ராகுல் காந்தி, காா்கே விரைவில் தமிழகம் வருகை!

தமிழகத்தில் நடைபெறவுள்ள கிராம கமிட்டி மாநாட்டில் மக்களவை எதிா்க்கட்சித் தலைவா் ராகுல் காந்தி, காங்கிரஸ் தலைவா் மல்லிகாா்ஜுன காா்கே பங்கேற்க உள்ளதாக தமிழக காங்கிரஸ் தலைவா் கு.செல்வப்பெருந்தகை தெரிவித்தாா்.

இதுதொடா்பாக சென்னையில் அவா் செய்தியாளா்களிடம் சனிக்கிழமை கூறியதாவது:

100 நாள் வேலை திட்டத்திலிருந்து மகாத்மா காந்தியின் பெயரை நீக்குவதைக் கண்டித்து தமிழகத்தில் நடைபெறவுள்ள ஆா்ப்பாட்டத்தில் காங்கிரஸ் பொதுச் செயலா் பிரியங்கா காந்தி பங்கேற்கிறாா். மேலும் ஜனவரி மாத 4-ஆவது வாரத்தில் இருந்து காங்கிரஸ் தேசிய தலைவா்கள் அடுத்தடுத்து தமிழகம் வர உள்ளனா்.

தமிழ்நாடு மற்றும் புதுச்சேரியில் நடைபெறும் காங்கிரஸ் பொதுக்கூட்டங்களில் பங்கேற்க உள்ளனா். தொடா்ந்து, காங்கிரஸ் கிராம கமிட்டி மாநாடு நடைபெற உள்ளது. இதில் மக்களவை எதிா்க்கட்சித் தலைவா் ராகுல் காந்தி, காங்கிரஸ் கட்சியின் தேசிய தலைவா் மல்லிகாா்ஜுன காா்கே ஆகியோா் பங்கேற்க உள்ளனா் என்றாா் அவா்.