மக்கள் மீது அக்கறை இருந்தால் கேஜரிவால் பதவி விலக வேண்டும்: தில்லி பாஜக

தில்லி கலால் கொள்கை வழக்கில் அமலாக்கத் துறையால் கைது செய்யப்பட்டுள்ள முதல்வா் அரவிந்த் கேஜரிவால் பதவி விலக வேண்டும் என்று தில்லி பாஜக வியாழக்கிழமை வலியுறுத்தியுள்ளது. மேலும், மாநகரம் அரசமைப்புச்சட்ட நெருக்கடியை எதிா்கொள்வதாகவும் அக்கட்சி தெரிவித்தது. இது தொடா்பாக தில்லி பாஜக தலைவா் வீரேந்திர சச்தேவா, வடகிழக்கு தொகுதி பாஜக எம்.பி. மனோஜ் திவாரி ஆகியோா் செய்தியாளா்களிடம் கூறியதாவது: கேஜரிவால் கைது செய்யப்பட்ட பிறகு ஆம் ஆத்மி கட்சியில் இருந்து யாரையும் முதல்வராக உருவாக்கி இருக்கலாம். தில்லி மிகப்பெரிய அரசமைப்புச்சட்ட நெருக்கடியில் உள்ளது. உங்களை (கேஜரிவால்) தோ்ந்தெடுத்த தில்லி மக்கள் மீது உங்களுக்கு கொஞ்சமாவது அக்கறை இருந்தால், நீங்கள் யாரையும் (ஆம் ஆத்மி கட்சியில் இருந்து) முதல்வராக்கியிருக்கலாம்‘. முதல்வா் நாற்காலி பதவிக்காக ஆம் ஆத்மி கட்சியில் உள்கட்சி பூசல் நிலவிவருகிறது. விசாரணை அமைப்பின் காவலில் இருந்து அரசாங்கத்தை நடத்துவது எந்த வகையில் அரசியலமைப்புச் சட்டத்தின் செல்லுபடியாகும்? உலகில் யாரோ ஒருவா் சிறையில் இருந்துகொண்டு அரசாங்கத்தை நடத்துவதற்கான ஒரு உதாரணத்தை எங்களுக்குக் காட்டுங்கள். உங்களிடம் ஏதேனும் நெறிமுறைகள் இருந்தால் ராஜிநாமா செய்யுமாறு கேட்டுக்கொள்கிறோம். மேலும், சிறையில் இருந்து நிா்வாகத்தை நடத்தலாம் என்றால் ஆம் ஆத்மி கட்சி மனீஷ் சிசோடியா மற்றும் சத்யேந்தா் ஜெயினை ராஜிநாமா செய்யுமாறு கேட்டுக்கொண்டது? என்று இருவரும் கேள்வி எழுப்பினா். தில்லி அமைச்சா் அதிஷி புதன்கிழமை கூறுகையில், கேஜரிவால் கைது செய்யப்பட்டதைத் தொடா்ந்து தேசிய தலைநகரில் குடியரசுத் தலைவா் ஆட்சி அமல்படுத்தப்பட்டால், அது ‘அரசியல் பழிவாங்கும்‘ ஒரு தெளிவான விவகாரமாக இருக்கும் என்று கூறியிருந்தாா். தில்லி அரசை சிறையில் இருந்து இயக்க முடியாது என்று துணைநிலை ஆளுநா் வி.கே. சக்சேனா கூறியதற்கு பதில் அளிக்கும் வகையில் அமைச்சா் அதிஷி இக்கருத்தைத் தெரிவித்திருந்தாா். அவா் மேலும் கூறுகையில், ‘அவா் வரைந்து கொண்டிருக்கும் அரசியலமைப்பு விதி என்ன? நாட்டின் சட்டம் மிகவும் தெளிவாக உள்ளது. நீங்கள் சபையின் பெரும்பான்மையை அனுபவிக்கவில்லை என்றால் நீங்கள் முதலமைச்சராக இருக்க முடியாது என்று மிகத் தெளிவாக ஜிஎன்சிடிடி சட்டம் உங்களிடம் உள்ளது. இந்த நிபந்தனைகள் பொருந்தாது எனில், எந்த நிபந்தனைகளின் கீழ் குடியரசுத் தலைவா் ஆட்சி அமல்படுத்தப்படும்?‘ என்று அவா் கேள்வி எழுப்பியிருந்தாா். தில்லி கலால் கொள்கை தொடா்பான பணமோசடி வழக்கில் கேஜரிவால் மாா்ச் 21 அன்று அமலாக்கத் துறையால் கைது செய்யப்பட்டாா், அதன் பின்னா் நீதிமன்றத்தால் மாா்ச் 28 வரை ஏஜென்சி காவலில் வைக்கப்பட்டாா். அந்தக் காவல் ஏப்ரல் 1வரை நீட்டிக்கப்பட்டுள்ளது.