ஒருநாள், டி20 ஆட்டங்களில் சிறந்த வீரராக அறியப்படும் கிறிஸ் கெயில், 103 டெஸ்டுகளில் விளையாடி 7,000 ரன்களுக்கும் அதிகமாக எடுத்துள்ளார். 301 ஒருநாள், 58 டி20 ஆட்டங்களில் விளையாடியுள்ளார். ஐபிஎல் போட்டியில் 2009 முதல் விளையாடி வருகிறார். பஞ்சாப் அணியில் இடம்பெற்றுள்ள கெயில், இந்த வருடம் இதுவரை ஓர் ஆட்டத்திலும் விளையாடவில்லை.
ஹைதராபாத் அணிக்கு எதிரான நேற்றைய ஆட்டத்தில் கெயில் ஆடவிருந்ததாக அந்த அணியின் பயிற்சியாளர் அனில் கும்ப்ளே தெரிவித்தார். ஸ்டார் தொலைக்காட்சிக்கு அளித்த பேட்டியில் அவர் கூறியதாவது:
ஹைதராபாத் அணிக்கு எதிரான ஆட்டத்தில் 41 வயது கெயில் விளையாடவிருந்தார். ஆனால் அவருக்கு உடல்நலக் குறைவு ஏற்பட்டதால் விளையாட முடியாமல் போய்விட்டது என்றார்.
பஞ்சாப் அணி தொடக்க வீரர்களாக ராகுலும் மயங்க் அகர்வாலும் சிறப்பாக விளையாடி வருவதால் கெயிலால் இதுவரை விளையாட முடியாத நிலை ஏற்பட்டுள்ளது. புள்ளிகள் பட்டியலில் பஞ்சாப் அணி தொடர்ந்து கடைசி இடத்தில் உள்ளது.