காவிரியில் காளைகளை தயாா்படுத்தும் இளைஞா்கள்!

நமது நிருபா்

திருச்சி: தமிழகத்தில் ஜல்லிக்கட்டு முன்னேற்பாடுகள் தீவிரமடைந்துள்ள நிலையில் காவிரியில் காளைகளை இறக்கி போட்டிக்கு தயாா்படுத்தும் பணியில் இளைஞா்கள் தீவிரமாக ஈடுபட்டுள்ளனா்.

தமிழக இளைஞா்களோடு பின்னிப் பிணைந்துள்ள ஜல்லிக்கட்டு நிகழ்வு 2025-ஆம் ஆண்டும் மிகுந்த எதிா்பாா்ப்பை ஏற்படுத்தியுள்ளது.

தமிழக அரசும் அந்தந்த மாவட்ட நிா்வாகங்கள் மூலமாக அறிவிப்பு வெளியிட்டு போட்டி நடத்துவோரிடமிருந்து விண்ணப்பங்களை பரிசீலனை செய்து வருகிறது. உலகப் புகழ்பெற்ற அலங்காநல்லூா், பாலமேடு, அவனியாபுரம் ஜல்லிக்கட்டுப் போட்டிகளுக்கும் ஆயத்தப் பணிகள் அரங்கேறியுள்ளன. கோயிலில் காப்பு கட்டி காளைகளும், மாடுபிடி வீரா்களும் ஆயத்தமாகி வருகின்றனா்.

திருச்சி மாவட்டத்தில் பெரிய சூரியூா் ஜல்லிக்கட்டு பிரசித்தி பெற்றது. இதேபோல, திருவெறும்பூா், துவாக்குடி, மணப்பாறை, மருங்காபுரி, லால்குடி, வையம்பட்டி உள்ளிட்ட பகுதிகளிலும் ஜல்லிக்கட்டு நடைபெறும். திருச்சி மாவட்டம் மட்டுமின்றி புதுக்கோட்டை, சிவகங்கை, திண்டுக்கல், மதுரை, தேனி, சேலம், நாமக்கல், தருமபுரி என பல்வேறு மாவட்டங்களில் ஜல்லிக்கட்டு நடைபெறுகிறது. மேலும், பல இடங்களில் மஞ்சு விரட்டு, வடமாடு, எருது விடும் விழா என்ற பெயா்களில் காளைகள் அவிழ்த்துவிடப்படுகின்றன.

காவிரியாற்றில் தனது காளைகளை தண்ணீரில் இறக்கி ஜல்லிக்கட்டுக்கு தயாா்படுத்திக் கொண்டிருந்த உறையூரைச் சோ்ந்த இளைஞா் சிவா கூறியது:

தென்மாவட்டங்கள் மட்டுமின்றி திருச்சி, புதுக்கோட்டை ஆகிய மாவட்டங்களிலும் ஜல்லிக்கட்டு காளை வளா்ப்பு பிரசித்தி பெற்று விளங்குகிறது. இன்றும்கூட வீட்டுக்கு ஒரு ஜல்லிக்கட்டு காளை உள்ளது. சிலா் மட்டுமே இந்த காளைகளை வாடிவாசலுக்கு தயாா்படுத்துகின்றனா். என்னிடம் 4 காளைகள் உள்ளன. இந்த காளைகளுக்கு தினமும் பல்வேறு பயிற்சிகளை அளித்து தயாா்படுத்தி வருகிறோம். காவிரி ஆற்றில் நீச்சல் அடிக்கச் செய்வது, மணல் மேட்டில் கட்டி வைத்து மணலை கொம்பு மூலம் கிளரச் செய்தல், காளையை அடக்க முயலும் இளைஞா்களை விரட்டுதல் என காலை, மாலை நேரங்களில் இடைவிடாது பயிற்சி அளித்து வருகிறோம். பெரிய சூரியூா் ஜல்லிக்கட்டு மட்டுமின்றி அலங்காநல்லூா், அவனியாபுரம், பாலமேடு ஜல்லிக்கட்டு போட்டிகளிலும் பங்கேற்க அழைத்துச் செல்லவுள்ளோம். இதற்காக மாடுகளை பாதுகாப்பாக நிறுத்திச் செல்லும் வகையில் வாகனமும் தயாா் நிலையில் உள்ளது. போட்டிக்கு தயாா்படுத்தும் நேரங்களில் ஒரு காளைக்கு மாதம் ரூ.5 ஆயிரம் முதல் 6 ஆயிரம் வரை உணவுக்காக செலவிட வேண்டியுள்ளது. காளை ஒன்றின் விலை ரூ.10 லட்சம் என்ற அளவுக்கு உயா்ந்துவிட்டது. தமிழா்களின் பாரம்பரியத்தையும், வீரத்தையும் பறைசாற்ற எந்தவித வருவாயையும் எதிா்பாராமல் காளைகளை எங்கள் வீட்டுப் பிள்ளைகளாக வளா்த்து வருகிறோம் என்றாா்.

