விவசாய சங்கங்களின் வேலைநிறுத்த போராட்டத்துக்கு வணிகர் சங்கம் ஆதரவு

காவிரி டெல்டா மாவட்டங்களில் விவசாய சங்கங்கள் சார்பில், வருகிற 29-ஆம் தேதி நடைபெறவுள்ள வேலைநிறுத்தப் போராட்டத்துக்கு வணிகர் சங்கங்களின் பேரவை ஆதரவு அளிக்கும் என்று, அந்தப் பேரவையின் மாநிலத் தலைவர் த. வெள்ளையன் தெரிவித்தார்.

திருவாரூரில் செய்தியாளர்களிடம் சனிக்கிழமை அவர் மேலும் கூறியதாவது: காவிரியில் தமிழகத்துக்கான உரிமையில் கர்நாடகம் நியாயமாக நடந்து கொள்ளாமல், தேசிய ஒருமைப்பாட்டுக்கு எதிராகவே செயல்பட்டு வருகிறது. கர்நாடகத்தின் இந்தச் செயலை மத்தியில் ஆட்சிக்கு வரும் எந்தக் கட்சியும் கண்டிப்பதில்லை.

கர்நாடகம் தமிழகத்துக்கு தண்ணீர் கொடுக்காததைக் கண்டித்து, தஞ்சை, நாகை, திருவாரூர் ஆகிய டெல்டா மாவட்டங்களில் வருகிற 29-ஆம் தேதி விவசாய சங்கங்கள் சார்பில் சாலை மறியல், ஆர்ப்பாட்டம் நடைபெறுகிறது. இதற்கு வணிகர் சங்கங்களின் பேரவை ஆதரவு அளிக்கும். ஆனால், கடைகளை அடைக்கக் கோரி கட்டாயப்படுத்தக் கூடாது என்றார் அவர்.