இந்தியாவுக்கு எதிராக லார்ட்ஸ் மைதானத்தில் விளையாடுவதென்றால் இங்கிலாந்து வேகப்பந்து வீச்சாளர் ஆண்டர்சனுக்குத் தனி உற்சாகம் வந்துவிடுகிறது.
இந்தியாவுக்கு எதிரான 2-வது டெஸ்டில் இங்கிலாந்து அணி, 2-வது நாள் முடிவில் 3 விக்கெட் இழப்புக்கு 119 ரன்கள் எடுத்துள்ளது. 2-வது நாளில் இந்திய அணி தனது முதல் இன்னிங்ஸில் 364 ரன்களுக்கு ஆல் அவுட்டானது. இங்கிலாந்து வேகப்பந்து வீச்சாளா் ஜேம்ஸ் ஆண்டா்சன் அற்புதமாக பந்துவீசி 5 விக்கெட்டுகளைச் சாய்த்தாா்.
லார்ட்ஸ் மைதானத்தில் 7-வது முறையாக 5 விக்கெட்டுகளை எடுத்துள்ளார் ஆண்டர்சன். அதிலும் இந்தியாவுக்கு எதிராக மட்டும் நான்கு முறை. அதாவது சமீபகாலமாக இந்திய அணி எப்போதெல்லாம் லார்ட்ஸில் விளையாடுகிறதோ அப்போதெல்லாம் ஆண்டர்சன் பெரிய அச்சுறுத்தலாக விளங்கியிருக்கிறார். லார்ட்ஸில் 5 முறை இந்தியாவுக்கு எதிராக விளையாடி 4 முறை 5 விக்கெட்டுகளை எடுத்துள்ளார். 9 இன்னிங்ஸில் 33 விக்கெட்டுகள்!
லார்ட்ஸில் ஜிம்பாப்வே, நியூசிலாந்து, மே.இ. தீவுகள் அணிகளுக்கு எதிராகத் தலா ஒருமுறை 5 விக்கெட்டுகளை எடுத்துள்ளார். 2017-க்குப் பிறகு லார்ட்ஸில் இந்தியாவுக்கு எதிராக மட்டும்தான் 5 விக்கெட்டுகளை எடுத்துள்ளார். இருமுறை.
மேலும், 39 வயதில் 5 விக்கெட்டுகளை எடுத்துள்ளார் ஆண்டர்சன். கடந்த 70 வருடங்களில் ஹேட்லி மட்டுமே 39 வயதில் 5 விக்கெட்டுகளை வீழ்த்தியுள்ளார்.