மிஸ்டர் மற்றும் மிஸ் பப்ளிக் பொதுவெளியில் மாற்றிக் கொள்ள வேண்டிய அநாகரிகச் செயல்கள்

1. ரயில், பேருந்து நிலையங்களில் அமரும் இருக்கைகளில் லக்கேஜ்களை வைத்துக்கொண்டு பயணிகள் வந்தாலும் எடுக்காமல் இருப்பது.
2. முதுகில் மாட்டிய குண்டான பையுடன் இரண்டு ஆள் இடத்தை ஆக்கிரமித்துக்கொண்டு மின்சார ரயில்களில் நிற்பதும், இடித்தபடி நடப்பதும்.
3. சிக்னல்களில் ஒழுங்காக சிகப்பில் நின்று பச்சைக்குக் காத்திருப்பவர்களை கோமாளிகள் போல பார்த்தபடி சிக்னல் விதிகளை மீறுவதும், முதுகில் ஹாரன் அடித்து மிரட்டுவதும்.
4. வீட்டின் பால்கனியிலிருந்து ஏதோ போட்டிவைத்ததுபோல குப்பை பைகளை குப்பைத் தொட்டி நோக்கி வீசி..மிகச் சரியாக தொட்டிக்குக் கீழே சிதறவிடுவது.
5. வரிசைகளில் பலர் காத்திருக்க..அதி முக்கியஸ்தர்போல குறுக்கே நுழைந்து அதுவரை நிலவிய ஒழுங்குமுறையைக் கலைப்பது.
6. பார்க்கிங் பகுதியில் நிறுத்தியிருக்கும் காரை எப்படி எடுப்பார்கள் என்று யோசிக்காமல் முன்னாலும், பின்னாலும் இரு சக்கர வாகனங்களை இடைவெளியின்றி செருகி நிறுத்துவது.
7. பொது இடங்களில் உள்ள வாஷ் பேசின்களில் கை கழுவுவதோடு, கிட்டத்தட்ட குளிப்பது.
8. சூப்பர் மார்க்கெட்டுகளில் குழந்தைகளை மிக சுதந்திரமாக அவர்களையே பொருள்களை எடுக்க அனுமதித்து..அவை பொருள்களைத் தட்டிவிடுவதை ரசிப்பது.
9. ரயில்களில், பஸ்களில் லக்கேஜ் வைக்கும் இடத்தில் முழுமையாக ஆக்கிரமித்து ஏகப்பட்டதை அடுக்கி, அடுத்த பயணிக்குரிய நியாயமான இடத்தையும் அனுமதிக்காமல் சண்டை வளர்ப்பது.
10. திரையரங்குகளில் படம் ஓடும்போது..மற்றவர்களுக்கு செய்யும் இடைஞ்சல் என்று புரியாமல் அல்லது புரிந்தே போன் அழைப்புகளை ஏற்று சத்தமாகப் பேசுவது.

அநாகரிக அட்ராசிட்டீஸ்..நீங்களும் தொடரலாம்.

(பிரபல எழுத்தாளர் பட்டுக்கோட்டை பிரபாகரின் முகநூல் பதிவு)