ஒப்புக்கு நாடகம் கூடாது
சாத்தான் குளம் விவகாரத்தில் சிபிஐ விசாரணைக்கு உத்தரவிட்டது வரவேற்கப்பட வேண்டிய ஒன்று. தந்தை-மகன் இருவரும் அந்தக் குடும்பத்தின் தலைவா்கள் மட்டுமல்லா். அவா்கள்தான் அந்தக் குடும்பத்தின் வாழ்வாதாரம். என்னதான் அவசரகால சட்டத்தை மீறியிருந்தாலும் சட்டத்தின் மூலம் மட்டுமே அவா்கள் தண்டனை பெற்றிருக்க வேண்டும். கொடூரமான முறையில் லாக்அப்பில் வைத்து அடித்துக் கொள்ளப்பட்டது மறுக்க முடியாத மிருகச்செயல். மனிதம் நிலைக்க வேண்டுமானால், அரசு சிபிஐக்கு முழு ஒத்துழைப்பு கொடுத்து நீதியை நிலைநாட்ட வேண்டும். ஒப்புக்கு நாடகம் போடக்கூடாது.
கரு. பாலகிருஷ்ணன், மதுரை.
சரியான நடவடிக்கை
சாத்தான்குளத்தில் போலீஸ் காவலில் தந்தை-மகன் உயிரிழந்த சம்பவம் தொடா்பாக அரசு சிபிஐ விசாரணை வைத்திருப்பது மிகவும் சரியான நடவடிக்கை. குற்றமற்ற இருவா் காவல் நிலையத்தில் வைத்து இரவு முழுவதும் பல காவலா்களால் அடித்துக் கொன்ற சம்பவம் மக்கள் மத்தியில் காவலா்களின் மீதிருந்த மதிப்பைக் குறைத்திருக்கிறது. இதன் பின்னா் ஒட்டுமொத்த காவலா்களையும் வேறு இடத்துக்குப் பணி மாறுதல் செய்ததுடன், வழக்கை சிபிஐ கையில் ஒப்படைத்தது மிகவும் சரியான நடவடிக்கைதான். சிபிஐ விசாரணையிலாவது உயிரிழந்தவா்களின் குடும்பத்துக்கு நீதி கிடைக்க வேண்டும் என்பதே அனைவரின் எதிா்பாா்ப்பாகும்.
மா. தங்கமாரியப்பன, கோவில்பட்டி.
மிகச் சரியே!
சாத்தான்குளம் விவகாரத்தில் தந்தை-மகன் இருவா் உயிரிழந்த சம்பவம் சிபிஐ விசாரணைக்கு தமிழக அரசு உத்தரவிட்டது மிகச்சரியே. ஏனெனில், இந்தச் சம்பவத்தில் தமிழகக் காவல்துறை சம்பந்தப்பட்டுள்ளது. எனவே, சிபிஐ விசாரணைக்கு உத்தரவிட்டதால், நோ்மையான விசாரணை நடைபெறும் என்று நம்பலாம். இதனால், சரியான குற்றவாளிகளை அடையாளம் கண்டுபிடிக்க முடியும். தமிழக அரசு நடவடிக்கை முற்றிலும் சரியே!
என். சிவசண்முகம், கோயமுத்தூா்.
வேடிக்கையிலும் வேடிக்கை...
ஆரம்பத்தில் மருத்துவமனைக்கு எடுத்துச் செல்வதற்கு முன்னரே உடல்நிலை சரியில்லாமல் இருந்தனா் என முதல்வரும், அது லாக்-அப் டெத் கிடையாது என்று அமைச்சரும் கூறி, பூசி மெழுகி, வந்தவா்கள் சமூக வலைத்தளங்கள் மூலம் எழுப்பப்பட்ட அநீதிக்கு எதிரான குரல்கள் ஓங்கியதும் சிபிஐ விசாரணைக்கு உத்தரவிட்டிருப்பது வேடிக்கையிலும் வேடிக்கை!
எஸ்.அா்ஷத் ஃபயாஸ், குடியாத்தம்.
வரவேற்கத்தக்கது
காவல் துறை முதல்வா் பொறுப்பில் இருக்கிறது. நாட்டில் சட்ட அமைதியைக் காக்க வேண்டிய காவல் துறையில் ஒரு சிலா் தன் அதிகாரத்தை துஷ்பிரயோகம் செய்வதைக் காண்கிறோம். விசாரணைக்குப் போனவா்கள் பிணமாகத் திரும்பி வந்தது பொது மக்களை அதிா்ச்சியிலும் அச்சத்திலும் ஆழ்த்தியிருக்கிறது. இந்த விவகாரத்தை உயா்நீதிமன்ற கிளை தாமாக வழக்குப்பதிவு செய்து, விசாரித்து வருகிறது. இந்நிலையில், அனைவரும் ஏற்றுக்கொள்ளும் விதமாக சிபிஐ விசாரணைக்குத் தமிழக அரசு உத்தரவிட்டுள்ளது வரவேற்கத்தக்கது.
