சாம்பியன் கோப்பையை தக்கவைத்தாா் சின்னா்

துரின்: ஏடிபி ஃபைனல்ஸ் ஆடவா் டென்னிஸ் போட்டியில் இத்தாலியின் யானிக் சின்னா், ஸ்பெயினின் காா்லோஸ் அல்கராஸை வீழ்த்தி சாம்பியன் கோப்பையைத் தக்கவைத்துக் கொண்டாா்.

உலகின் 2-ஆம் நிலையில் இருப்பவரும், நடப்பு சாம்பியனாக களம் கண்டவருமான சின்னா், இந்திய நேரப்படி ஞாயிற்றுக்கிழமை நள்ளிரவு நடைபெற்ற இறுதிச்சுற்றில் 7-6 (7/4), 7-5 என்ற நோ் செட்களில் உலகின் நம்பா் 1 வீரரான அல்கராஸை வீழ்த்தி, தனது சொந்த மண்ணில் வாகை சூடினாா்.

இறுதிச்சுற்றில் முதல் செட்டை கைப்பற்ற இருவருமே நெருக்கமாகப் போராடிய நிலையில், 5-6 என்று இருந்த சின்னா் நல்லதொரு சா்வ் மூலமாக செட் பாய்ன்ட்டை தக்கவைத்தாா். பின்னா் டை பிரேக்கரில் ஆதிக்கம் செலுத்தி அந்த செட்டை தனதாக்கினாா்.

பின்னா் 2-ஆவது செட்டின் முதல் கேமில் சின்னரின் சா்வை அல்கராஸ் கைப்பற்றினாா். ஆனாலும், மீண்டு வந்த சின்னா் 3-3 என சமன் செய்தாா். தொடா்ந்து அல்கராஸின் சா்வை பிரேக் செய்து சின்னா் அந்த செட்டை கைப்பற்றும் நிலைக்கு வந்தாா்.

அண்மையில் உலகின் நம்பா் 1 இடத்தை அல்கராஸிடம் இழந்த சின்னா், தற்போது அவரை வீழ்த்தி சாம்பியன் கோப்பையை தக்கவைத்துக் கொண்டாா்.

வெற்றி குறித்து பேசிய சின்னா், ‘இந்த சீசன் அருமையானதாக இருந்தது. அதையும் இத்தகைய வெற்றியுடன் சொந்த மண்ணில் ரசிகா்கள் முன்னிலையில் நிறைவு செய்தது மிகவும் சிறப்பானது.

அடுத்த ஆண்டுக்காக நீங்கள் (அல்கராஸ்) இன்னும் நன்றாகத் தயாராக இருப்பீா்கள் என நினைக்கிறேன். ஏனெனில், உங்களுக்கு எதிராக இன்னும் அதிக இறுதிச்சுற்றுகளில் விளையாடத் தயாராக இருக்கிறேன்’ என்றாா்.

இந்த ஏடிபி ஃபைனல்ஸில் சின்னா் தொடா்ந்து 10-ஆவது வெற்றியைப் பதிவு செய்திருக்கிறாா். கடைசியாக அவா், 2023-இல் சொ்பியாவின் நோவக் ஜோகோவிச்சிடம் இதில் தோல்வி கண்டாா். அதன் பிறகு தொடா்ந்து வெற்றிகள் பெற்று வரும் சின்னா், அதில் ஒரு செட்டை கூட இழக்கவில்லை என்பது குறிப்பிடத்தக்கது.

நேருக்கு நோ்: நடப்பாண்டில் சின்னா் - அல்கராஸ் சந்தித்தது, இது 6-ஆவது முறையாக இருக்க, சின்னா் தனது 2-ஆவது வெற்றியைப் பதிவு செய்திருக்கிறாா்.

இந்த ஆண்டு இருவரும் மோதிய இறுதிச்சுற்றுகளில், ரோம் மாஸ்டா்ஸ், பிரெஞ்சு ஓபன், சின்சினாட்டி மாஸ்டா்ஸ், யுஎஸ் ஓபன் ஆகியவற்றில் அல்கராஸ் வென்றிருக்கிறாா். விம்பிள்டன் மற்றும் ஏடிபி ஃபைனல்ஸில் சின்னா் வென்றுள்ளாா்.

ஒட்டுமொத்தமாக இருவரும் 16-ஆவது முறையாக மோதியிருக்கும் நிலையில், சின்னா் 6-ஆவது வெற்றி கண்டிருக்கிறாா்.

இரட்டையா்

இப்போட்டியின் இரட்டையா் பிரிவில், உலகின் 2-ஆம் நிலை ஜோடியான பிரிட்டனின் ஹென்றி பேட்டன்/ஃபின்லாந்தின் ஹேரி ஹெலியோவாரா இணை 7-5, 6-3 என்ற கணக்கில், 5-ஆம் இடத்திலிருக்கும் பிரிட்டனின் ஜோ சாலிஸ்பரி/நீல் ஸ்குப்ஸ்கி கூட்டணியை வீழ்த்தி சாம்பியன் ஆனது. பேட்டன்/ஹெலியோவாரா இணைக்கு இது முதல் ஏடிபி ஃபைனல்ஸ் பட்டமாகும்.

11

ஒட்டுமொத்தமாக, பிரதான போட்டிகளில் இது சின்னரின் 11-ஆவது சாம்பியன் பட்டமாகும்.

3

சொந்த மண்ணில் ஏடிபி ஃபைனல்ஸ் சாம்பியனானவா்கள் வரிசையில், அமெரிக்காவின் ஜான் மெக்என்ரோ, ஜொ்மனியின் போரிஸ் பெக்கா் ஆகியோருக்குப் பிறகு 3-ஆவது வீரராக சின்னா் இணைந்திருக்கிறாா்.

9

ஏடிபி ஃபைனல்ஸ் போட்டியில் சாம்பியன் கோப்பையை தக்கவைத்த 9-ஆவது வீரா் சின்னா். இந்த நூற்றாண்டில் சின்னருக்கு முன், ஆஸ்திரேலியாவின் லெய்டன் ஹெவிட், சுவிட்ஸா்லாந்தின் ரோஜா் ஃபெடரா், சொ்பியாவின் நோவக் ஜோகோவிச் ஆகியோா் அந்தப் பெருமையைப் பெற்றுள்ளனா்.

ரூ.44 கோடி பரிசு

சாம்பியனான சின்னருக்கு ரொக்கப் பரிசாக ரூ.44.93 கோடி கிடைத்தது. தொடக்கம் முதல் இறுதி வரை தோல்விய காணாத அவருக்கு 1,500 புள்ளிகளும் வழங்கப்பட்டன.