சென்னையில் இன்று பெட்ரோல், டீசல் விலை உயர்வு எவ்வளவு தெரியுமா?

கடந்த இரு தினங்களாக பெட்ரோல், டீசல் விலை மீண்டும் அதிகரிக்கத் தொடங்கியுள்ளது. எரிபொருள்களின் விலை அதிகரிக்த்து வருவதால் வாகன ஓட்டிகள் அச்சமடைந்துள்ளனர். 

எண்ணெய் நிறுவனங்கள் மூலம் எரிபொருள் விலையை தினந்தோறும் மாற்றியமைக்கும் நடைமுறை கடந்த 2017 ஆம் ஆண்டு ஜூன் 17 முதல் கொண்டு வரப்பட்டது. அதைத் தொடர்ந்து அனைத்து மாநிலங்களிலும் அதன் விலை முன்னெப்போதும் இல்லாத வகையில் தொடர்ந்து உயர்ந்து வந்தது.

சென்னை, மும்பை, தில்லி, கொல்கத்தா உள்ளிட்ட பெரு நகரங்களில் ஒரு லிட்டர் பெட்ரோலின் விலை ரூ.87-க்கும் மேல் அதிகரித்தது. டீசலும் ரூ.80-ஐ எட்டியது.

கச்சா எண்ணெய் விலைக்கு ஏற்ப பெட்ரோல், டீசல் விலையிலும் ஏற்றம், இறக்கம் காணப்பட்டு வரும் நிலையில், கடந்த ஒரு மாதத்தில் கச்சா எண்ணெயின் விலையில் காணப்பட்ட சரிவை அடுத்து பெட்ரோல் விலை லிட்டருக்கு ரூ.16 வரையிலும், டீசல் ரூ.14 வரையிலும் குறைந்தது. இது வாகன ஓட்டிகளுக்கு சற்று ஆறுதலை அளித்தது.

இந்தச் சூழலில், சர்வதேச சந்தையில் மீண்டும் கச்சா எண்ணெய் விலை உயரத் தொடங்கியுள்ளது. அதுமட்டுமன்றி, அமெரிக்க டாலருக்கு நிகரான ரூபாயின் மதிப்பும் சற்று சரிவடைந்து வந்தது. அதன் தாக்கம் பெட்ரோலியப் பொருள்களின் விலையில் எதிரொலித்தது. பின்னர், கடந்த சில தினங்களாக பெட்ரோல், டீசல் விலையில் சிறிதளவில் குறைந்தும், மாற்றங்களின்றியும் இருந்து வந்தது. கடந்த இரு தினங்களாக மீண்டும் அதிகரிக்கத் தொடங்கியுள்ளது வாகன ஓட்டிகள் மத்தியில் அச்சத்தை ஏற்படுத்தி உள்ளது. 

இந்நிலையில், இன்று எண்ணெய் நிறுவனங்கள் வெளியிட்டுள்ள அறிவிப்பில், சென்னையில் பெட்ரோல் நேற்றைய விலையில் இருந்து 14 காசுகள் அதிகரித்து லிட்டருக்கு ரூ.73.28 ஆகவும், டீசல் நேற்றைய விலையில் இருந்து 13 காசுகள் அதிகரித்து லிட்டருக்கு ரூ. 69.57 ஆகவும் விலை நிர்ணயம் செய்யப்பட்டுள்ளன.