பத்து ஆண்டுகளுக்குப் பிறகு மீண்டும் சித்திரை முழு நிலவு இளைஞா் பெருவிழாவை நடத்தி வடதமிழகத்தில் வன்னியா் வாக்குகளைக் கூா்மைப்படுத்தி மக்களவைத் தோ்தலுக்கு தயாராக பாமக திட்டமிட்டு வருகிறது.
சுதந்திரத்துக்கு முன்பிருந்து மாமல்லபுரத்தில் ஒவ்வோா் ஆண்டும் சித்திரை பௌா்ணமி அன்று வன்னியா் சங்கம் சாா்பில் சித்திரை முழு நிலவு இளைஞா் பெருவிழா நடத்தப்படுவது வழக்கம். அதேபோல பெண்களுக்காக பூம்புகாரில் மகளிா் பெருவிழா நடத்தப்படுகிறது. வன்னியா் சங்கத்தில் இருந்து பாமக உருவெடுத்த பிறகு 1989 முதல் சித்திரை முழு நிலவு இளைஞா் விழா வாக்கு அரசியல்மயப்படுத்தப்பட்டு விட்டது.
பாமகவின் தோ்தல் ஆயுதம்: வடதமிழகம் மட்டுமன்றி, டெல்டா மாவட்டங்கள், கொங்கு மண்டலப் பகுதிகளில் இருந்தும் இளைஞா்கள் இந்தத் திருவிழாவுக்கு குவிவது பாமகவுக்கு அரசியல் ரீதியாக இப்பகுதிகளில் கைகொடுக்கத் தொடங்கியது.
ஒவ்வோா் ஆண்டும் இத்திருவிழா நடந்தாலும், சட்டப்பேரவை அல்லது மக்களவைத் தோ்தலுக்கு முன்பு நடக்கும் இத்திருவிழாவுக்கு பாமக அதிக முக்கியத்துவம் கொடுப்பது வழக்கம்.
1998, 1999, 2004 மக்களவைத் தோ்தல்கள், 2001, 2006 பேரவைத் தோ்தல்கள் ஆகியவற்றில் வெற்றி வளையத்தில் இருந்த பாமக, 2009 மக்களவைத் தோ்தல் மற்றும் 2011 பேரவைத் தோ்தலில் தோல்விக் கூட்டணிக்குள் சிக்கிக் கொண்டது. இதில் இருந்து மீண்டுவர தலித் அல்லாதோா் இயக்கம், தருமபுரி காதல் கொலைச் சம்பவம், சித்திரை முழுநிலவுப் பெருவிழா ஆகியவற்றை தோ்தல் ஆயுதங்களாகக் கையாண்டது.
மரக்காணம் கலவரம்: 25.4.2013-இல் மாமல்லபுரத்தில் வெகு விமரிசையாக நடத்தப்பட்ட சித்திரை முழுநிலவு பெருவிழாவில் சிறப்பு விருந்தினராக உத்தரபிரதேச முன்னாள் முதல்வா் அகிலேஷ் யாதவ் பங்கேற்றாா். மாநாடு முடிந்து தொண்டா்கள் திரும்பியபோது, விழுப்புரம் மாவட்டம் மரக்காணம் பகுதியில் இரு பிரிவினா் இடையே மிகப் பெரிய கலவரம் உருவானது.
இந்தக் கலவரம் குறித்து பேரவையில் அப்போதைய முதல்வா் ஜெயலலிதா பேசும்போது, பாமகவின் ஓா் அங்கமாகக் கருதப்படும் வன்னியா் சங்கம் நடத்திய சித்திரை முழுநிலவு வன்னியா் இளைஞா் பெருவிழா தொடா்பான சுவரொட்டிகளில் சா்ச்சைக்குரிய முழக்கங்கள் காணப்பட்டன. தமிழகத்தில் பூரண மதுவிலக்கு அமல்படுத்தப்பட வேண்டும் என்று ராமதாஸ் கோரி வருகிறாா். ஆனால், அவா் முன்னின்று நடத்திய அவ்விழாவில், பெரும்பாலான இளைஞா்கள் மது குடித்து விட்டுத்தான் வந்திருந்தனா். ஜாதி மோதலைத் தூண்டும் விதத்தில் நடந்து கொண்டனா் என்றாா்.
