ஆஸ்திரேலியா சுற்றுப்பயணம் செய்துள்ள இங்கிலாந்து அணி அங்கு ஆஷஸ் தொடரில் பங்கேற்று விளையாடவுள்ளது. இதற்காக அங்கு சென்ற இங்கிலாந்து அணி முதலில் கிரிக்கெட் ஆஸ்திரேலியா லெவன் அணிக்கு எதிரான பயிற்சிப் போட்டியில் பங்கேற்று விளையாடியது.
அடிலெய்டில் நடந்த இந்தப் போட்டியில் டாஸ் வென்ற கிரிக்கெட் ஆஸ்திரேலியா லெவன் அணி இங்கிலாந்தை பேட்டிங் செய்ய அழைத்தது. இதையடுத்து களமிறங்கிய இங்கிலாந்து அணி முதல் இன்னிங்ஸில் 293 ரன்கள் எடுத்தது.
பின்னர் தனது முதல் இன்னிங்ஸை தொடங்கிய ஆஸ்திரேலிய லெவன் 233 ரன்கள் எடுத்தது. 60 ரன்கள் முன்னிலையுடன் 2-ஆவது இன்னிங்ஸை தொடங்கிய இங்கிலாந்து 207 ரன்களை எடுத்தது.
இந்நிலையில், 268 ரன்களை வெற்றி இலக்காகக் கொண்டு களமிறங்கிய ஆஸி. லெவன் அணி 75 ரன்களுக்குச் சுருண்டு படுதோல்வி அடைந்தது.
இதனிடையே ஆஷஸ் தொடருக்கான இங்கிலாந்து அணியின் துணைக் கேப்டனாக அந்த அணியின் மூத்த வீரரும், முன்னணி வேகப்பந்துவீச்சாளருமான ஜேம்ஸ் ஆண்டர்சன் தேர்வு செய்யப்பட்டார்.