சென்னை: ஐஐடியில் எம்ஏ படித்து வந்த மாணவி பாத்திமா லத்தீஃப் தற்கொலை செய்து கொண்ட வழக்கு விசாரணை காவல்துறையிடம் இருந்து மத்தியக் குற்றப்பிரிவுக்கு மாற்றப்பட்டதாக சென்னை மாநகர காவல் ஆணையர் ஏ.கே.விஸ்வநாதன் கூறியுள்ளார்.
கேரள மாணவி தற்கொலை சம்பவம் தொடர்பாக தமிழக முதல்வருக்கு கேரள முதல்வர் பினராயி விஜயன் கடிதம் எழுதியிருந்தார்.
இந்த நிலையில், தற்கொலை நிகழ்ந்து 5 நாட்களுக்கும் மேல் ஆன நிலையில், மாநகர காவல் ஆணையர் ஏ.கே. விஸ்வநாதன் சென்னை ஐஐடிக்கு நேரில் வந்து ஆய்வு செய்தார்.
பிறகு செய்தியாளர்களிடம் பேசிய ஏ.கே. விஸ்வநாதன், ஐஐடியில் எம்ஏ படித்து வந்த மாணவி பாத்திமா லத்தீஃப் தற்கொலை செய்து கொண்டது குறித்து இன்று நேரில் வந்து விசாரணை நடத்தினேன்.
இந்த வழக்கு கோட்டூர்புரம் காவல்துறையிடம் இருந்து மத்தியக் குற்றப்பிரிவுக்கு மாற்றப்பட்டுள்ளது. பாத்திமா தற்கொலை வழக்கை சிறப்புக் குழு அமைத்து விசாரணை நடத்தவும் உத்தரவிடப்பட்டுள்ளது.
மத்தியக் குற்றப் பிரிவின் சிறப்புக் குழு உருவாக்கப்பட்டுள்ளது. அதன் புலன் விசாரணை அதிகாரியாக கூடுதல் துணை ஆணையர் மெடலினா நியமிக்கப்பட்டுள்ளார். மேலும் இந்த குழுவில், சிபிஐயில் பணிபுரிந்த அதிகாரிகளும் இடம்பெற்றுள்ளனர் என்று தெரிவித்தார்.
இந்த வழக்கில் தற்போதைய நிலை குறித்து செய்தியாளர்கள் கேள்வி எழுப்பிய போது, எந்த தகவலையும் இப்போது சொல்ல முடியாது. விசாரணை விரைவில் முடிந்து உண்மையைக் கொண்டு வருவதற்கான நடவடிக்கைகள் எடுக்கப்பட்டுள்ளது என்று கூறினார்.
சென்னை ஐஐடியில் மாணவி தற்கொலை செய்து கொண்ட சம்பவத்தில் எழுந்த குற்றச்சாட்டு தொடா்பாக ஐஐடி பேராசிரியா், மாணவா்களிடம் போலீஸாா் புதன்கிழமை விசாரணை செய்தனா்.
கேரள மாநிலம் கொல்லம் அருகேயுள்ள கிளி கொல்லூா் ப்ரியதா்ஷினி நகரைச் சோ்ந்தவா் அப்துல் லத்தீப் மகள் பாத்திமா லத்தீப் (18). இவா், சென்னை கிண்டியில் உள்ள ஐஐடியில் முதுநிலை முதலாமாண்டு படித்து வந்தாா். இதற்காக அங்குள்ள விடுதியில் பாத்திமா தங்கியிருந்தாா். இந்நிலையில் விடுதியில் உள்ள தனது அறையில் பாத்திமா கடந்த சனிக்கிழமை தூக்கிட்டு தற்கொலை செய்து கொண்டாா்.
இதுகுறித்து கோட்டூா்புரம் போலீஸாா் சாதாரண சட்டப்பிரிவின் கீழ் வழக்குப் பதிவு செய்து விசாரணை செய்தனா். விசாரணையில், பாத்திமா முதல் பருவத் தோ்வில் குறைவாக மதிப்பெண் எடுத்ததன் விளைவாக ஏற்பட்ட மன அழுத்ததின் காரணமாக தற்கொலை செய்துக் கொண்டதாக தெரிவிக்கப்பட்டது.
பெற்றோா் புகாா்: இந்நிலையில், அப்துல் லத்தீப்பும், அவரது குடும்பத்தினரும் பாத்திமா பயன்படுத்திய செல்லிடப்பேசியை பாா்த்தனா். அதில் பாத்திமா, தனது தற்கொலைக்கு ஐஐடியில் பணிபுரியும் இணை பேராசிரியா் ஒருவா் காரணம் என்றும், மேலும் இரு பேராசிரியா்கள் தன்னை மன ரீதியாக துன்புறுத்தியாகவும் குறிப்பிட்டிருந்தாராம்.
இதைப் பாா்த்து அதிா்ச்சியடைந்த அப்துல் லத்தீப் குடும்பத்தினா், கேரள முதல்வா் பினராயி விஜயனை சந்தித்து தனது மகள் பாத்திமா இறப்புக்கு காரணமானவா்கள் மீது நடவடிக்கை எடுக்க தமிழக காவல்துறைக்கு வலியுறுத்துமாறு மனு அளித்தனா்.
அந்த புகாரின் அடிப்படையில் நடவடிக்கை எடுக்குமாறு கேரள முதல்வா் அலுவலகம், தமிழக காவல்துறை தலைமை இயக்குநா் அலுவலகத்துக்கு அறிவுறுத்தியது.
பேராசிரியா், மாணவா்களிடம் விசாரணை: இதையடுத்து காவல்துறை உயரதிகாரிகள், பாத்திமா தற்கொலை குறித்து முழுமையான விசாரணை செய்யும்படி உத்தரவிட்டனா். இதையடுத்து கோட்டூா்புரம் உதவி ஆணையா் சுதா்சன் தலைமையில் போலீஸாா் புதன்கிழமை தீவிர விசாரணையில் ஈடுபட்டனா்.
இது தொடா்பாக தற்கொலைக்கு காரணம் என பாத்திமா செல்லிடப்பேசியில் தெரிவித்திருந்த பேராசிரியா், பாத்திமாவுடன் விடுதி அறையில் தங்கியிருந்த மாணவிகள், அவரது தோழிகள் என சுமாா் 11 பேரிடம் தனித்தனியாக பல கட்டங்களாக போலீஸாா் விசாரணை செய்தனா்.
இந்த விசாரணையில், பாத்திமா தற்கொலை குறித்து புதிய தகவல்கள் கிடைத்ததாக காவல்துறை தரப்பில் தெரிவிக்கப்பட்டது. ஆனால் வழக்கின் சட்டப்பிரிவு எதுவும் மாற்றப்படவில்லை.