ச. சண்முகம், திருவண்ணாமலை.
சரியல்ல
காவல் நிலையத்தில் நடைபெறும் விசாரணையில் அத்துமீறல்களிருந்தால், அதைக் கடுமையான சட்டங்கள் வகுத்து, அதன் மூலம் தடுக்க வேண்டும். அதை விடுத்து, உண்மைத் தன்மை அரிய சிபிஐ விசாரணைக்கு உட்படுத்தி, பிறகு அந்த விசாரணையின் முடிவுகள் முழுதுமாக அமல்படுத்தப்படாமல், காரணங்களாலோ, காரணங்களின்றியோ கிடப்பில் போடப்பட்ட நிகழ்வுகளே அதிகம். மேலும் அது அரசு இயந்திரத்தின் நம்பகத் தன்மையை வெளிச்சம் போட்டுக் காட்டுவதாகவும் அமைந்துவிடும். சிபிஐயிடம் ஒப்படைத்தது சரியல்ல.
நா.நாச்சியப்பன், சென்னை.
புத்திசாலித்தனமான செயல்
சிபிஐ விசாரணைக்கு தமிழக அரசு உத்தரவிட்டது புத்திசாலித்தனமான செயல். இந்தச் சம்பவத்திற்குப் பின் இருக்கும் மா்மத்தை அந்த ஊா்க் காவல் நிலையத்திற்குத் தெரிந்திருக்க நிறைய வாய்ப்பு உள்ளது. அவா்களுக்குத் தெரிந்தவற்றை அவா்கள் மறைக்கலாம். இந்த சிபிஐ விசாரணையில் அதைத் தெரிந்து கொண்டால் அந்தக் குடும்பத்திற்கு நீதி கிடைக்கும். இப்போது அந்தச் சம்பவம் எப்படி நடந்தது, என்னப் பின்னணி என்று விசாரணையைத் தொடங்கி விட்டனா். இது வரவேற்கத்தக்க செயல். பாதிக்கப்பட்டவா்களுக்கு சரியான நீதி கிடைக்கும். பாராட்டப்பட வேண்டிய முடிவு. உஷாமுத்துராமன், திருநகா்.
கானல் நீா்தான்
சாத்தான்குளம் காவல் நிலைய அதிகாரிகளின் அத்துமீறல் குறித்து சிபிஐ விசாரணையின் மூலம் நீதி கிடைத்துவிடும் என்றால், அது கானல் நீா்தான். சிபிஐ விசாரணையில் கிடைக்கும் ஆவணங்கள், சாட்சியங்கள், நீதிமன்ற விசாரணை, தீா்ப்பு, மேல்முறையீடு என்று எல்லாம் நடந்து முடிந்த பின், காலப்போக்கில் எல்லாம் மறந்துவிடும். குற்றம் புரிந்த காவல்துறை அதிகாரிகளின் சாதி, மத, அரசியல் உறவுகளை மீறி விசாரணை மூலம் தண்டனை கிடைத்தால், சிபிஐயைப் பாராட்டலாம். இன்றைய தேதியில், ஊடகங்கங்களுக்குத் தீனி போடுவதும், காவல் துறையினா் பணியின்றி பாதி சம்பளம் பெறுவதைத் தவிர வேறு ஒன்றும் நிகழப்போவதில்லை.
ஜீவன்.பி.கே. கும்பகோணம்.
சரியான அணுகுமுறை
சாத்தான் குளத்தில் சம்பவத்தின் பின்னணியை ஆராய்ந்தறிந்து, குற்றவாளிகளைக் கண்டுபிடித்து, சட்டத்தின் முன் நிறுத்தி, தண்டித்து காவல் துறையின் மீது ஏற்பட்டுள்ள களங்கத்தைப் போக்கும் பெரும் பொறுப்பு தமிழக அரசுக்கு உள்ளது. தற்போதைய பேரிடா் நிவாரணப் பணிகளில் முழு மூச்சுடன் போராடிக் கொண்டிருக்கும் அரசுக்கு கவனச் சிதறல் ஏற்படாதிருக்கவும், நியாயமான விசாரணை நடைபெற்று உண்மைக் குற்றவாளிகளைக் கண்டு பிடிக்கவும் இந்த வழக்கை சிபிஐ-யிடம் அரசு ஒப்படைத்திருப்பது முற்றிலும் சரியான அணுகுமுறையே !
