இஷான் கிஷனும் ருதுராஜ் கெயிக்வாடும் அணியில் தொடக்க வீரர்களாக விளையாடுவதற்காக நானும் ஷிகர் தவனும் அணியிலிருந்து வெளியேற வேண்டுமா எனச் செய்தியாளரிடம் கிண்டலாகக் கேள்வி எழுப்பியுள்ளார் ரோஹித் சர்மா.
மே.இ. தீவுகள் அணி இந்தியாவுக்குச் சுற்றுப்பயணம் செய்து 3 ஒருநாள், 3 டி20 ஆட்டங்களில் விளையாடுகிறது. ஒருநாள் தொடர் பிப்ரவரி 6 அன்றும் டி20 தொடர் பிப்ரவரி 16 அன்றும் தொடங்குகின்றன. ஒருநாள் தொடர் ஆமதாபாத்திலும் டி20 தொடர் கொல்கத்தாவிலும் நடைபெறவுள்ளன. இரு தொடர்களுக்கும் மைதானங்களில் ரசிகர்களுக்கு அனுமதி கிடையாது.
ஒருநாள் தொடருக்காக ஆமதாபாத் வந்த இந்திய வீரர்களில் ஷிகர் தவன், ருதுராஜ் கெயிக்வாட், ஷ்ரேயஸ் ஐயர், சைனி ஆகியோர் கரோனாவால் பாதிக்கப்பட்டுள்ளார்கள். மேலும் ஃபீல்டிங் பயிற்சியாளர் டி. திலீப், பாதுகாப்பு அதிகாரி பி. லோகேஷ், மசாஜ் நிபுணர் ராஜீவ் குமார் என ஒட்டுமொத்தமாக ஏழு பேர் கரோனாவால் பாதிக்கப்பட்டுள்ளார்கள். இதனால் இந்திய அணியில் மயங்க் அகர்வால் சேர்க்கப்பட்டுள்ளார். அவர் ஆமதாபாத்தில் மூன்று நாள்களுக்குத் தனிமைப்படுத்தப்பட்டுள்ளார். முதல் ஒருநாள் ஆட்டத்தில் ரோஹித் சர்மாவும் இஷான் கிஷனும் தொடக்க வீரர்களாகக் களமிறங்குகிறார்கள்.
இந்நிலையில் செய்தியாளர்களை இன்று சந்தித்தார் கேப்டன் ரோஹித் சர்மா. அப்போது, புதிய வீரர்களுக்கு வாய்ப்பு வழங்கப்படுவது குறித்து அவரிடம் கேட்கப்பட்டது. அதற்கு ரோஹித் சர்மா பதில் அளித்ததாவது:
உங்களுக்கு இஷான் கிஷனும் ருதுராஜ் கெயிக்வாடும் தொடக்க வீரர்களாக இருக்கவேண்டும். நானும் ஷிகர் தவனும் அணியிலிருந்து வெளியேற வேண்டுமா (என்று சொல்லி சிரித்தார்). இளம் வீரர்களுக்கு நிச்சயம் வாய்ப்பளிக்கப்படும் என்றார். மேலும் அவர் கூறியதாவது:
நம் அணியின் முதல் மூன்று பேட்டர்கள் பல வருடங்களாக நன்றாக விளையாடி வருகிறார்கள். இளம் பேட்டர்களுக்கு வருங்காலத்தில் வாய்ப்புகள் கிடைக்கும். நன்றாக விளையாடியவர்கள் நிச்சயம் வாய்ப்பு பெறுவார்கள். ஷிகர் தவனும் ருதுராஜும் கரோனாவால் பாதிக்கப்பட்டுள்ளார்கள். எனவே இஷான் கிஷனுக்கு வாய்ப்பு கிடைத்துள்ளது என்றார்.