ஆஸ்திரேலிய ஓபன் டென்னிஸ் போட்டியின் அரையிறுதிச் சுற்றுக்கு ஆடவர் பிரிவில் ரபேல் நடால், ஸ்டெபானோ சிட்ஸிபாஸ், மகளிர் பிரிவில் குவிட்டோவா, டேனியல் காலின்ஸ் ஆகியோர் தகுதி பெற்றுள்ளனர்.
மெல்போர்னில் செவ்வாய்க்கிழமை காலிறுதி ஆட்டங்கள் நடைபெற்றன. ஆடவர் பிரிவில் நடைபெற்ற ஆட்டம் ஒன்றில் உலகின் இரண்டாம் நிலை வீரரரும், 17 முறை கிராண்ட்ஸ்லாம் பட்டம் வென்றவருமான நடாலும்-அமெரிக்க வீரர் பிரான்ஸஸ் டியாபோவும் மோதினர். இதில் 6-3, 6-4, 6-2 என்ற நேர் செட்களில் வென்று அரையிறுதிக்கு தகுதி பெற்றால் நடால்,
மற்றொரு காலிறுதியில் கிரீஸ் வீரர் சிட்ஸிபாஸும், ஸ்பெயினின் ராபர்டோ அகுட்டும் மோதினர். நடப்பு சாம்பியன் பெடரரை வென்ற உற்சாகத்தோடு களமிறங்கிய 20 வயது சிட்ஸிபாஸ் முதல் செட்டை 7-5 என போராடி வென்றார். அடுத்த செட்டை 6-4 என ராபர்ட்டோ கைப்பற்றினார். பின்னர் சுதாரித்துக் கொண்ட சிட்ஸிபாஸ் 6-4, 7-6 என்ற செட் கணக்கில் வென்று அரையிறுதிக்கு தகுதி பெற்றார்.
கடந்த 2003-இல் ஆண்டி ராடிக்குக்கு பின் அரையிறுதிக்கு தகுதி பெற்ற இளம் வீரர் என்ற சிறப்பையும், முதல் கிரேக்க வீரர் என்ற சிறப்பையும் பெற்றார் சிட்ஸிபாஸ். நடாலை அரையிறுதியில் எதிர்கொள்கிறார்.
மகளிர் பிரிவு: மகளிர் பிரிவு காலிறுதி ஆட்டம் ஒன்றில் 8-ஆம் நிலை வீராங்கனை செக்.குடியரசின் குவிட்டோவா 6-1, 6-4 என்ற செட் கணக்கில் ஆஸி.யின் இளம் வீராங்கனை ஆஷ்லி பர்டியை வீழ்த்தி அரையிறுதிக்கு தகுதி பெற்றார். கடந்த 2016 டிசம்பர் மாதம் குவிட்டோவின் கைகளில் கத்தியால் திருடன் ஒருவர் குத்தியதால் பலத்த காயமடைந்தார். கை விரல் நரம்புகள் அறுந்ததால், பல மாதங்கள் குவிட்டோவா ஆடுகளத்துக்கு வரமுடியாமல் போனது. இரண்டு முறை விம்பிள்டன் சாம்பியன் குவிட்டோவா தற்போது மீண்டும் தனது திறனை நிரூபித்துள்ளார்.
மற்றொரு காலிறுதியில் தரவரிசையில் இல்லாத அமெரிக்க வீராங்கனை டேனியல் காலின்ஸும், ரஷியாவின் அனஸ்டஸியாவும் மோதினர். இதில் 2-6, 7-5, 6-1 என்ற செட் கணக்கில் வென்று அரையிறுதிக்கு முதன்முறையாக தகுதி பெற்றார் காலின்ஸ். நான்காம் சுற்றில் அவர் மூன்று முறை சாம்பியன் ஏஞ்சலீக் கெர்பரை அதிர்ச்சித் தோல்வியடையச் செய்தார்.