கடினமான உடற்பயிற்சிகளை விட குறைந்த தீவிரத்தன்மை கொண்ட எளிதான உடற்பயிற்சிகளை செய்யும்போது மூளை சிறப்பாக இயங்குவதாகவும், அறிவாற்றல் பெருகுவதாகவும் ஆய்வு ஒன்றில் தெரிய வந்துள்ளது.
நமது உடலை ஆரோக்கியமாக வைத்துக்கொள்ள உடற்பயிற்சி இன்றியமையாததாக மாறிவிட்டது. மாறிவரும் நவீன உலகத்தில், என்னதான் உணவு முறைகளை சரியாக மேற்கொண்டாலும், உடலியக்க செயல்பாடுகளை சீராக வைத்துக்கொள்ள அனைத்து வயதினருமே உடற்பயிற்சி மேற்கொள்ள அறிவுறுத்தப்படுகிறார்கள்.
வழக்கமாக உடல் உறுப்புகள் சீராக இயங்கவும், உடலும், மனமும் அமைதியுடன் இருக்கவும் உடற்பயிற்சியை மேற்கொள்கின்றனர். உடல் எடையை குறைப்பதற்கு மட்டுமின்றி, உடலில் ஏற்படும் பல்வேறு பிரச்னைகளைத் தீர்க்கவும் குறிப்பாக பல உடற்பயிற்சிகள் உதவுகின்றன.
இந்நிலையில், உடற்பயிற்சியினால் மூளையில் ஏற்படும் மாற்றங்கள் குறித்து ஜெர்மனியில் உள்ள பல்கலைக்கழகத்தைச் சேர்ந்த ஆராய்ச்சியாளர்கள் ஆய்வு மேற்கொண்டனர்.
இந்த ஆய்வில், குறைந்த தீவிரம் கொண்ட(எளிதான) உடற்பயிற்சி, அதிக தீவிரம் கொண்ட(கடினமான) உடற்பயிற்சி என இரண்டு பிரிவுகளாக பிரிக்கப்பட்டன. அதனடிப்படையில் மனிதனின் மூளையில் ஏற்படும் மாற்றங்களை Rs-fMRI என்ற நவீன தொழில்நுட்பத்தின் உதவியுடன் கண்காணிக்கப்பட்டது.
அப்போது, குறைந்த தீவிரம் கொண்ட உடற்பயிற்சி நல்ல அறிவாற்றலை ஏற்படுத்துகிறது. ஒரு செயலை மிகுந்த ஈடுபாட்டுடன் கவனத்துடன் செய்வதற்கு உதவுகிறது என்றும், அதிக தீவிரம் கொண்ட கடுமையான உடற்பயிற்சிகள் உடல் ரீதியாக அதிகப்படியான மாற்றங்களை ஏற்படுத்துகிறது. பல்வேறு மனித உணர்ச்சிகளை தூண்டுவதில் வழிவகுக்குகிறது என்றும் தெரிவிக்கப்பட்டுள்ளது.
மிகக் கடினமான பயிற்சிகளை விட எளிதான உடற்பயிற்சிகளை மேற்கொள்வது மூளையின் செயல்பாடுகளை சீராக வைத்துக்கொள்ள உதவுகிறது என்று ஆய்வு முடிவில் கூறப்பட்டுள்ளது.
மேலும், முதல்முறையாக உடற்பயிற்சிகளின் தன்மையை பொறுத்து மூளையின் செயல்பாடு மாறுவதை ஆராய்ச்சியாளர்கள் கண்டறிந்துள்ளனர். மேலும், இதுகுறித்து தொடர்ந்து ஆய்வு மேற்கொள்ள இருப்பதாக தெரிவித்தனர்.