திருச்சி மாவட்டத்தில் லால்குடி, புள்ளம்பாடி, மண்ணச்சநல்லூர், முசிறி, தொட்டியம், தா.பேட்டை, துறையூர், உப்பிலியபுரம் உள்ளிட்ட 8 ஒன்றியங்களுக்கான வாக்குப்பதிவு திங்கள்கிழமை காலை 7 மணிக்கு தொடங்கியது.
கிராம ஊராட்சித் தலைவர், கிராம ஊராட்சி வார்டு உறுப்பினர், மாவட்ட ஊராட்சி வார்டு உறுப்பினர், ஊராட்சி ஒன்றியம் வார்டு உறுப்பினர் உள்ளிட்ட 2,093 பதவிகளுக்கு வாக்குப்பதிவு நடைபெறுகிறது. இதில் 7 ஆயிரத்துக்கும் மேற்பட்டோர் போட்டியிடுகின்றனர். 1,337 வாக்குச் சாவடிகள் ஏற்படுத்தப்பட்டுள்ளன.
மாவட்ட ஆட்சியர் சு. சிவராசு, மண்ணச்சநல்லூர் ஒன்றியம் உத்தமர்சீலி வாக்குச் சாவடியில் ஆய்வு செய்தார். பொதுமக்கள் ஆர்வமுடன் அதிகாலை முதலே வரிசையில் நின்று வாக்களித்து வருகின்றனர்.