அமோனியம் நைட்ரேட்: பொதுமக்கள் அச்சப்பட தேவையில்லை - மகேஷ்குமாா் அகா்வால்

சென்னை: மணலியில் சரக்குப் பெட்டகங்களில் உள்ள அமோனியம் நைட்ரேட் குறித்து பொதுமக்கள் அச்சப்பட தேவையில்லை என சென்னை பெருநகர காவல் துறை ஆணையா் மகேஷ்குமாா் அகா்வால் தெரிவித்தாா்.

கரோனாவால் பாதிக்கப்பட்டு, குணமடைந்து பணிக்குத் திரும்பிய மயிலாப்பூா் துணை ஆணையா் சேஷாங் சாய் உள்ளிட்ட 32 காவலா்களை வரவேற்கும் நிகழ்ச்சி, மயிலாப்பூா் காவல் நிலையத்தில் திங்கள்கிழமை நடைபெற்றது.

இந் நிகழ்ச்சிக்கு தெற்கு மண்டல கூடுதல் ஆணையா் ஆா்.தினகரன் தலைமை வகித்தாா். கூடுதல் ஆணையா்கள் என்.கண்ணன், பி.சி.தேன்மொழி, இணை ஆணையா்கள் வி.பாலகிருஷ்ணன் ஆகியோா் முன்னிலை விகித்தனா்.

இதில் காவல் ஆணையா் மகேஷ்குமாா் அகா்வால் கலந்துகொண்டு, பணிக்குத் திரும்பிய அனைவருக்கும் வாழ்த்துக் கூறி, சான்றிதழ்களை வழங்கினாா்.

அச்சப்பட வேண்டாம்: பின்னா், மகேஷ்குமாா் அகா்வால் அளித்த பேட்டி:

மணலியில் உள்ள தனியாா் கிடங்கில் 37 சரக்கு பெட்டங்களில் அமோனியம் நைட்ரேட் இருந்தது. இதில் 10 சரக்குப் பெட்டகங்கள் ஹைதராபாதுக்கு ஞாயிற்றுக்கிழமை அனுப்பப்பட்டு விட்டன. மீதியுள்ள 27 சரக்குப் பெட்டகங்களும் ஓரிரு நாள்களில் அனுப்பப்படும்.

அமோனியம் நைட்ரேட் குறித்து பொதுமக்கள் அச்சப்படதேவையில்லை. 27 சரக்குப் பெட்டகங்களை சுற்றியும் முன்னெச்சரிக்கை நடவடிக்கையாக தீயணைப்புப் படை வீரா்கள் நிறுத்தப்பட்டுள்ளனா். அதேபோல, சரக்குப் பெட்டகங்களைச் சுற்றிலும் தடுப்புகள் அமைக்கப்பட்டுள்ளன. மேலும், அங்கு பாதுகாப்புப் பணியில் போலீஸாா் ஈடுபடுத்தப்பட்டுள்ளனா்.

சென்னையில் அதிகரித்து வரும் குற்றங்களைக் கட்டுப்படுத்தும் வகையில், பல்வேறு நடவடிக்கைகள் எடுக்கப்பட்டு வருகின்றன. வழிப்பறியில் தொடா்ந்து ஈடுபடுகிறவா்கள் குண்டா் தடுப்புச் சட்டத்தின் கீழ் கைது செய்யப்படுகின்றனா். அதன்படி 32 போ் கடந்த ஒரு மாதத்தில் குண்டா் தடுப்புச் சட்டத்தின் கீழ் கைது செய்யப்பட்டுள்ளனா்.

12 காவல் மாவட்ட துணை ஆணையா்களும், விடியோ கால் மூலம் பொதுமக்களிடம் புகாா்களைப் பெற்று வருகின்றனா். இந்தத் திட்டத்துக்கு பொதுமக்களிடம் நல்ல வரவேற்பு கிடைத்துள்ளது. இதில் பெண்கள் அதிகளவில் வீடுகளில் இருந்தபடி துணை ஆணையா்களிடம் புகாா் அளிக்கின்றனா் என்றாா் அவா்.

முன்னதாக நிகழ்ச்சியில் இணை ஆணையா்கள் சி.மகேஸ்வரி, ஆா்.சுதாகா், துணை ஆணையா்கள் ஆா்.திருநாவுக்கரசு, எம்.சுதாகா், தீபா சத்யன் உள்ளிட்டோா் பங்கேற்றனா்.

சென்னை காவல் துறையில் கரோனாவால் 1,870 போ் பாதிக்கப்பட்டுள்ளனா். அவா்களில் 1,468 போ் குணமடைந்து பணிக்குத் திரும்பியுள்ளனா்.