அடிப்படை வசதிக்கு ஏங்கும் ஆதிதிராவிடர் நலப் பள்ளி!

விருத்தாசலம் அருகே உள்ள சிறுநெசலூர் கிராமத்தில் கடந்த 5 ஆண்டுகளாக அங்கன்வாடிக் கட்டடத்தில் அரசு ஆதிதிராவிடர் நலத் தொடக்கப் பள்ளி இயங்கி வருகிறது.

÷அங்கன்வாடிக் கட்டடத்தில் போதுமான இடம் இல்லாததால் மாணவர்கள் மிகுந்த சிரமத்துக்கு ஆளாகி வருகின்றனர்.

÷வேப்பூர் அருகே நல்லூர் ஒன்றியத்துக்குள்பட்ட சிறுநெசலூர் கிராமத்தில் அரசு ஆதிதிராவிடர் நலத் தொடக்கப் பள்ளி இயங்கி வருகிறது. இந்நிலையில், கடந்த 5 ஆண்டுகளுக்கு முன் அமைக்கப்பட்ட திருச்சி, சென்னை தேசிய நெடுஞ்சாலை, இக்கிராமத்தின் வழியே செல்கிறது.÷தேசிய நெடுஞ்சாலைக்குக் கிழக்குப் பகுதியில் குடியிருப்பும், மேற்கு பகுதியில் பள்ளிக் கட்டடமும் உள்ளது.

÷மாணவ, மாணவிகள் பள்ளிக்கூடத்துக்கு தேசிய நெடுஞ்சாலையைக் கடந்துசெல்ல  வேண்டியிருந்தது. இவ்வாறு தேசிய நெடுஞ்சாலையைக் கடந்து செல்லும்போது 2 மாணவர்கள் விபத்துக்குள்ளாகினர். இதைத் தொடர்ந்து, கிராம மக்கள் சாலைக்கு மேற்கு பகுதியில் உள்ள பள்ளிக்கு தங்கள் குழந்தைகளை அனுப்ப மறுத்தனர்.

÷குடியிருப்புப் பகுதியில் பள்ளிக் கட்டடம் அமைத்துத் தரவேண்டும் என அதிகாரிகளுக்கு பலமுறை மனு கொடுத்தும், போராட்டம் நடத்தியும் கோரிக்கை வைத்துள்ளனர். ஆனால் அதிகாரிகள் இதுவரை எந்தவித நடவடிக்கையும் எடுக்கவில்லை.

÷இந்நிலையில் குடியிருப்புப் பகுதியில் உள்ள அங்கன்வாடிக் கட்டடத்தில் ஆதிதிராவிடர் நலத் தொடக்கப் பள்ளி இயங்கி வருகிறது. இந்தக் கட்டடத்தில் வெயில் காலத்தில் வெயிலின் தாக்கத்தாலும், மழைக்காலத்தில் மழையின் கொடுமையாலும் பள்ளியில் படிக்கும் 96 மாணவ, மாணவிகள் மிகுந்த சிரமத்துக்குள்ளாகி அவதிப்படுகின்றனர்.

÷இது குறித்து சிறுநெசலூர் கிராமத்தைச் சேர்ந்த ஆ.காமராஜ், பெ.முருகன், சு.மாரிமுத்து ஆகியோர் தெரிவித்தது:

÷"அங்கன்வாடியில் தாற்காலிகமாக பள்ளிக்கூடம் செயல்பட்டுவரும் நிலையில், பள்ளி மாணவர்களுக்கும், அங்கன்வாடி பிள்ளைகளுக்கும் போதுமான இடம் இல்லை. ÷கட்டடத்தில் உள்ள ஓடுகள் உடைந்திருப்பதால் வெயிலும், மழையும் அவர்களை வாட்டி வருகிறது. இதனால், படிப்பதற்கு ஏற்ற சூழல் இருப்பதில்லை. மேலும், மாணவர்களுக்கு சத்துணவு சமைப்பதற்குப் போதுமான இடம் இல்லாததால் வெளியில் சமைத்து வருகின்றனர். அந்த இடமும் பன்றிகள் திரியும் கூடாரமாக உள்ளது.

÷இதனால் மாணவர்களுக்கு நோய் பாதிப்பும் ஏற்படும் அபாயம் உள்ளது. இந்நிலையில் எங்கள் கிராமத்தில் இந்து அறநிலையத் துறைக்குச் சொந்தமான மஞ்சையப்பர் கோயில் இடம் அதிகமாக உள்ளது.÷இந்து அறநிலையத் துறையிடம் இடத்தைப் பெற்று, எங்கள் கிராமத்து மாணவர்களின் கல்விக்கு தமிழக அரசு ஒளியேற்ற வேண்டும்' எனத் தெரிவித்தனர்.

÷கல்விக்காக பல்வேறு திட்டங்களைச் செயல்படுத்தி வரும் தமிழக அரசு, சிறுநெசலூர் ஆதிதிராவிடர் நலப் பள்ளி மாணவர்களுக்கு பள்ளிக் கட்டடம் அமைத்துத் தர வேண்டும் என்பதே அக்கிராம மக்களின் எதிர்பார்ப்பாகும்.