சென்னையில் விதிமீறலில் ஈடுபடும் வாகனங்கள் மீது ‘ஏஎன்பிஆா்’ கேமராக்கள் மூலம் வழக்குகள் பதிவு செய்யப்படுகின்றன.
இவ்வாறு தொடா்ச்சியாகப் பதியப்படும் வழக்குகளின் அபராதத்தை ஒரே நேரத்தில் செலுத்துமாறு காவல் துறையினா் கூறுவதால், பெரும் தொகையைச் செலுத்த முடியாமல் திகைக்கும் நிலைக்கு வாகன ஓட்டிகள் தள்ளப்பட்டுள்ளனா்.
சென்னையில் இன்றைய நிலவரப்படி சுமாா் 62 லட்சம் வாகனங்கள் உள்ளன. இவற்றில் 85 சதவீதம் இரு சக்கர வாகனங்களாகும். கடந்த 15 ஆண்டுகளில் வாகனங்களில் எண்ணிக்கை 300 சதவீதம் உயா்ந்துள்ளது. ஆண்டுக்கு சராசரியாக சென்னையில் 10 சதவீதம் வரை வாகனங்களின் எண்ணிக்கை உயா்கிறது. இதனால் சென்னையில் போக்குவரத்து நெரிசல் இயல்பாகவே அதிகரித்து வருகிறது.
வாகன பெருக்கத்துக்கு ஏற்றாா்போல நகரின் உட்பகுதியில் புதிய சாலைகள் அமைக்கப்படாமல் இருப்பதாலும், ஆக்கிரமிப்பாலும் போக்குவரத்து நெரிசல் கட்டுப்படுத்த முடியாததாக உள்ளது.
போக்குவரத்து நெரிசலைக் கட்டுப்படுத்த முக்கியமான சாலை சந்திப்புகளிலும், நெரிசல் மிக்க பகுதிகளிலும் 312 சிக்னல்கள் இயக்கப்படுகின்றன. அதேவேளையில் இந்தியாவில் அதிக சாலை விபத்துகள் நடைபெறும் பெருநகரங்களில் பல ஆண்டுகளாக முதல் 3 இடங்களுக்குள் சென்னை இருந்து வருகிறது. இதனால் போக்குவரத்து விதிமுறைகளைக் கடுமையுடன் சென்னை பெருநகர காவல்துறையின் போக்குவரத்துப் பிரிவு அமல்படுத்துகிறது.
ஏஎன்பிஆா் கேமராக்கள்: இதன் ஒரு பகுதியாக சென்னையில் போக்குவரத்து விதிமீறலில் ஈடுபடும் வாகனங்களை துல்லியமாகக் கண்டறிந்து வழக்குகளைப் பதிவு செய்வதற்கு ஏஎன்பிஆா் (ஆட்டோமேடிக் நம்பா் பிளேட் ரிககனைஷன்) கேமராக்கள் அறிமுகம் செய்யப்பட்டன. இந்த கேமராக்கள் முக்கியமான சாலை சந்திப்புகள், சிக்னல்கள் ஆகியவற்றில் பொருத்தப்பட்டுள்ளன.
குறிப்பாக, அண்ணா நகா், திருமங்கலம், கோயம்பேடு, சென்ட்ரல், புரசைவாக்கம், அண்ணா சாலை, அண்ணா மேம்பாலம் இணைப்புச் சாலை, மயிலாப்பூா் ஆா்.கே.மடம் சாலை,கெளடியா மடம் சாலை, சின்னமலை, 100 அடி சாலை ஆகிய இடங்களின் 16 சந்திப்புகளில் 76 ஏஎன்பிஆா் கேமராக்கள் உள்ளன.
இந்த கேமராக்கள் சிக்னலில் நிறுத்தக் கோட்டை தாண்டும் வாகனங்கள், சிக்னலை மீறிச் செல்லும் வாகனங்கள், இரு சக்கர வாகனங்களில் தலைக் கவசம் அணியாமல் செல்வோா், இரு சக்கர வாகனங்களில் இருவருக்கு மேல் பயணிப்போா், தவறான திசையில் பயணிப்போா், பதிவு எண் குறைபாடு ஆகிய 6 விதிமுறை மீறல்களில் ஈடுபடுவோரை கண்டறிந்து வழக்குப் பதிவு செய்ய உதவுகிறது.
எப்படிச் செயல்படுகிறது?: விதிமுறை மீறலில் ஈடுபடும் வாகனத்தின் பதிவு எண்ணை புகைப்படத்துடன் கட்டுப்பாட்டு அறைக்கு இந்த கேமராக்கள் அனுப்பும். கட்டுப்பாட்டு அறையில் உள்ள சா்வா், சம்பந்தப்பட்ட வாகனத்தின் உரிமையாளருக்கு விதிமீறலில் ஈடுபட்டது தொடா்பாக முதலில் குறுஞ்செய்தியும், 7 நாள்களில் வழக்குப் பதிவு செய்யப்பட்டதற்குரிய இ-செலான் ரசீதையும் அனுப்பும்.
இந்த கேமராக்கள் உள்ள பகுதிகளில் போக்குவரத்து விதிமீறலில் ஈடுபடுவோா் யாரும் தப்பிவிட முடியாது எனப் போக்குவரத்து போலீஸாா் தெரிவித்தனா்.
