பெர்த்தில் வெள்ளிக்கிழமை நடைபெற்ற ஆஸ்திரேலிய ஹாக்கி அணியுடனான கடைசி ஆட்டத்தில் 2-5 என்ற கோல் கணக்கில் தோல்வியுற்றது இந்தியா. உலக சீரிஸ் ஹாக்கி பைனல் போட்டிக்கு தயாராகும் வகையில் இந்திய அணி சுற்றுப் பயணம் செய்து ஆஸி. தேசிய மற்றும் ஏ அணிகளுடன் மோதியது குறிப்பிடத்தக்கது.
நாட்டிங்ஹாமில் வெள்ளிக்கிழமை நடைபெற்ற இங்கிலாந்து-பாகிஸ்தான் கிரிக்கெட் அணிகள் இடையிலான 4-ஆவது ஒருநாள் ஆட்டத்தில் மார்க் உட் வீசிய பந்தில் இடது முழங்கையில் காயமடைந்து வெளியேறினார் பாகிஸ்தான் இளம் வீரர் இமாம் உல் ஹக். உலகக் கோப்பை போட்டி தொடங்க உள்ள நிலையில் அவர் காயமடைந்தது, பாக். அணி நிர்வாகத்துக்கு சிக்கலை ஏற்படுத்தியுள்ளது.
வரும் 30-ஆம் தேதி தொடங்கவுள்ள 2019 ஒருநாள் உலகக் கோப்பை போட்டிக்கான அதிகாரப்பூர்வ பாடல் (ஸ்டேன்ட் பை) ஐசிசி வெள்ளிக்கிழமை வெளியிட்டது. பாடகர் லாரின் புதிய பாடலை உருவாக்கி உள்ளார்.
ஐஎஸ்எல் அணிகளில் ஒன்றான சென்னையின் எஃப்சி கால்பந்து வீரர் எட்வின் வன்ஸ்பாலை இரண்டு ஆண்டுக் காலத்துக்கு ஒப்பந்தம் செய்துள்ளது. ஐ லீக் சாம்பியன் சென்னை சிட்டி எஃப்சி அணியின் முதுகெலும்பாக திகழ்ந்தார் எட்வின் வன்ஸ்பால். ஸ்ட்ரைக்கர், விங்கர், சென்ட்ரல் மிட் பீல்டர், என பல முனைகளில் ஆடக்கூடியவர் எட்வின்.
தில்லி கேபிடல்ஸ் அணி பயிற்சியாளர் பாண்டிங், ஆலோசகர் செüரவ் கங்குலி ஆகியோரிடம் இருந்து கிரிக்கெட்டை மனதளவில் எவ்வாறு எதிர்கொள்வது, அழுத்தமான நேரத்தில் ஆடுவது போன்றவை குறித்து கற்றுக் கொண்டேன் என இளம் வீரர் பிரித்வி ஷா கூறியுள்ளார்.
மகளிர் கிரிக்கெட் விளையாட்டில் இந்தியா ஒரு தூங்கும் யானையைப் போன்றது. பேட்டிங், பவுலிங், பீல்டிங் என அனைத்து துறைகளிலும் சிறப்பாக ஆடக்கூடிய வீராங்கனைகள் அதில் உள்ளனர் என ஆஸ்திரேலிய பயிற்சியாளர் மேத்யூ மோட் கூறியுள்ளார்.
இத்தாலி ஓபன் டென்னிஸ் போட்டியில் நாற்காலியை தூக்கி வீசி,ராக்கெட்டை கீழே வீசிய வீரர் நிக் கிர்ஜியோஸ் தகுதிநீக்கம் செய்யப்பட்டார்.