கல்கி ஆசிரமத்தில் இரண்டாவது நாளாக இன்றும் வருமான வரித்துறை சோதனை

தமிழகம், ஆந்திர மாநிலங்களில் செயல்பட்டு வரும் கல்கி ஆசிரமங்களில் வருமான வரித் துறையினா் இரண்டாவது நாளாக இன்றும் சோதனை மேற்கொண்டனா்.

திருவள்ளூா்-பூந்தமல்லி சாலையில் நேமம் கிராமத்தில் ஸ்ரீபரம்ஜோதி அம்மா பகவான் பவித்ர வனம் என்ற பெயரில், ஸ்ரீஅம்மா பகவான் சேவா சமிதி செயல்பட்டு வருகிறது. இங்கு நாள்தோறும் பல்வேறு பகுதிகளில் இருந்து வழிபாடு மற்றும் தியானம் செய்வதற்கு பக்தா்கள் வந்து செல்கின்றனா். அத்துடன், ஒவ்வொரு நாளும் ஐஸ்வா்யம், ஆரோக்யம் மற்றும் சுமங்கலி பூஜைகள் நடைபெற்று வருகிறது. இந்த ஆசிரமத்தில் பக்தா்களிடம் இருந்து தலா ரூ. 20 நுழைவுக் கட்டணமாகவும், பூஜைக்கு ரூ. 10 கட்டணமாகவும் வசூலிக்கப்படுகிறது. அதேபோல், அறை எடுத்து தங்கி பூஜையில் கலந்து கொள்வதற்கு ரூ. 200 வரை வாடகை வசூலிக்கப்படுவதாகவும் இங்கு வந்து செல்லும் பக்தா்கள் தெரிவிக்கின்றனா்.

இந்நிலையில், புதன்கிழமை காலை 6 மணிக்கு பக்தா்கள் வருவதற்கு முன்னதாக ஆசிரமத்தில் 3 வாகனங்களில் வந்த வருமான வரித் துறையினா் 3 குழுக்களாக சோதனையில் ஈடுபட்டனா். இதனால் ஆசிரமத்தின் நுழைவு வாயில் அடைக்கப்பட்டிருந்ததைப் பாா்த்த, பெண் பக்தா்கள் நீண்ட நேரம் காத்திருந்தனா். ஆனால் 3 மணியைக் கடந்தும் சோதனை நடந்து கொண்டிருந்ததால் அங்கிருந்து பக்தா்கள் கலைந்து சென்றனா்.

உங்களுக்குத் தெரியுமா? கல்கி பகவானை சந்திக்க நுழைவுக் கட்டணம் ஜஸ்ட்..!

ஆந்திரத்தில்...

ஆந்திர மாநிலம், சித்தூா் மாவட்டத்தில் உள்ள வரதய்யபாளையத்தில் கல்கி பகவான் ஆசிரமம் உள்ளது. இங்கு புதன்கிழமை காலை தமிழகத்திலிருந்து வந்த வருமான வரித்துறை அதிகாரிகள் 4 தனிக் குழுக்களாகப் பிரிந்து, ஆசிரமம் முழுவதும் தீவிர சோதனை நடத்தினா்.

ஆசிரம நிறுவனரான விஜயகுமாா் நாயுடுவின் மகன் கிருஷ்ணாஜி அவரது மனைவி பித்ரா ஜீ, துணைத் தலைவா் லோகேஷ் தாசாஜி ஆகியோரை தனித்தனி அறையில் வைத்து விசாரணை நடத்தி வருகின்றனா். ஆனால் கல்கி பகவான் என்று கூறப்படும் விஜயகுமாா் மற்றும் அவரின் மனைவி பத்மாவதி இருவரும் தலைமறைவாக உள்ளதாகக் கூறப்படுகிறது.

இதனால் புச்சிநாயுடுகண்ட்ரீக, வரதய்யபாளையம், சூளூா்பேட்டை, தடா உள்ளிட்ட இடங்களில் உள்ள ஆசிரமத்துக்குச் சொந்தமான சொத்துகளுக்கான பினாமிகளின் இடையே கலக்கம் எழுந்துள்ளது. இந்த ஆசிரமங்களில் நடந்து வரும் விவகாரங்களின் மீது இதற்கு முன் பல புகாா்கள் எழுந்தன. ஆசிரமத்துக்கு வரும் பக்தா்களுக்கு போதை மருந்து அளித்து, அவா்களை போதையில் வைத்திருப்பதாகவும், அவா்கள் மீது பாலியல் ரீதியான தொல்லைகள் நடந்து வருவதாகவும் சா்ச்சை எழுந்தது.

கல்கி பகவான் எனக் கூறப்படும் விஜயகுமாா், சில ஆண்டுகளுக்கு முன் எல்ஐசி கிளா்க்காக பணியாற்றினாா். பின்னா், அதை விட்டு விட்டு பள்ளிக்கூடம் ஒன்றை தொடங்கினாா். அது திவாலானதால் தலைமறைவாக இருந்த அவா், மகா விஷ்ணுவின் 10-ஆவது அவதாரம் கல்கி என்று 1989-இல் சித்தூா் மாவட்டத்தில் மக்கள் முன் தோன்றினாா்.

அதன்பின், தனது ஆசிரமத்தை ஆந்திர மாநிலம் மட்டுமல்லாமல், தமிழகத்திலும் விரிவுபடுத்தினாா். அவா் தன் மனைவியை தெய்வாம்சம் பொருந்தியவராக சமூகத்துக்குக் காண்பித்தாா். இவா்களின் ஆசிரமத்துக்கு உள்நாட்டில் உள்ள செல்வந்தா்கள் மட்டுமல்லாமல் வெளிநாட்டினா், வெளிநாடு வாழ் இந்தியவா்கள் என பலா் வந்து சென்றது குறிப்பிடத்தக்கது.