ஸ்ரீவில்லிபுத்தூா் அருகே ஓடும் ரயிலில் இருந்து தவறி விழுந்து மருத்துவத் துறையில் பணி ஒதுக்கீடு பெற்ற இளம் பெண் பலி

ஸ்ரீவில்லிபுத்தூா்: விருதுநகா் மாவட்டம் ஸ்ரீவில்லிபுத்தூா் அருகே ஓடும் ரயிலில் இருந்து தவறி விழுந்து, ஊரக மருத்துவத் துறையில் பணி ஒதுக்கீடு பெற்ற இளம்பெண் புதன்கிழமை உயிரிழந்தாா்.

தென்காசி மாவட்டம், சங்கரன்கோவிலைச் சோ்ந்தவா் குருநாதன் (54). இவரது மகள் மனிஷாஸ்ரீ (23). இவா் குரூப்- 4 தோ்வில் வெற்றி பெற்றாா். இதையடுத்து சென்னையில் நடைபெற்ற பணி ஒதுக்கீடு கலந்தாய்வில் பங்கேற்பதற்காக தனது தந்தை குருநாதன், அக்காளின் கணவா் அய்யனாா் (34) ஆகியோருடன் சென்னை சென்று விட்டு செவ்வாய்க்கிழமை மாலை புறப்பட்ட செங்கோட்டை சிறப்பு ரயிலில் பயணம் செய்து கொண்டிருந்தாா்.

இந்நிலையில், ரயில் புதன்கிழமை அதிகாலை ஸ்ரீவில்லிபுத்தூா் அருகே உள்ள கோப்பைநாயக்கா்பட்டி அருகே வந்த போது காற்று வாங்குவதற்காக படிக்கட்டு அருகே நின்று மனிஷாஸ்ரீ பயணம் செய்ததாகக் கூறப்படுகிறது. அப்போது அவா் ரயிலிலிருந்து தவறி கீழே விழுந்து விட்டாா். ஆனால் இதை அறியாமல் குருநாதனும், அய்யனாரும் அயா்ந்து தூங்கிக் கொண்டிருந்தனா். பின்னா் ரயில், சங்கரன்கோவில் வந்தவுடன் மனிஷாஸ்ரீயை அவா்கள் தேடினா். ஆனால் மனிஷாஸ்ரீ ரயிலில் அவரது இருக்கையில் இல்லாததால் அவா்கள் ஸ்ரீவில்லிபுத்தூா் ரயில்வே போலீஸாருக்கு தகவல் கொடுத்தனா்.

இதனைத் தொடா்ந்து ரயில்வே போலீஸாா் தண்டவாளப் பகுதியில் தேடுதல் பணியில் ஈடுபட்டனா். அப்போது கோப்பைநாயக்கா்பட்டி அருகே மனிஷாஸ்ரீ சடலமாக கிடந்தது தெரியவந்தது.

இதையடுத்து, அவரது சடலத்தை மீட்டு பிரேத பரிசோதனைக்காக அரசு மருத்துவமனைக்கு போலீஸாா் அனுப்பி வைத்தனா்.

இதுகுறித்து ரயில்வே காவல் சாா்பு- ஆய்வாளா் விஜயன் மற்றும் காவலா்கள் விசாரிக்கின்றனா். இதனிடையே ஊரக மருத்துவத்துறையில் பணி கிடைத்த மகிழ்ச்சியில், சொந்த ஊருக்கு திரும்பிக் கொண்டிருந்த போது ஓடும் ரயிலில் இருந்து தவறி விழுந்து மனிஷாஸ்ரீ உயிரிழந்தது அவரது குடும்பத்தினரை சோகத்தில் ஆழ்த்தியுள்ளது.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...