விருதுநகரில் பொதுமக்கள் நடமாட்டம் அதிகமான பகுதிகளில் சி.சி.டி.வி கேமார பொறுத்த நடவடிக்கை

பொதுமக்கள் அதிக நடமாட்டம் உள்ள பகுதிகளில் அசம்பாவித சம்பவங்களை கட்டுப்படுத்தவும், போக்குவரத்துக்களை ஒழுங்குபடுத்தும் வகையில் 64 இடங்களில் சி.சி.டி.வி கேமார பொறுத்துவதற்கு காவல் துறை மூலம் நடவடிக்கை எடுக்கப்பட இருக்கிறது.

விருதுநகரில் கூட்ட நெரிசல் மற்றும் நடந்து செல்லும் பெண்களை வழிமறித்து நகை பறிப்பு சம்பவங்கள் மற்றும் போக்குவரத்து நெரிசல் உள்ளிட்டவைகளை கட்டுப்படுத்தும் வகையில் 64 இடங்களில் கேமரா மற்றும் 16 ஒளிரும் விளக்குகள், 4 இடங்களில் தானியங்கி சிக்னல் விளக்குகளையும் காவல் துறை மூலம் ரூ.19 லட்சம் செலவில் தனியார் நிறுவனம் மூலம் மேற்கொள்ளப்பட இருக்கிறது.

இது தொடர்பாக காவல் துறை அதிகாரிகள் கூறுகையில், நகரில் போக்குவரத்து ஆகியவைகளை ஒழுங்குபடுத்தும் வகையில் ஆத்துப்பாலம், எம்.ஜி.ஆர்.சிலை சந்திப்பு, அல்லம்பட்டி முக்குரோடு, சிவகாசி சாலை ஆகிய இடங்களில் தானியங்கி சிக்னல் விளக்குகளும் பொறுத்தப்பட இருக்கிறது. அதேபோல், வழிப்பறி சம்பவங்களை தடுக்கும் வகையில் அரசு போக்குவரத்து கழகம், மேற்கு காவல் நிலையம் முக்கு ரோடு,

கேவிஎஸ் மேல்நிலைப்பள்ளி, ஸ்டேட் பேங்க், கார்னேசன் முக்கு, மாரியம்மன் கோயில், மெயின் பஜார், எம்.ஜி.ஆர்.சிலை, புது பேருந்து நிலையம், சிவகாசி வாகன சோதனைச் சாவடி, பாத்திமா நகர் முக்கு சாலை, பர்மா காலனி முக்கு சாலை, மாவட்ட மைய நூலகம் முக்கு சாலை, மீனாம்பிகை பங்களா, புல்லலக்கோட்டை முக்கு சாலை, பழைய பேருந்து நிலையம் உள்ளே வெளியே, ராமமூர்த்தி சாலை, அல்லம்பட்டி பாலம் மற்றும் அரசு மருத்துவமனை உள்ளிட்ட இடங்களில் வெளிச்சம் இல்லாத நேரங்களிலும் 500 மீட்டர் தூரம் வரையில் சுற்றி தெளிவாக படம் பிடிக்க கூடிய 16 நவீன கேமராக்களும், மற்ற 48 இடங்களில் 50 மீட்டர் சுற்றளவில் படம் பிடிக்கும் வகையில் பொறுத்தப்பட இருக்கிறது.

இவை அனைத்தும் கேபிள்கள் மூலம் இணைக்கப்பட்டு மேற்கு காவல் நிலையத்தில் அமைக்கப்பட்டுள்ள கணிப்பொறி கட்டுப்பாட்டு அறையில் தகவல்களை சேகரிக்க ஏற்பாடு செய்யப்பட்டுள்ளது. இதற்காக அனைத்து நிகழ்வுகளையும் ஒரு மாதத்திற்கு சேமிக்கும் வகையில் நவீன கணிப்பொறி சாதனங்கள் பொறுத்தப்பட்டு கண்காண்ப்பு பணியிலும் தொழில்நுட்ப பணியாளர்கள் ஈடுபடுத்தப்பட இருப்பதாக அவர்கள் தெரிவித்தனர்.