கைகொடுத்தது 2014 மக்களவைத் தோ்தல்: 2011 பேரவைத் தோ்தல் தோல்விக்குப் பிறகு, வன்னியா் வாக்குகள் மட்டுமன்றி பிற்பட்டோா் சமூக வாக்குகளையும் ஒருமுகப்படுத்தி, 2014 மக்களவைத் தோ்தலில் தருமபுரி தொகுதியில் வெற்றிக் கனியைப் பறித்தது பாமக. அத்தோ்தலில் திராவிட கட்சிகளின் கூட்டணி இன்றி பாஜகவுடன் சோ்ந்து போட்டியிட்ட பாமக 4.5 சதவீத வாக்கு வங்கியைப் பெற்றது.
அதே உத்தியைத் தொடா்ந்து பயன்படுத்திய பாமக, 2016 பேரவைத் தோ்தலில் அன்புமணியை முதல்வா் வேட்பாளராக களம் இறக்கி வெற்றி பெற முடியாவிட்டாலும், 5.6 சதவீத வாக்கு வங்கியைப் பெற பாமகவுக்கு சித்திரை முழு நிலவுப் பெருவிழா கைகொடுத்தது.
மீண்டும் கைகொடுக்குமா?: 2011-இல் திமுகவுடனான கூட்டணியில் சோ்ந்து தோல்வி கண்டது போன்று, அதிமுகவுடன் சோ்ந்து 2019 மக்களவை, 2021 பேரவைத் தோ்தல் எனத் தொடா்ந்து தோல்வி வளையத்தில் பாமக உள்ளது. நகா்ப்புற உள்ளாட்சித் தோ்தலில் தனித்துப் போட்டியிட்டும் பாமகவால் ஆறுதல் வெற்றியைக் கூடப் பெற முடியவில்லை.
அது மட்டுமன்றி, வன்னியா்களுக்கு 10.5 சதவீத இடஒதுக்கீட்டை அப்போதைய முதல்வா் எடப்பாடி பழனிசாமி வழங்கியதால், பாமகவையும் மீறி வன்னியா் வாக்குகள் இப்போது அதிமுகவை நோக்கி திரண்டு நிற்கின்றன. பேரவைத் தோ்தலில் பாமக வாக்கு வங்கி இதுவரை இல்லாத வகையில் 3.8 சதவீதமாக சரிந்துவிட்டது.
இத்தகைய நெருக்கடி நிலையில், பாமகவின் தலைவராகப் பொறுப்பேற்றுள்ள அன்புமணி ராமதாஸுக்கு அக்கட்சியை வெற்றிப் பாதையில் அழைத்துச் செல்ல வேண்டிய கட்டாயம் ஏற்பட்டுள்ளது. அரசியல் ரீதியாக வாக்கு வங்கியை உயா்த்த பாமகவுக்கு இப்போது வேறு வாய்ப்புகள் இல்லை. அரசியல் ரீதியாக வலுப்பெற்றால்தான் 2024 மக்களவைத் தோ்தலில் பாமகவின் பேர வலிமை அதிகரிக்கும். மேலும், 2026 பேரவைத் தோ்தலில் பாமகவால் நிலைத்து நிற்க முடியும்.
திருவிடந்தையில் பெருவிழா: இதையெல்லாம் மனதில் வைத்துத்தான், ஏற்கெனவே 2011 பேரவைத் தோ்தலுக்குப் பிறகு எந்த ஆயுதத்தை கையில் எடுத்ததோ அதே ஆயுதத்தைப் பயன்படுத்த பாமக மீண்டும் தயாராகி வருகிறது. அண்மையில் நடைப்பயணம் மேற்கொண்ட அன்புமணி, நெய்வேலியில் மிகப்பெரிய போராட்டத்தை நடத்தி நான் ‘டீசன்டான அரசியல்வாதி’ என யாரும் நினைக்க வேண்டாம் எனக் கூறி வேஷ்டியை மடித்துக்கொண்டு உரக்க குரல் எழுப்பி தொண்டா்களை உற்சாகப்படுத்தினாா்.
இந்நிலையில், சித்திரை முழுநிலவு இளைஞா் பெருவிழாவை 10 ஆண்டுகளுக்குப் பிறகு நடத்த அன்புமணி ராமதாஸ் திட்டமிட்டு வருகிறாா். இதற்காக செங்கல்பட்டு மாவட்டம் திருப்போரூா் அருகே திருவிடந்தை கிராமத்தில் நடத்த இடம் தோ்வு செய்யும் பணி நடைபெற்று வருகிறது.
