சிட்னி டெஸ்டில் ஸ்டீவ் ஸ்மித்தை ரன் அவுட் செய்ததை தன்னால் எப்போதும் மறக்க முடியாது என இந்திய அணியின் ஆல்ரவுண்டர் ஜடேஜா கூறியுள்ளார்.
ஆஸ்திரேலியாவுக்குச் சுற்றுப்பயணம் மேற்கொண்டுள்ள இந்திய அணி, டெஸ்ட், ஒருநாள், டி20 தொடா்களில் விளையாடுகிறது. ஒருநாள் தொடரை 1-2 எனத் தோற்றது இந்திய அணி. எனினும் டி20 தொடரை 2-1 என வென்றது.
டெஸ்ட் தொடரில், முதல் டெஸ்டை 8 விக்கெட் வித்தியாசத்தில் அபார வெற்றி கண்டது ஆஸ்திரேலியா. மெல்போர்னில் நடைபெற்ற 2-வது டெஸ்டில் இந்திய அணி 8 விக்கெட் வித்தியாசத்தில் வென்று தொடரை 1-1 என சமன் செய்துள்ளது. 3-வது டெஸ்ட் சிட்னியில் நேற்று தொடங்கியது. டாஸ் வென்ற ஆஸி. கேப்டன் டிம் பெயின், பேட்டிங்கைத் தேர்வு செய்தார்.
ஆஸ்திரேலிய அணி முதல் இன்னிங்ஸில் 105.4 ஓவர்களில் 338 ரன்கள் எடுத்துள்ளது. மிகச்சிறப்பாக விளையாடிய ஸ்மித் 226 பந்துகளில் 131 ரன்கள் எடுத்து ஜடேஜாவின் அற்புதமான ஃபீல்டிங்கினால் ரன் அவுட் ஆகி, கடைசியாக ஆட்டமிழந்தார். ஜடேஜா 4 விக்கெட்டுகளை வீழ்த்தினார்.
இந்நிலையில் செய்தியாளர்களிடம் ஜடேஜா கூறியதாவது:
நான்கு விக்கெட்டுகள் எடுத்ததை விடவும் ஸ்மித்தின் ரன் அவுட்டைத் தான் மீண்டும் மீண்டும் பார்க்க விரும்புவேன். என்னுடைய சிறப்பான முயற்சியினால் கிடைத்த விக்கெட் அது. வட்டத்துக்கு வெளியே இருந்து அடித்த த்ரோ, நேரடியாக ஸ்டம்பில் பட்டது. இதுபோன்ற தருணங்கள் மிகுந்த திருப்தியைக் கொடுக்கும் என்றார்.