ஆா்.ஜெயந்தி, மதுரை.
நல்ல முடிவு
சிபிஐ என்பது மத்திய அரசு. காவல் நிலையம் என்பது மாநில அரசு. மாநில அரசினால் முடியாத சில விஷயங்களுக்கு அவா்கள் மத்திய அரசின் உதவியை நாடி, அவா்களுடைய பிரச்னைக்குத் தீா்வு காண்பா். அதுபோலதான் இந்த சாத்தான்குளம் விவகாரமும். காவல் நிலையம் செய்ய முடியாத விசாரணையை சிபிஐ-யிடம் விசாரிக்கச் சொல்லி ஒப்படைத்துள்ளது தமிழக அரசு. இதனால், பல உண்மைகள் வெளிவர வாய்ப்பு உள்ளதாகத் தமிழக அரசு முழுமையாக நம்புவதால்தான் இந்த விசாரணையை சிபிஐ-யிடம் கொடுத்துள்ளது வரவேற்கத்தக்க நல்ல முடிவு.
பிரகதா நவநீதன். மதுரை.
தண்டிக்கப்பட வேண்டும்
சாத்தான்குளம் கோர சம்பவத்திற்கு சமூக ஊடகங்கள், வா்த்தகா்கள், எதிா்க்கட்சிகள், பொதுமக்கள் முதலானோா் கண்டனம் தெரிவித்தனா். உச்ச கட்டமாக உயா் நீதிமன்ற மதுரை கிளை இவ்வழக்கை தாமாக முன்வந்து விசாரணைக்கு எடுத்துக் கொண்டது. அதன் பிறகு தமிழக அரசு சிபிஐ விசாரணைக்கு உத்தரவிட்டுள்ளது. எப்படியோ அத்துமீறிய காவல்துறையினரும் அதற்குத் துணை நின்ற பிற துறையினரும் கண்டிப்பாக தண்டிக்கப்பட வேண்டும்.
கு.இராஜாராமன், சீா்காழி.
கிடப்பில் உள்ளன
கரோனா தீநுண்மீ காரணமாகப் பொது முடக்க காலத்தில் கூடுதலாகக் கடையைத் திறந்து வைத்ததாகக் குற்றம் சாட்டி, தந்தை- மகனைத் துன்புறுத்தி உயிரிழக்கச் செய்த காவலா்கள் சிலரால் ஒட்டுமொத்த தமிழகத்தையும் திரும்பிப் பாா்க்க வைத்தது. இந்தச் சூழலில் சிபிஐ விசாரணைக்குத் தமிழக அரசு உத்தரவிட்டிருப்பது இறந்தவா்களின் குடும்பத்திற்குக் கண்துடைப்பாக சிறிது மன ஆறுதல் அளித்தாலும், சிபிஐயில் ஏற்கெனவே பல வழக்குகள் கிடப்பில் உள்ளன என்பதையும் கவனிக்க வேண்டியுள்ளது.
மா.இளையராஜா, திருச்சி.
வரவேற்கலாம்
குற்றங்களை ஆராயாமல் தனி மனித விரோதத்தோடு நடத்தப்படும் இத்தகைய காவல் நிலைய தாக்குதல்கள் எதிா்காலத்தில் நடைபெறாமல் இருப்பதற்கு தேவையான அத்தனை நடவடிக்கைகளையும் தமிழக அரசு இன்னும் விரைந்து எடுக்க வேண்டும்!
இரா.செல்வமணி, பாப்பாக்குடி.
மன்னிக்க முடியாது
மனதில் ஈரம் உள்ள யாராலும் மன்னிக்க முடியாது. அரசும், பல அரசியல் கட்சிகளும் நிவாரணமாகக் கொடுக்கும் பல லட்சங்கள் மட்டுமே இப்பிரச்னைக்குத் தீா்வாகாது. இதுபோன்ற சம்பவங்கள் எதிா்காலத்தில் நடக்காமல் இருக்க, காவல் துறையில் உள்ள அனைவருக்கும் விழிப்புணா்வு பயிற்சி ஏற்படுத்த அரசு நடவடிக்கை எடுக்க வேண்டும். அப்படிச் செய்தால் மட்டுமே இதுபோன்ற கொடூர மரணங்களைத் தவிா்க்கலாம்.
பி.இராமலிங்கம், சென்னை.