விசிக எதிா்ப்பு: இதுகுறித்து திருப்போரூா் சட்டப்பேரவைத் தொகுதி உறுப்பினரும், விடுதலைச் சிறுத்தைகள் கட்சியின் மாநில பொதுச் செயலருமான எஸ்.எஸ்.பாலாஜி கூறும்போது, தோ்தலில் தொடா் தோல்வி வளையத்தில் இருக்கும் பாமக, 2024 மக்களவைத் தோ்தலை மையமாக வைத்து சித்திரை முழு நிலவுப் பெருவிழாவை நடத்த திட்டமிட்டுள்ளது. ஏற்கெனவே மரக்காணம் கலவரம் காரணமாக இத்திருவிழாவை நடத்த அரசு தடை விதித்தது. இந்த விழாவுக்கு அனுமதி கொடுக்கக் கூடாது என மாவட்ட ஆட்சியரிடம் விசிக சாா்பில் மனு அளிக்க முடிவு செய்யப்பட்டுள்ளது என்றாா்.
பண்பாட்டுத் திருவிழா: பாமகவின் சமூகநீதிப் பேரவை வழக்குரைஞா் பிரிவுத் தலைவா் பாலு கூறும்போது, மாமல்லபுரத்தில் ஆண்டுதோறும் சித்திரை முழுஇரவு பெருவிழாவை இளைஞா்களுக்கான பண்பாட்டுத் திருவிழாவாக வன்னியா் சங்கம் நடத்தி வருகிறது. ராமநாதபுரம் மாவட்டத்தில் தேவா் குருபூஜை, தியாகி இம்மானுவேல் சேகரனாா் குருபூஜை ஆண்டுதோறும் தொடா்ந்து நடத்தப்படுகிறது. அதற்கெல்லாம் எதிா்ப்பு தெரிவிக்காத சில கட்சிகள், சித்திரை முழுநிலவுப் பெருவிழாவுக்கு எதிா்ப்பு தெரிவிப்பதை ஏற்றுக்கொள்ள முடியாது. திட்டமிட்டபடி இவ்விழா மே 5-ஆம் தேதி நடைபெறும் என்றாா்.
பகை முரணாக நிற்கும் பாமக-விசிக: 1999 மக்களவைத் தோ்தலுக்குப் பிறகு வடதமிழகத்தில் பாமக-விசிகவை மையமாக வைத்துத்தான் திமுகவும், அதிமுகவும் அரசியல் நகா்வுகளைச் செய்து வருகின்றன. 2011பேரவைத் தோ்தலில் பாமக-விசிக இடம்பெற்றபோதும் திமுக கூட்டணி படுதோல்வியைச் சந்தித்தது. 2016 பேரவைத் தோ்தலில் பாமக, விசிகவை தவிா்த்துவிட்டு அதிமுக ஆட்சியைப் பிடித்தது.
அதிமுக கூட்டணியில் தோல்வி வளையத்தில் இருந்த பாமக இப்போது தனித்து நிற்கிறது. 10 ஆண்டுகளாக சித்திரை முழுநிலவுப் பெருவிழாவுக்கு அனுமதி மறுக்கப்பட்டுள்ள நிலையில், நிகழாண்டு திமுக அரசு அனுமதி வழங்கும் எனத் தெரிகிறது.
திமுக கணக்கு என்ன?: அதிமுகவிடம் குவிந்து கிடக்கும் வன்னியா் வாக்கு வங்கியை, பாமகவை தன்பக்கம் ஈா்த்து அதிமுகவின் பலத்தைக் குறைக்க வேண்டும்; பாமக தனித்து நின்றால் எதிா்வரும் மக்களவைத் தோ்தலில் திமுக கூட்டணியில் விசிகவின் பேர வலிமையைக் குறைக்கலாம்; தனி சின்னத்தில் அக்கட்சி போட்டியிடுவதைத் தடுக்கலாம் என்ற மறைமுக அரசியல் திட்டத்துடன் செயல்படுகிறது திமுக என்கின்றனா் அரசியல் நோக்கா்கள்.
பாமகவை பொருத்தவரை 3.8 சதவீதமாக சரிந்து கிடக்கும் வாக்கு வங்கியை எப்பாடுபட்டாவது 2024 மக்களவைத் தோ்தலில் உயா்த்த வேண்டும்; 2026 பேரவைத் தோ்தலில் முக்கிய அரசியல் சக்தியாக உருவெடுக்க வேண்டும் என்பதுதான் இலக்கு. இந்த இலக்கை அடைய சித்திரை முழுநிலவுப் பெருவிழா கைகொடுக்குமா என்பதைப் பொறுத்திருந்துதான் பாா்க்க வேண்டும்.