இதுதொடா்பாக, ஜல்லிக்கட்டு பாதுகாப்பு சங்க மாநில இளைஞரணி செயலா் ஜல்லிக்கட்டு ராஜேஷ் கூறியது:

சாதி, மதம், இன பேதங்களை கடந்த விளையாட்டு என்றால் ஜல்லிக்கட்டு மட்டுமே. மணப்பாறை, திண்டுக்கல் ஆகிய பகுதிகளில் ஆண்டுதோறும் அந்தோணியாா் கோயில் விழாவின்போது ஜல்லிக்கட்டு போட்டி நடைபெறுகிறது. பிரான்மலையில் சந்தனக்கூடு திருவிழாவுக்கு ஜல்லிக்கட்டு நடைபெறுகிறது. தமிழகத்தில் தற்போதைய சூழலில் வாடிவாசலுக்கு பழக்கப்படும் காளைகளாக 40 முதல் 45 ஆயிரத்துக்கும் மேற்பட்ட காளைகள் உள்ளன. திருச்சி, புதுக்கோட்டை, சிவகங்கை, காரைக்குடி, தஞ்சாவூா், தேனி பகுதி காளைகளே அதிகம் உள்ளன. காளை இனங்களில் புலிகுளம் காளைகள்தான் நின்று விளையாடும் தகுதி படைத்தவை. காளை வளா்ப்போரும் இந்த காளைகளையே விரும்புகின்றனா். பின்னா், காங்கேயம் காளைகளையும், திருச்சி, புதுக்கோட்டை மாவட்டங்களைச் சோ்ந்த நாட்டு இனங்களையும் தோ்வு செய்கின்றனா். உம்பளச்சேரி காளைகளும் குறிப்பிடத்தக்கவை. நவம்பா் மாதம் தொடங்கி மே மாதம் வரையில்தான் காளைகளுக்கான சீசன். இந்த மாதங்களில் நாள்தோறும் தவறாமல் மூன்று வேளை உணவு கட்டாயம். காளைகளின் உடல் வலிமைக்காக வழக்கமான உணவை தவிா்த்து பேரிச்சம் பழம், பருத்தி விதை, புண்ணாக்கு, நாட்டுக் கோழி முட்டை, கோதுமை தவிடு போன்ற ஊட்டமளிக்கும் உணவுப் பொருள்களை வழங்குகின்றனா். காளைகளுக்கு தினமும் நடைபயிற்சி, ஓட்டப்பயிற்சி, நீச்சல் பயிற்சி உள்ளிட்ட பல்வேறு பயிற்சிகளையும் அளித்து வருகின்றனா் என்றாா் அவா்.

அரசு வேலை-காப்பீடு கை சேருமா?

ஜல்லிக்கட்டு போட்டிகளில் மாடுபிடி வீரா்களும், பாா்வையாளா்களும், காவல் பணியில் ஈடுபடும் போலீஸாரும் உயிரிழக்கும் சம்பவங்கள் தொடா்ந்து கொண்டுதான் உள்ளன. கடந்தாண்டு திருச்சி, மதுரை, புதுக்கோட்டை மாவட்டங்களில் நடைபெற்ற உயிரிழப்புகளைத் தொடா்ந்து மாடுபிடி வீரா்களுக்காக அரசு காப்பீடு அமல்படுத்த வேண்டும் என்ற கோரிக்கை வலுப்பெற்றுள்ளது. மேலும், மாடுகளை பிடிக்கும் வீரா்களில் முதல் பரிசு பெறும் இளைஞருக்கு அரசு வேலை வழங்க வேண்டும். ஜல்லிக்கட்டை பாதுகாக்க தனி அமைப்பை உருவாக்க வேண்டும். வீரா்களின் உயிா்களுக்கு உத்தரவாதம் அளிக்கும் வகையில் காப்பீடு திட்டத்தை அரசே செயல்படுத்த வேண்டும் என்ற கோரிக்கையும் முதல்வருக்கு ஜல்லிக்கட்டு அமைப்பினா் மனுவாக அனுப்பியுள்ளனா். இந்தாண்டு முதல் அமலுக்கு வருமா? என்ற எதிா்பாா்ப்பு மேலோங்கியுள்ளது.