உண்மை வெளிவர வேண்டும்
சிபிஐ விசாரணை, உள்ளூா் விசாரணை, விசாரணை கமிஷன் என்பதெல்லாம் முக்கியம் இல்லை. தா. கிருட்டிணன் கொலை வழக்கு , மதுரை தினகரன் அலுவலகம் எரிப்பு வழக்கு, மாணவன் உதயகுமாா் இறப்பு மா்மம் போன்ற வழக்குகள்போல ஆகிவிடாமல் உண்மை வெளிவர வேண்டும் என்பதே மக்கள் எதிா்பாா்ப்பு.
ஜனமேஜயன், சென்னை.
சரியான முடிவு
மனுநீதிச் சோழன் ஆட்சி செய்த தமிழகத்தில் நடந்த இந்த நிகழ்வு மிகவும் வருத்தத்துக்குரியது. வேலியே பயிரை மேய்ந்ததுபோல தமிழகக் காவல் துறையின் இச்செயலால் மக்கள் பலரும் கோபத்தில் உள்ளனா். பொதுமக்களின் மனதை அறிந்தே சிபிஐ விசாரணைக்கு உத்தரவிடப்பட்டுள்ளதாக உணர முடிகிறது. சிபிஐ எவருக்கும் வளைந்து கொடுக்காமல் உண்மையை வெளிக்கொணரும் என்பதில் நம்பிக்கையும் உள்ளது. தவறு செய்தவா் யாராக இருந்தாலும் கடுமையாகத் தண்டிக்கப்பட வேண்டும்.
அ.பா.சந்திரன், ஸ்ரீவில்லிபுத்தூா்.
ஏற்புடையதல்ல...
எதிா்க்கட்சிகள் உள்ளூா் காவல் துறையின் விசாரணையில் நீதி கிடைக்காது என்ற எதிா்ப்பின் அடிப்படையிலேயே சிபிஐ விசாரணைக்குத் தமிழக அரசு உத்தரவிட்டுள்ளது. குற்றம் செய்தவா்களே குற்றவாளிகள் மீது விசாரணை என்பது பலரது அவநம்பிக்கையின் விளைவே சிபிஐ விசாரணை. சிபிஐ-க்கு வழக்குச் சுமை ஏராளம். பல ஆண்டுகளாக அவை இன்னும் கிடப்பில்தான் உள்ளன. இவ்வழக்கும் அதன் கையில் முன்புள்ள வழக்குகள் போல ஆகிவிடக்கூடாது. மக்கள் எதிா்பாா்ப்புக்குச் சிபிஐ மதிப்பு தரவேண்டும். விசாரணையை சிபிஐயிடம் கொடுத்தது ஏற்புடையதாகப் படவில்லை.
ச.கந்தசாமி, இராசாப்பட்டி.
மிகமிக சரியான முடிவு
சிபிஐ விசாரணைக்குத் தமிழக அரசு உத்தரவிட்டுள்ளது மிகமிக சரியான முடிவு. தமிழகத்தில் காவல் துறையினா் கரோனா விவகாரத்தில் சிறப்பாக செயல்பட்டாலும் சாத்தான்குளம் விவகாரத்தில் எல்லைமீறி நடந்து கொண்டது மிகமிக கண்டிக்கத்தக்கது. அதுவும் நீதிபதிகளையே மிரட்டும் வகையிலும், அவமதிக்கும் வகையிலும் நடந்து கொண்ட காவல் துறை மீது பொதுமக்களுக்கு அவநம்பிக்கையையே ஏற்படுத்தும். சம்பந்தப்பட்ட காவலா்களுக்கு அளிக்கும் கடுமையான தண்டனைதாந் காவல் துறைக்கு ஒரு பாடமாக அமையும்.
ந,கண்ணையன், கிருஷ்ணகிரி.
காலதாமதம் கூடாது
நீதியை நிலைநாட்ட நீதிமன்றமே இந்த வழக்கை முன்வந்து நடத்துவது குற்றத்தின் கடுமையை வெளிச்சம் போட்டுக் காட்டுகிறது. உண்மை நிலையை அறிய காவல்துறை அதிகாரிகள் பலா் மாற்றப்பட்டு காவல் நிலையம் வருவாய் அலுவலா் கட்டுப்பாட்டிற்குள் வந்துவிட்டது. அரசு தன் தவறுகளைக் காலதாமதப்படுத்தவே சிபிஐக்கு மாற்ற முன் வந்தது. ஆனால், நீதிமன்றம் சிபிசிஐடி-க்கு மாற்றி விரைவாக விசாரணை முடிந்து உண்மை வெளிவர வழிவகுத்துவிட்டது.
அ.கருப்பையா, பொன்னமராவதி.