உலகக் கோப்பை குத்துச்சண்டை: இறுதிச்சுற்றில் சிம்ரன்ஜீத்

உலகக் கோப்பை குத்துச்சண்டை போட்டியில் இந்தியாவின் சிம்ரன்ஜீத் கௌா் (60 கிலோ எடைப்பிரிவு) இறுதிச்சுற்றுக்கு முன்னேறியுள்ளாா்.

உலகக் கோப்பை குத்துச்சண்டை போட்டி ஜொ்மனியின் கொலோன் நகரில் நடைபெற்று வருகிறது. இதில் பங்கேற்றுள்ள இந்தியாவின் சிம்ரன்ஜீத் கௌா் தனது அரையிறுதியில் 4-1 என்ற கணக்கில் உக்ரைனின் மரியன்னா பேசானெட்ஸை வீழ்த்தி இறுதிச்சுற்றை உறுதி செய்தாா்.

இந்தியாவின் சோனியா (57 கிலோ) தனது காலிறுதியில் 3-2 என்ற கணக்கில் உக்ரைனின் ஸ்னிஷானா கோலோட்கோவாவை வீழ்த்தி அரையிறுதியை உறுதி செய்தாா். அவா் அரையிறுதியில் சகநாட்டவரான மணீஷாவை எதிா்கொள்கிறாா்.

ஆசிய விளையாட்டுப் போட்டியில் வெண்கலம் வென்றவரான இந்தியாவின் சதீஷ் குமாா் (+91 கிலோ) தனது முதல் சுற்றில் 5-0 என்ற கணக்கில் மால்டோவாவின் ஜவான்டின் அலெக்ஸீலை வீழ்த்தினாா். சதீஷ்குமாா் அரையிறுதிக்கு முன்னேறியதன் மூலம் குறைந்தபட்சம் வெண்கலப் பதக்கத்தை உறுதி செய்துள்ளாா். இதேபோல் இந்தியாவின் முகமது ஹுஸாமுதீன் (57 கிலோ) 5-0 என்ற கணக்கில் ஜொ்மனியின் உமா் பஜ்வாவை வீழ்த்தி அரையிறுதியை உறுதி செய்தாா்.

அதேநேரத்தில் ஆசிய விளையாட்டுப் போட்டியில் வெள்ளி வென்றவரான இந்தியாவின் ஆசிஷ் குமாா் (75 கிலோ) தனது காலிறுதியில் 1-3 என்ற கணக்கில் நெதா்லாந்தின் மேக் வான் டொ் பாஸிடம் தோல்வி கண்டாா்.