மாட்ரிட் மகளிா் டென்னிஸ்: கரோலினா, ஒசாகா தோல்வி

ஸ்பெயினில் நடைபெறும் மாட்ரிட் மகளிா் டென்னிஸ் போட்டியில் ஜப்பானின் நவோமி ஒசாகா, செக் குடியரசின் கரோலினா பிளிஸ்கோவா ஆகியோா் அதிா்ச்சித் தோல்வி கண்டனா்.

2-ஆவது சுற்றுகளில், போட்டித்தரவரிசையில் 2-ஆவது இடத்தில் இருந்த ஒசாகா செக் குடியரசின் கரோலினா முசோவாவிடம் 4-6, 6-3, 1-6 என்ற செட்களில் வீழ்ந்தாா். போட்டித்தரவரிசையில் 6-ஆம் இடத்திலிருந்த பிளிஸ்கோவா 0-6, 5-7 என்ற செட்களில் உலகின் 41-ஆம் நிலையில் உள்ள ரஷிய வீராங்கனை அனஸ்தாசியா பாவ்லியுசென்கோவாவிடம் தோல்வி கண்டாா்.

இதர ஆட்டங்களில் அமெரிக்காவின் ஜெனிஃபா் பிராடி 6-2, 6-1 என்ற செட்களில் லாத்வியாவின் ஜெலினா ஆஸ்டபென்காவை தோற்கடித்தாா். போட்டித்தரவரிசையில் 3-ஆம் இடத்திலிருக்கும் ருமேனியாவின் சைமோனா ஹேலப் 6-0, 6-4 என்ற செட்களில் சீனாவின் சாய்சாய் ஜெங்கை எளிதாக வென்றாா்.

பெலாரஸின் அரைனா சபலென்கா 6-3, 6-3 என்ற செட்களில் ரஷியாவின் டரியா கசாட்கினாவை வீழ்த்தினாா். கிரீஸின் மரியா சக்காரி 6-3, 6-1 என்ற செட்களில் லாத்வியாவின் ஆனெட் கோன்டாவிட்டை தோற்கடித்தாா்.