கொடைக்கானல் வனப் பகுதியில் தீ: மூலிகைச் செடிகள் எரிந்து நாசம்

கொடைக்கானல் வனப் பகுதிகளில் பற்றி எரியும் காட்டுத் தீயால் மூலிகைச் செடிகள் உள்ளிட்ட நூற்றுக்கணக்கான மரங்கள் எரிந்து கருகின.

  கொடைக்கானலில் கடந்த மூன்று மாதங்களாக தொடர்ந்து பனிப் பொழிவு நிலவி வருகிறது. பகல் நேரங்களில் நல்ல வெயிலும் இரவில் காற்றுடன் கடுமையான குளிரும் நிலவி வருகிறது. நீரோடைகளில் தண்ணீர் வற்றி விட்டது. வனப் பகுதிகளிலுள்ள மரங்கள், புற்கள் காய்ந்து எளிதில் தீப்பிடிக்கக் கூடிய நிலையில் உள்ளன. இதனால் கடந்த இரண்டு நாள்களாக பெருமாள்மலை, வடகவுஞ்சி, பெரும்பள்ளம்,

பேத்துப்பாறை, சின்னப்பள்ளம், குருசடி மெத்து, பிரகாசபுரம் ஆகிய வனப் பகுதிகளில் தொடர்ந்து தீப்பற்றி எரிந்து வருகிறது.

  20-க்கும் மேற்பட்ட வனப் பணியாளர்கள் தீயை அணைக்கும் முயற்சியில் ஈடுபட்டனர். மேலும், மலைகளின் உச்சிப் பகுதிகளில் காட்டுத் தீ எரிந்து வருவதால் அவற்றை அணைக்க உபகரணங்கள், பணியாளர்கள் இல்லை. இதனால் தீ நூற்றுக்கணக்கான ஏக்கரில் தொடர்ந்து எரிந்து வருகிறது. இரவு நேரங்களில் காற்றும் வீசுவதால் காட்டுத்தீயைக் கட்டுப்படுத்த முடியவில்லை.

  இதனால் அரிய வகை மூலிகைச் செடிகள், நூற்றுக்கணக்கான ஏக்கரில் உள்ள யூக்கலிப்டஸ், முள்முருங்கை, வேம்பு மற்றும் உயர்ரக மரங்கள் தீயில் கருகி வருகின்றன.

  வனப் பகுதியிலிருந்த கிளைமான், மர அணில், காட்டுப் பன்றி, மற்றும் அரிய வகைப் பறவைகள் நிலை என்னவென்று தெரியவில்லை. பல விலங்குகள் இடம் பெயர்ந்தும் உள்ளன.

  சுற்றுலா இடங்களான வெள்ளிநீர் வீழ்ச்சி, கோக்கர்ஸ் வாக், குடியிருப்பு பகுதியான லாஸ்காட் சாலை ஆகிய இடங்களிலும் திடீரென தீப்பற்றின. சம்பவ இடத்திற்கு கொடைக்கானல் தீயணைப்புத்துறையினர் சென்று தீயை இரண்டு மணி நேரம் போராடி அணைத்தனர்.