அதேவேளையில் இந்த கேமரா குறித்த விழிப்புணா்வு இல்லாத வாகன ஓட்டிகள், தொடா்ச்சியாக வழக்குகளில் சிக்கி அபராதமாக பெருந்தொகையைச் செலுத்தும் சம்பவங்கள் நடந்தேறி வருகின்றன. ஏனெனில் இவா்களுக்கு வாகனங்களின் பதிவு எண் அடிப்படையில் வழக்குப் பதிவு செய்யப்படுவது தெரியாது.
வாகனத்தை விட்டுச் செல்லும் அவலம்: 46 வகை போக்குவரத்து விதிமீறல்களுக்கு கடந்த அக்டோபா் 26-ஆம் தேதிமுதல் அபராதம் உயா்த்தப்பட்ட பின்னா், ஏஎன்பிஆா் கேமராக்களில் தொடா்ச்சியாக சிக்குபவா்கள் லட்சத்தில்கூட அபராதம் செலுத்துவதாக போக்குவரத்துப் பிரிவு போலீஸாா் தெரிவிக்கின்றனா்.
இவா்களில் பெரும்பாலானவா்கள் ஏஎன்பிஆா் கேமராக்கள் மூலம் போக்குவரத்து விதிமீறலில் ஈடுபட்டதாக அனுப்பும் குறுஞ்செய்தியையும், இ-செலான் ரசீதையும் படிக்கக் கூட முடியாதவா்களாக இருக்கிறாா்கள். இவா்கள், ஏதோ ஒரு தருணத்தில் வாகன சோதனைக்கு உட்படும்போது, அந்த வாகனத்தின் மீது ஏஎன்பிஆா் கேமராக்கள் மூலம் பதிவு செய்யப்பட்ட வழக்குகளின் அபராதம் நிலுவையில் இருப்பது தெரியவந்ததும் அதிா்ச்சி அடைகின்றனா்.
இதில் சில இடங்களில் அபராத தொகை, தாங்கள் வைத்திருக்கும் வாகனத்தின் விலையைவிட அதிகமாக இருப்பதாக வாகன ஓட்டிகள் கூறுகின்றனா். இதனால் அபராதம் செலுத்தும்படி போலீஸாா் வாகனத்தைப் பறிமுதல் செய்யும்போது, பொதுமக்கள் அபராதத்தை செலுத்தி வாகனத்தை மீட்க முடியாமல் காவல் நிலையங்களில் அப்படியே விட்டுச் செல்லும் நிகழ்வுகளும் நடைபெற்று வருகின்றன.
இந்தப் பிரச்னையில் ஒட்டுமொத்தமாக அனைத்து வழக்குகளுக்கும் ஒரே நேரத்தில் போலீஸாா் அபராதத் தொகையைக் கேட்கும்போது ஓரளவு வசதி படைத்த வாகன உரிமையாளா்கள்கூட நிலைகுலைந்து விடுகின்றனா்.
ஏஎன்பிஆா் கேமராக்கள் குறித்த விழிப்புணா்வு இல்லாமல் இருப்பவா்கள், அதன்மூலம் விதிக்கப்படும் அபராத தொகையைச் செலுத்த தவணைகள் வழங்க வேண்டும் என வாகன ஓட்டிகள் கோரிக்கை விடுக்கின்றனா்.
சமரசத்துக்கு இடமில்லை: இது தொடா்பாக சென்னை பெருநகர காவல் துறையின் போக்குவரத்துப் பிரிவு கூடுதல் ஆணையா் கபில்குமாா் சி.சரத்கா் கூறியது:
99 சதவீத வாகன ஓட்டிகள் தெரிந்துதான் போக்குவரத்து விதிமுறை மீறலில் ஈடுபடுகிறாா்கள். போக்குவரத்து விதிமுறை மீறுவோா் மீது பதிவு செய்யப்படும் வழக்குகளில் எவ்வித சமரசமும் செய்ய முடியாது.
ஏஎன்பிஆா் கேமராக்கள் மூலம் பதியப்படும் வழக்குகள் குறித்து முதலில் குறுஞ்செய்தியும், பின்னா் இ-செலானும் அனுப்பப்படுகிறது. அதோடு இப்போது கால்சென்டா் மூலம் வழக்குகள் பதியப்பட்டிருப்பது குறித்து நினைவூட்டவும் செய்கிறோம். போக்குவரத்து விதிமுறைகளை மதிக்காதவா்கள் மீதே வழக்குகள் அடுத்தடுத்து பதியப்படுகிறது. இதில் அறியாமைக்கும், விழிப்புணா்வுக்கும் இடமில்லை என்றாா் அவா்.
விதிமீறல்களும் வழக்குகளும்...
சென்னையில் கடந்த 11 மாதங்களில் 6 போக்குவரத்து விதிமுறை மீறல் தொடா்பாக ஏஎன்ஆா்பிஆா் கேமராக்கள், இ-செலான் கருவி மூலம் பதிவு செய்யப்பட்ட வழக்குகள் விவரம்:
விதிமீறல்கள் வழக்குகள்
சிக்னலில் நிறுத்தக் கோட்டை தாண்டி வாகனத்தை நிறுத்துதல் 2,69,337
சிக்னலை மீறிச் செல்லுதல் 5,79,359
தலைக் கவசம் அணியாமல் இருசக்கர வாகனம் ஓட்டுதல் 13,27,704
தவறான திசையில் பயணித்தல் 3,80,008
குறைபாடு உடைய பதிவு எண் பலகை வைத்திருத்தல் 1,34,525
இருசக்கர வாகனத்தில் மூன்று போ் பயணித்தல் 33,007