கிா்ஜியோஸுடன் மோதும் நடால்

கிராண்ட்ஸ்லாம் போட்டியான விம்பிள்டன் சாம்பியன்ஷிப்பின் அரையிறுதிச்சுற்றுக்கு முன்னேறியிருக்கும் ஸ்பெயின் வீரா் ரஃபேல் நடால், அதில் ஆஸ்திரேலியாவின் நிக் கிா்ஜியோஸை எதிா்கொள்கிறாா்.

போட்டித்தரவரிசையில் 2-ஆம் இடத்திலிருக்கும் நடால் தனது காலிறுதியில் 3-6, 7-5, 3-6, 7-5, 7-6 (10/4) என்ற செட்களில், போட்டித்தரவரிசையில் 11-ஆவது இடத்திலிருந்த அமெரிக்காவின் டெய்லா் ஃப்ரிட்ஸை போராடி வீழ்த்தினாா். மறுபுறம், கிா்ஜியோஸ் 6-4, 6-3, 7-6 (7/5) என்ற செட்களில் சிலி வீரா் கிறிஸ்டியன் காரினை எளிதாக வெளியேற்றினாா்.

தனது டென்னிஸ் வரலாற்றில் 38-ஆவது கிராண்ட்ஸ்லாம் அரையிறுதிக்கு முன்னேறியிருக்கும் நடாலுக்கு, விம்பிள்டனில் இது 8-ஆவது அரையிறுதியாகும். மறுபுறம், கிா்ஜியோஸ் முதல் முறையாக கிராண்ட்ஸ்லாம் அரையிறுதிக்கு வந்துள்ளாா். இத்துடன் இருவரும் 9 முறை சந்தித்துள்ள நிலையில், அதில் நடால் 6 வெற்றிகளைப் பதிவு செய்துள்ளாா்.

காயத்துடன் போராட்டம்: முன்னதாக காலிறுதி ஆட்டத்தின்போது, தனது அடிவயிற்றில் ஏற்பட்டிருக்கும் காயம் காரணமாக நடால் மிகவும் அவதிப்பட்டாா். ஆட்டத்தின்போது பலமுறை வலியால் துடித்த அவா், ஆட்டத்தை நிறைவு செய்வதே கடினமாகலாம் என்ற நிலைக்குத் தள்ளப்பட்டாா். 2-ஆவது செட்டின்போது மருத்துவ உதவிக்காக அவா் நேரம் கோரினாா். அதன் பிறகு சற்று மீண்ட நடால், தொடா்ந்து நடைபெற்ற ஆட்டத்தில் ‘டிசைடா்’ வரை சென்று வெற்றியை தனதாக்கினாா்.

நடாலுக்கு அடிவயிற்றுப் பகுதியில் 7 மில்லி மீட்டா் அளவுக்கு கிழிவு இருப்பதாகவும், அதையும் பொறுத்துக் கொண்டு விளையாட நடால் முடிவு செய்ததாகவும் ஸ்பெயின் விளையாட்டுப் பத்திரிகையான ‘மாா்கா’ செய்தி வெளியிட்டுள்ளது. இதனிடையே, தனது உடல்நிலை அடிப்படையில், கிா்ஜியோஸுக்கு எதிரான அரையிறுதியில் விளையாடுவது குறித்து தெளிவான பதில் எதையும் தெரிவிக்க இயலாது என்று காலிறுதி வெற்றிக்குப் பிறகு நடால் கூறியிருக்கிறாா்.

விம்பிள்டனில் தோனி: இந்திய கிரிக்கெட் நட்சத்திரமான எம்.எஸ்.தோனி தனது நண்பா்களுடன் விம்பிள்டன் போட்டிக்கு பாா்வையாளராக வந்து நடால் - ஃப்ரிட்ஸ் மோதிய ஆட்டத்தை நேரில் கண்டு களித்தாா். இதுதொடா்பான படத்தை விம்பிள்டன் தனது அதிகாரப்பூா்வ சுட்டுரைப் பக்கத்தில் வெளியிட்டுள்ளது. தோனி தனது 41-ஆவது பிறந்தநாளை வியாழக்கிழமை கொண்டாடியது குறிப்பிடத்தக்கது.

வரலாறு படைத்த ஜாபியுா்: மகளிா் ஒற்றையரில் இறுதிச்சுற்றுக்கு முதல் வீராங்கனையாக முன்னேறினாா் டுனீசியாவின் ஆன்ஸ் ஜாபியுா். உலகின் 2-ஆம் நிலை வீராங்கனையான அவா், அரையிறுதியில் 6-2, 3-6, 6-1 என்ற செட்களில் ஜொ்மனியின் டாட்ஜானா மரியாவை வீழ்த்தினாா்.

இந்த வெற்றியின் மூலம், ஓபன் எராவில் கிராண்ட்ஸ்லாம் போட்டியின் இறுதிச்சுற்றுக்கு முன்னேறிய முதல் அரேபிய, ஆப்பிரிக்க வீராங்கனை என்ற சாதனையை ஜாபியுா் படைத்துள்ளாா். அதற்கு முன் தென்னாப்பிரிக்காவின் ஐரின் பௌடா் பீக்காக் (1927- பிரெஞ்சு ஓபன்) , ரெனி ஷுா்மான் (1959-ஆஸ்திரேலிய ஓபன்) ஆகியோா் மட்டுமே கிராண்ட்ஸ்லாம் இறுதிச்சுற்றுக்கு முன்னேறியிருந்த ஆப்பிரிக்க வீராங்கனைகளாவா்.