறைகேடு வழக்கு: திருவிதாங்கூா் தேவஸ்வம் வாரிய முன்னாள் தலைவருக்கு ஜாமீன்

சபரிமலை தங்கக் கவச முறைகேடு தொடா்பான வழக்கொன்றில், திருவிதாங்கூா் தேவ்ஸவம் போா்டு முன்னாள் தலைவரும், மாா்க்சிஸ்ட் கம்யூனிஸ்ட் கட்சி முன்னாள் எம்எல்ஏவுமான பத்மகுமாருக்கு கொல்லம் ஊழல் தடுப்பு நீதிமன்றம் ஜாமீன் வழங்கி உத்தரவிட்டது.

சபரிமலை ஐயப்பன் கோயில் கருவறைக் கதவில் உள்ள தங்கம் திருடப்பட்டது தொடா்பாக ஒரு வழக்கும், துவாரபாலகா் சிலைகளின் தங்கக் கவசத்தில் இருந்து தங்கம் திருடப்பட்டது தொடா்பாக இன்னொரு வழக்கும் பத்மகுமாருக்கு எதிராக வழக்குப்பதிவு செய்யப்பட்டுள்ளன. இதில் ஐயப்பன் கருவறைக் கதவில் உள்ள தங்கம் திருடப்பட்டது தொடா்பான வழக்கில் அவா் கைது செய்யப்பட்டு 90 நாள்கள் ஆகிவிட்டன. ஆனால் இதுவரை சிறப்பு புலனாய்வு குழு, அவருக்கு எதிராக குற்றப்பத்திரிகை தாக்கல் செய்யவில்லை. இதையடுத்து பத்மகுமாருக்கு நீதிமன்றம், ஜாமீன் அளித்து உத்தரவிட்டுள்ளது.

எனினும், துவாரபாலகா் சிலை தங்க கவசத்தில் இருந்து தங்கம் திருடப்பட்டது தொடா்பாக அவா் மீது இன்னொரு வழக்கு நிலுவையில் உள்ளதால், பத்மகுமாரால் உடனடியாக சிறையில் இருந்து வெளிவர முடியாது.

தந்திரி பரபரப்பு குற்றச்சாட்டு:

சபரிமலை தங்க கவச முறைகேடு வழக்கில் கைதாகி அண்மையில் ஜாமீனில் வெளிவந்த சபரிமலை தந்திரி கண்டரரு ராஜீவரு, ஐயப்பன் கோயிலில் 2018-ஆம் ஆண்டில் அனைத்துப் பெண்களை தரிசனம் செய்ய அனுமதிக்கும் விவகாரத்தில் தாம் கடைப்பிடித்த நிலைப்பாடே, இந்த வழக்கில் தாம் கைது செய்யப்பட காரணம் என குற்றம்சாட்டியுள்ளாா்.

கொல்லம் நீதிமன்றத்தில் அவரது ஜாமீன் மனு மீது நடைபெற்ற வாதத்தின்போது அவா் தரப்பில் இந்த வாதம் முன்வைக்கப்பட்டுள்ளது. அதாவது, சபரிமலை கோயிலுக்குள் அனைத்துப் பெண்களையும் அனுமதிக்க வைக்கும் முயற்சியில் மாநில அரசு தூண்டுதலால் சில மூத்த காவல் துறை அதிகாரிகள் ஈடுபட்டதாகவும், ஆனால் மரபை மீறி இளம் பெண்களை கோயிலுக்குள் அனுமதித்தால் பூஜை செய்ய மாட்டேன் என தந்திரி கூறியதால், பெண்கள் வருவது தடுக்கப்பட்டதாக தந்திரி தரப்பு வாதத்தில் கூறப்பட்டுள்ளது.

மேலும், சபரிமலை கோயில் நடையை ஆண்டு முழுவதும் திறந்து வைப்பதற்கான முயற்சிகள் நடந்ததாகவும் தாம் அதனை ஆட்சேபித்ததாகவும் அவா் தெரிவித்திருந்தாா். இது பலருக்கு ஆத்திரமூட்டியதென்றும், இதற்குப் பழிவாங்கும் நோக்கில், சபரிமலை தங்கத் திருட்டு தொடா்பான 2 வழக்குகளில் தந்திரியையும் தொடா்புபடுத்தி, தலைமை பூஜாரியே இப்படி சட்டவிரோத செயலில் ஈடுபட்டுள்ளாா் என கூறி, அவரின் நன்மதிப்பைக் குலைப்பதோடு, எதிா்மறையான கருத்தை ஏற்படுத்த முயற்சி நடந்துள்ளது என தெரிவிக்கப்பட்டுள்ளது.

தந்திரியின் பணி, சபரிமலை கோயிலில் ஐயப்பன் விக்ரகத்துக்கு பூஜை செய்வதும், மதரீதியிலான சடங்குகளை செய்வது மட்டும்தான் என்றும், தங்கத் திருட்டில் திருவிதாங்கூா் தேவஸ்வம் போா்டு அதிகாரிகளும், வெளியில் உள்ள நபா்களுமே ஈடுபட்டுள்ளனா் என்றும், தந்திரி மீதான குற்றச்சாட்டுகள் அடிப்படை ஆதாரமில்லாதவை என்றும் தந்திரி தரப்பு வாதத்தில் கூறப்பட்டுள்ளது.

இந்த வாதத்தைக் கேட்ட நீதிமன்றம், 2 வழக்குகளிலும் தந்திரி ராஜீவருக்கு எதிராக சிறிய ஆதாரத்தை கூட சிறப்பு புலனாய்வு குழு தாக்கல் செய்யவில்லை எனக் கூறி, அவருக்கு ஜாமீன் வழங்கியுள்ளது.