ஏழுமலையான் கோயில் தவிர திருப்பதி தேவஸ்தானம் நிர்வகிக்கும் மற்ற கோயில்களின் ஆர்ஜித சேவா டிக்கெட்டுகள் வரும் ஏப். 5-ஆம் தேதி இணையதளத்தில் வெளியிடப்பட உள்ளன.
இது தொடர்பாக தேவஸ்தானத்தின் திருப்பதி பிரிவு செயல் இணை அதிகாரி லட்சுமிகாந்தம் கூறியது:
தேவஸ்தானம் நிர்வகிக்கும் திருச்சானூர் பத்மாவதி தாயார் கோயில், திருப்பதி கோவிந்தராஜர் கோயில், சீனிவாசமங்காபுரம் கல்யாண வெங்கடேஸ்வரர் கோயில், அப்பளாயகுண்டா பிரசன்ன வெங்கடேஸ்வரர் கோயில், ஒண்டிமிட்டாவில் உள்ள கோதண்டராமர் கோயில், திருப்பதி கோதண்டராமர் கோயில் உள்ளிட்ட கோயில்களில் நடத்தப்படும் ஆர்ஜித சேவைகளை முன்பதிவு செய்யும் வசதியை தேவஸ்தானம் தற்போது ஏற்படுத்தியுள்ளது.
அதன்படி ஜூலை மாதத்துக்கான ஆர்ஜித சேவா டிக்கெட்டுகள் வரும் ஏப்.5-ஆம் தேதி தேவஸ்தான இணையதளத்தில் வெளியிடப்பட உள்ளன. பக்தர்கள் அவற்றை முன்பதிவு செய்து கொண்டு ஆர்ஜித சேவையில் பெருமாளையும், அம்மனையும் தரிசிக்கலாம்.
திருப்பதியில் உள்ள தேவஸ்தானத்துக்குச் சொந்தமான வாடகை அறை வளாகங்களின் ஜூலை மாத இணையதள முன்பதிவும் ஏப்.5-இல் தொடங்க உள்ளது என்றார் அவர்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
