திருவனந்தபுரத்தில் புதன்கிழமை தொடங்கிய தென்னாப்பிரிக்க 19 வயதுக்குட்பட்டோர் அணிக்கு எதிரான முதல் யூத் டெஸ்ட் ஆட்டத்தில் அந்த அணியை 197 ரன்களுக்கு ஆல் அவுட்டாக்கியது இந்தியா. சுழற்பந்துவீச்சாளர் ஹிரித்திக் ஷோகீன் 4-50 விக்கெட்டுகளை சாய்த்தார். பின்னர் ஆடிய இந்திய 19 வயதுக்குட்பட்டோர் அணி 95/3 ரன்களை சேர்த்துள்ளது.
புல்வாமா தாக்குதல் எதிரொலியாக நாக்பூரில் உள்ள விதர்பா கிரிக்கெட் சங்க மைதானத்தில் வைக்கப்பட்டிருந்த முன்னாள் பாகிஸ்தான் வீரர்களின் படங்கள் அகற்றப்பட்டன. இம்ரான் கான், ஜாவேத் மியான்டட், உள்பட பலரின் படங்கள் நீக்கப்பட்டன என சங்க தலைவர் ஆனந்த் ஜெய்ஸ்வால் தெரிவித்துள்ளார்.
ஜெர்மனி மற்றும் டச்சு சர்வதேச பாட்மிண்டன் போட்டிகளில் பங்கேற்கவுள்ள 20 பேர் கொண்ட இந்திய ஜூனியர் அணியை பாட்மிண்டன் சம்மேளனம் அறிவித்துள்ளது. டச்சு போட்டி பிப். 27 முதல் மார்ச் 3 வரையும், ஜெர்மன் போட்டி மார்ச் 7 முதல் 10 வரையும் நடக்கவுள்ளது.
இந்தியன் சூப்பர் லீக் கால்பந்து போட்டியின் பட்டியலில் முதலிடம் பெறுவதற்கான முயற்சியில் எப்ஃசி பெங்களூரு-எப்ஃசி கோவா அணிகள் பெங்களூருவில் வியாழக்கிழமை நடைபெறும் ஆட்டத்தில் மோதுகின்றன.