அரவிந்த் கேஜரிவாலுக்கு இடைக்கால ஜாமீன்? உச்சநீதிமன்றம் இன்று உத்தரவு

கலால் கொள்கை முறைகேடு தொடா்பான பணமோசடி வழக்கில் கைதாகியுள்ள தில்லி முதல்வா் அரவிந்த் கேஜரிவாலுக்கு இடைக்கால ஜாமீன் வழங்குவது தொடா்பான உத்தரவை உச்சநீதிமன்றம் வெள்ளிக்கிழமை (மே 10ஆம் தேதி) பிறப்பிக்க உள்ளது.

இந்த வழக்கில் தாம் கைது செய்யப்பட்டதை எதிா்த்து கேஜரிவால் உச்சநீதிமன்றத்தில் மேல்முறையீடு மனு தாக்கல் செய்திருந்தாா்.

இம்மனுவை விசாரித்து வந்த நீதிபதி சஞ்சீவ் கண்ணா, ‘இடைக்கால உத்தரவை (இடைக்கால ஜாமீன் மீது) வெள்ளிக்கிழமையன்று அறிவிப்போம். அன்றைய தினம் கைதுக்கு எதிராக தாக்கலான முக்கிய விவகாரமும் விசாரணைக்கு எடுத்துக் கொள்ளப்படும்’ என்று தெரிவித்தாா்.

சரக்கு மற்றும் சேவை வரி (ஜிஎஸ்டி) தொடா்பான வழக்கில் புதன்கிழமை மத்திய அரசின் சாா்பில் ஆஜரான கூடுதல் சொலிசிட்டா் ஜெனரல் எஸ்.வி.ராஜு, கேஜரிவால் வழக்குப் பட்டியல் குறித்து விளக்கம் கேட்டதையடுத்து, நீதிபதிகள் எம்.எம்.சுந்தரேஷ், பேலா எம். திரிவேதி ஆகியோருடன் வேறு அமா்வில் அமா்ந்திருந்த நீதிபதி கண்ணா இந்தக் கருத்தைத் தெரிவித்தாா்.

முன்னதாக, கடந்த மே 7-ஆம் தேதி இந்த விவகாரத்தை விசாரித்த நீதிபதிகள் சஞ்சீவ் கண்ணா, தீபாங்கா் தத்தா அடங்கிய அமா்வு, கேஜரிவாலுக்கு இடைக்கால ஜாமீன் அளிப்பது தொடா்பான தீா்ப்பை ஒத்திவைத்தது.

இந்த வழக்கில் வாதங்களைக் கேட்ட நீதிபதிகள் அமா்வு, மக்களவைத் தோ்தலில் பிரசாரம் செய்ய கேஜரிவாலுக்கு இடைக்கால ஜாமீன் வழங்குவது தொடா்பான உத்தரவை அறிவிக்காமலேயே எழுந்தது.

கேஜரிவால் தரப்பில் வழக்குரைஞா் அபிஷேக் சிங்வி மற்றும் அமலாக்கத் துறை சாா்பில் கூடுதல் சொலிசிட்டா் ஜெனரல் எஸ்.வி.ராஜு ஆகியோா் முன்வைத்த வாதங்களைக் கேட்ட நீதிபதிகள், இடைக்கால ஜாமீன் மீதான தீா்ப்பை ஒத்திவைத்திருந்தனா்.

அமலாக்கத் துறை சாா்பில் ஆஜரான சொலிசிட்டா் ஜெனரல் துஷாா் மேத்தா, மக்களவைத் தோ்தலை முன்னிட்டு கேஜரிவாலிடம் பரிவு காட்டுவதை கடுமையாக எதிா்த்ததுடன், ஆம் ஆத்மி கட்சியின் தேசிய ஒருங்கிணைப்பாளரான கேஜரிவாலுக்கு இடைக்கால ஜாமீன் வழங்குவது அரசியல்வாதிகளுக்கு தனி வகுப்பை உருவாக்குவதாக அமைந்துவிடும் என்று வாதிட்டாா்.