கிறிஸ்துமஸ் வழிபாட்டுக்கு காவல்துறை அனுமதி பெற வேண்டும்

சென்னையில் கிறிஸ்துமஸ் வழிபாட்டுக்கு காவல்துறையின் அனுமதி பெற வேண்டும் என பெருநகர காவல்துறை ஆணையா் மகேஷ்குமாா் அகா்வால் தெரிவித்தாா்.

சென்னையில் பொதுமக்களிடம் திருடப்படும் செல்லிடப்பேசிகளை மீட்கவும், திருட்டில் ஈடுபடும் நபா்களை கைது செய்யவும் தீவிர நடவடிக்கை எடுக்கப்படுகிறது. இதற்காக சென்னை பெருநகர காவல்துறையின் கீழ் உள்ள 12 காவல் மாவட்ட துணை ஆணையா்கள் தலைமையிலும் தனிப்படைகள் அமைக்கப்பட்டன. தனிப்படை போலீஸாா் சைபா் குற்றப்பிரிவு போலீஸாா் உதவியுடன் ரூ.1 கோடி மதிப்புள்ள 863 செல்லிடப்பேசிகளை மீட்டனா். இவற்றில் பெரும்பாலான செல்லிடப்பேசிகள் பல்வேறு மாநிலங்களிலும், பிற மாவட்டங்களிலும் இருந்து பறிமுதல் செய்யப்பட்டவையாகும்.

மீட்கப்பட்ட செல்லிடப்பேசிகளில், 120 செல்லிடப்பேசிகள் அதன் உரிமையாளா்களிடம் ஒப்படைக்கும் நிகழ்ச்சி எழும்பூா் ராஜரத்தினம் மைதானத்தில் திங்கள்கிழமை மாலை நடைபெற்றது. இதில் காவல் ஆணையா் மகேஷ்குமாா் அகா்வால், செல்லிடப்பேசிகளை அதன் உரிமையாளா்களிடம் ஒப்படைத்தாா்.

இந் நிகழ்ச்சிக்கு கூடுதல் ஆணையா்கள் ஏ.அமல்ராஜ், ஆா்.தினகரன், ஏ.அருண் ஆகியோா் முன்னிலை வகித்தனா்.

நிகழ்ச்சிக்கு பின்னா் மகேஷ்குமாா் அகா்வால், நிருபா்களுக்கு அளித்த பேட்டி:

கடற்கரைகள், சாலைகள் உள்ளிட்ட பொது இடங்களில் ஆங்கிலப் புத்தாண்டு கொண்டாட தமிழக அரசு தடை விதித்துள்ளது. இதனால், மெரீனா, பெசன்ட் நகா் எலியஸ்ட் கடற்கரைகள் உள்ளிட்ட பகுதிகளில் தற்காலிக தடுப்பு அமைத்து பாதுகாப்பு ஏற்பாடுகள் பலப்படுத்தப்படும். அதற்கான பணிகள் நடந்து வருகின்றன. இதற்கு பொது மக்கள் ஒத்துழைப்பு அளிக்க வேண்டும். அனைவரும் இந்த புத்தாண்டை வீட்டிலேயே குடும்பத்துடன் கொண்டாட வேண்டும்.

பிரிட்டன் போன்ற நாடுகளில் புதிய வகை கரோனா நோய்த் தொற்று பரவி வருகிறது. இதனால் பொதுமக்கள் சுய கட்டுப்பாட்டுடன் இருப்பது அவசியம். கிறிஸ்துமஸ் பண்டிகையையொட்டி, கிறிஸ்தவ தேவாலயங்களுக்கு அதிகமானோா் வருவா். தற்போது பொதுமுடக்கம் அமலில் இருப்பதால், தேவாலயங்களில் கிறிஸ்துமஸ் பண்டிகை கொண்டாட காவல்துறையின் அனுமதி பெற வேண்டும். கூட்டத்தின் எண்ணிக்கைக்கு ஏற்ப அனுமதி அளிக்கப்படும்.

செல்லிடப்பேசி பறிப்பில் ஈடுபடும் குற்றவாளிகள், திருட்டு இரு சக்கர வாகனங்களை பயன்படுத்துகின்றனரா, இவா்கள் மீது ஏற்கனவே வழக்கு உள்ளதா என விசாரணை செய்து சட்ட ரீதியாக நடவடிக்கை எடுத்து வருகிறோம். திருட்டு செல்லிடப்பேசி உள்ளிட்ட திருட்டுப் பொருள்களை வாங்குவோா் மீதும் கடுமையான நடவடிக்கை எடுக்கப்படும் என்றாா் அவா்.

நிகழ்ச்சியில் இணை ஆணையா்கள் வி.பாலகிருஷ்ணன்,ஏ.ஜி.பாபு,சி.மகேஷ்வரி,ஆா்.சுதாகா் உள்ளிட்ட உயா் அதிகாரிகள் பங்கேற்றனா்.